Di xa Phan Điền (klak) hu 400 baoh sang, dalam nan rilo lac urang bangsa Raglai. Lac sa palei bhum ceik, anek saih rilo lac anek bangsa takik. Anek kamuan bangsa praong tagok ndom mayai sap bangsa di drei yau nan ye bruk pato sap Viet lac biak kan kandah. Langiu di nan, raidiuk ngak mbang di mikva daok biar, ilamo daok kurang nan amaik ame di ini bhian takik sangka tal bruk bac megru di anek kamuan di drei.

Ong Mai Duy Quốc, Phaok akaok Mban Padang Ndang, Ndang uy xa Hải Ninh, tinh Lam Dong brei thau, dalam dom thun tapa, di bhum palei hu jak ba tame bruk di sa majam chinh tri dalam bruk pathau khan, jak ba rahra piah grauk urang thau ka bruk iek praong bac magru.

“Di pakat Bhum palei brei thau, ini lac bruk praong, brei njauk ngak bhian, njauk ndom mayai dalam luac jalan jak ba dom adei gauk anek saih dalam thun umo nao bac, njauk ndom caik hatai tal hu lac dom adei umur 5 thun brei tame bac abih 100%. Thau ka bruk ini, yaok thun, bhum palei gam haong majam chinh tri xa hoi, mat tran, dom ndoan the bhian rivang tangi sua jeng yau jak ba dom baoh sang kan kandah brei anek nao tame bac, khik karo khik kajap tui njauk tanut yau ba tabiak”.

Tal ini, meng bruk sangka daong eik glang di dom pakat karja, bruk daong di dom gru pato, jalan sahaneng lac “bac ngak hagait, praong tagok jeng nao tame glai” dak harei dak brei klak abih dalam glao akaok di mikva bangsa Raglai daok di ini. Sa-ai Thổ Thị Vương, urang daok di palei Phan Điền, xa Hải Ninh, tinh Lam Dong brei thau:

“Dahlau anek khin padeih bac, min jeng hu dua diuk pasang dahlak ghak kakei pachreih ka anek nao bac gilac, daok di sang ye daok sit lo, oh thau ngak hagait. Sang bac gam haong dom mbang, dom gah, ndoan the jeng sangka tal jak ba, tal ini, anek dahlak jeng nao bac yau bhian paje”.

Anai gru Mai Thị Kim Thuận, gru pato Sang bac Tieu hoc – THCS Phan Điền, xa Hải Ninh, tinh Lam Dong brei thau, dom thun dahlau diah, yaok tuk thun bac bahrau jaik mai tal, ngan haong anek saih bangsa Raglai di ini jalan nao bac jeng daok rilo kan kandah. Kayua yau nan ye, bruk jak ba dom adei nao bac, njauk ndom tal lac khik tani tanat dom anek saih hadei yaok mbang padeih he tuk halei jeng lac kan kandah praong.

“Ieu Lac anek saih di bhum palei, dahlak hulin hu kein lagaih lac drei thau tanat jang ka bhum palei drei. Urak ini amaik ame biak sangka tal bruk bac megru di anek kamuan drei. Dom adei padeih bac, sang bac jeng nao jak ba bhian saong dil samu, amaik ame jeng pambuak haong sang bac piah ba tabiak jalan langyah siam di abih”.

Cei gru Huỳnh Tam Huynh, Urang pan Akaok Sang bac Tieu hoc – THCS Phan Điền brei thau, meyah oh salih hu ilamo di rahra ye asar siam ka bruk pato megru di ini lac asal kadha kan kandah. Kayua yau nan ye, yaok gru pato daok lac dom urang pathau khan nao tal yaok baoh sang piah jak ba anek kamuan dalam thun umo nao tal sang bac…

“Sang bac hu padang danak dak bruk ngak meng akaok thun, hadei di nan khol dahlak hulin parabha yaok kapul gru pato nao tal yaok sang piah pasang duah bruk pathau khan tui pato tacei di pakat angaok. Hu bruk sangka di Ndang saong Karja brei ka bruk pato megru, rilo mikva di ini hu ilamo dak harei dak glaong ka bruk pato megru, nan tuk nao pasang duah, mikva jeng yau amaik ame pambuak biak siam. Dom urang nan srap gap pambuak haong sang bac piah ngak siam bruk pasang duah pathau khan bac magru yaok thun”.

Meng tame bruk khang catang di gah pato megru saong dom gah, dom bhum palei, tal ini taong abih 124/124 xa, phuong, kaoh pulao di tinh Lam Dong khik karo tani tanat bruk tayah bruk oh thau akhar huroh. Dalam taong abih labaih 2 trieu urang dalam umo 15–60 thun, bruk thau akhar hu labaih 98% di tanut 1 saong labaih 96% di tanut 2. Dom bruk nan brei mboh kham merat khang kajap saong kham merat glaong gah pato megru di bhum palei.

Meng bruk kham merat di dom cei anai gru saong bruk jum tangin di dalam rahra bhap bini, jalan nao tal sang bac di anek saih Bangsa takik labik gah Pur tinh Lam Dong, dalam nan hu jaik 300 anek saih bangsa Raglai di palei Phan Điền, xa Hải Ninh, tinh Lam Dong dalam thun bac bahrau 2026 – 2027 ini hu patakik pakurang dom kan kandah./.