Harei akaok bilan 10, khol dahlak hulin gaok tom ong Ksor Chuel daok di mbon palei Rưng Ama Nhiu, xa Ia Rbol, tuk ong bahrau mai meng Nyaom roya Ndang mbo tinh Gia Lai mbang ka I, tukvak 2025 – 2030. Di umo 76 thun, mbuk patih kaok, min ong Ksor Chuel jeng daok hadah krah, khang kadang, yau gok gha kayau praong di ceik glai Gia Lai. Yaok harei, ong jeng khik bruk bhin puac tapuk di drei, roh duah sarak bahrau di Ndang saong Karja piah pathau khan, brei daong mikva; langiu di nan, ong jeng bhian pato dom anek naih dalam mbon palei dom baoh panuac English, ilamo dalam rahra…

Lac sa di dalam dom dam dara urang bangsa Jarai akaok meti hu pato pakai dalam sang bac ngak gru pato di hadei harei peih paha taneh ia tame sa baoh negar, dalam luac labaih 30 thun ngak bruk di drei, ong Ksor Chuel hu pato ba yaok ribau anek saih di dom mbon palei. Rilo urang dalam nan urak ini hu urang ngak bac si, ky su, urang jakar pan bruk. Thei thei jeng hadar tal cei gru di drei hu hatai anit ranam, iek praong saong thau ndua dhar phol.

Sa-ai kamei Nay H’bloanh (bangsa Jarai) urang jakar Bilik Ilamo – Rahra xa Ia Rbol, anek saih klak di gru Ksor Chuel, brei thau.

“Gru Ksor Chuel ieu lac urang pato ilamo ka dahlak hulin saong rilo urang meng tuk bac pakat 2. Meng ilamo di gru, bruk kham merat di ta-eng drei, dahlak hulin tui jalan bac megru saong urak ini hu ngak urang jakar di xa Ia Rbol. Dahlak hulin biak iek praong tal gru. Meng hu gru daong prein ka khol dahlak bac megru tal labik tal dhua, hu ilamo piah duh ka dalam rahra.”

Hadei tuk abih pato di sang bac, ong Ksor Chuela patui veik hu urang taha ranaih di dom mbon palei xa Ia Rbol thau tal di bruk ngak Akaok Kapul pachreih bac di xa. Adei Nay Lê Quốc Duy, gam daok di mbon palei Rưng Ama Nhiu brei thau amaik ame drei jeng mek ong Chuel ngak kareih camin piah ka dom adei sa-ai dalam baoh sang pasang ngak tui. Dom adei jeng bhian hu gaok ong gru saong hu daong prein bac megru.

“Dalam dom danak dal ilamo atau harei raya di mbon palei, ong Ksor Chuel bhian pato ka rairah khol dahlak daok brei ka hu caong takre bruk siam gheih; saong khin ngak ka dom caong khin caong takre nan jeng biak ye brei kham merat bac megru,. Ta-eng adei hu caong takre jeng sa urang gru pato Katih, adei daok kham merat piah pakacah tame sang bac chuyen di tinh saong hadei ini tame universiti Dai hoc gah pato pakai ngak gru pato. Tuk jeng gru pato, adei brei ngak bruk pato ilamo ka raairah hadei di adei.”

Xa Ia Rbol hu 2.236 baoh sang, dalam nan hu jaik 93% lac urang mikva bangsa Jarai. Dom thun tapa, mikva tuk halei jeng gul pataom, chreih chrai patagok bruk ngak mbang blei salih, dak yam dak hu patruh eik patrun kathaot; gam haong nan ngak siam jalan di Ndang, sarak hukum di Karja saong oh luai ka kol jhak palue pacuh, oh hu urang halei njauk kol jhak plue pacuh ngak chak. Dom uranaih hu nao bac hu jaik 100%. Ong Nguyễn Chí Cường, Akaok UB Bhap bini xa Ia Rbol brei thau, bruk ini lac mai meng bruk jak ba, pato tacei di dom urang taha palei, urang akaok mbon palei saong urang hu angan je, dalam nan hu gru Ksor Chuel.

“Gru Ksor Chuel tuk halei jeng nao dahlau tuk halei jeng ieu lac sa urang naih gheih dalam bruk ngak tui jalan di Ndang, sarak hukum di Karja. Chreih chrai pathau khan, jak ba urang dalam sang, mikva bhap bini rahra dalam dom mbon palei di xa Ia Rbol ngak siam lagaih dom sarak di UB Bhap bini xa peih ngak mai. Gam haong di nan, ngak siam bruk patagok bruk ngak mbang, khik kajap siam mekre, karo palei kajap nagar dalam taneh ia.”

Yaom mada umur “labaih tijuh pluh thun”, prein yava oh daok dam sang yau dahlau, min ong Ksor Chuel tuk halei jeng ba abih tung tian saong kandauk ngak ka mbon palei. Di ong, grauk urang jeng mboh sa hatai diukrai gheih-thun umo glaong ilamo glaong, tari taring daong prein padang bhap bini bangsa Jarai di bhum palei anh hung dak harei dak kaya meda./.