Dalam sa mbang livestream di puac bilan 4 meng blaoh kayua So Kong Thuong Gia Lai pambuak haong Cuc Pablei salih online saong Kinh te lek taka so (Mentri Kong Thuong) peih ngak, tapei bilik hala gai Hoàng Đông (xa Bình An, tinh Gia Lai) pablei hu yaok ribau tapei tok dalam tukvak katut panak.

Sa-ai kamei Hồ Thị Mỹ Phúc – po labik ngak brei thau, kaya ndap nda mek hu OCOP 3 baoh patuk meng thun 2019, min dahlau diah pablei rah bhum palei kayua tukvak khik pacang katut panak. Hadei tuk pandar bruk njuk arthak piah dui atah tukvak pandar, lagaih piah pajeng nao atah, kaya hu lagaih haong darak online, ngan haong dom harak kakei blei tagok tal yaok rituh baoh.

“Yaok mbang Mega live di So Kong thuong rah tabiak, ye ndap nda kaya di khol dahlak pambak tabiak praong di angaok mang xa hoi, urang thau tal biak rilo. Ini lac jalan ngak daong ka gah ngak mbang pablei salih patagok samar drah. Sa mbang Mega live meda tagok tal ribau harak kakei blei. Khol dahlak brei njuk arthak kaya kan ndap nda, 2 tal 3 harei brei nao tal tangin urang blei mbang tuai damuai, khik kajap asar siam”.

Dreih jeng yau nan, Hop tac xa Gah ngak nong saong ikan Mỹ An di xa Phù Mỹ Đông dahlau diah gaok kan kandah ka jalan pablei tabiak yaom lac kaya tinh dau di drei mek hu tanut chuan OCOP. Hadei di tuk salih tapa pablei kaya di angaok dom darak online, hop tac xa hu peih praong darak pasar pablei, jien mek tame tagok rilo dalam dua thun tapa. Sa-ai Nguyễn Thụy Thúy Vi, Phaok Akaok Hoi dong quan tri HTX brei thau:

"Dahlau diah, khol dahlak sa janih pablei di bhum palei min hadei di nan mboh hu kein lagaih di darak pablei salih online nan ye khol dahlak hu peih bruk mek thaot binguk ba tagok clip saong peih dom mbang livestream di mang xa hoi saong di angaok darak pablei salih online. Meng nan harak kakei blei jeng tagok, khol dahlak daok peih ngak khang ka kein lagaih pablei online jang.”

Urak ini Gia Lai hu labaih 400-450 pandap panda OCOP, rilo meng lac kaya nong, kaya hu angan ye di bhum palei. Min, dom po ngak ndap nda kaya OCOP rilo meng lac ngak bruk sit, patakik ka ilamo lek taka so saong prein pambuak haong darak pasar, ngak ka jalan pablei tabiak oh ka tani tanat.

Dalam dua thun tapa, rilo danak dak daong ilamo pablei kaya kan meng online, livestream, padang asal kadha lek taka so… peih ngak, daong ka urang ngak nong saong hop tac xa dak harei dak randap haong bruk pablei salih lek taka so. Tapa nan peih praong darak pasar, padang hu angan je.

Ong Nguyễn Đình Kha, Phaok Akaok So Kong Thuong Gia Lai brei thau, dalam tukvak anak daok mai tal, tinh patui brei mboh thuong mai ndien tu lac sa kenh hu makna:

"Khol dhalak hu padang jalan ngak salih lek taka so di gah ngak mbang blei salih kong thuong. Dalam nan hu brei tapa gah pablei salih online. Ngan haong gah pablei tabiak, khol dahlak sangka iek praong tame darak pasar online tapa negar pambuak haong dom darak pasar pablei salih online pakat dunya. Tui Kuhria dalam bilan 5 ini, khol dahlak brei peih sa var nyaom biai, ndom ka darak pasar pablei salih online tapa negar.”

Salih lek taka so daok dak harei dak ngak salih bruk kaya ngak nong Gia Lai pablei tame darak pasar, peih tabiak dom kenh pablei lagaih saong siam mekre jang. Tuk urang ngak nong biak ngak po gah ilamo jamraik ngak kong, dom ndap nda kaya asar siam di bhum palei oh lac nao samar jang, blaoh daok patagok karo kajap tuk hu darak pasar praong./.