Tui So Cong thuong tinh Vinh Long, tukvak 2021 - 2025, bruk mek hu di pablei salih ndien tu di tinh hu labaih 3.500 ty dong, ngan haong tanut cakrok kuhria rah tapa hu 25% dalam yaok thun. Rilo ndap nda hu ngak rilo mek hu tanut OCOP 4-5 patuk hu khang hatai hu mbaok tame dom labik pablei salih ndien tu pakat negar, dak harei dak hu pablei tabiak darak pasar di dunya. Min tapi, taphia di dom bruk ngak hu, pablei salih ndien tu di tinh jeng daok dom bruk gar tavak njauk brei taoh talaih.

Thau lac bruk patagok pablei salih ndien tu brei pagam haong salih lek taka so taong abih, tukvak tapa tinh jhul khang bruk bac pasram ilamo pablei kaya lek taka so, ilamo bayar jien, gam haong dom danak dak jhul tagok pablei salih, daong gah ngak mbang pablei salih, hop tac xa saong sang bein lagaih haong jalan pablei salih bahrau. Njauk caik hatai lac, tinh hu bruk pambuak gauk catang haong dom labik pajeng ba praong. Amuk Tô Lan Phương, Yam ndok Viettel Post Vinh Long, brei thau lac: "Di Viettel Post saong Tiktok shop Viet Nam hu sa danak dak nan lac luac jalan kaya nong saong ba kaya Viet tabiak atah. Tapa danak dak ini, kaya ngak nong di bhum palei brei hu ba tagok; hu ilamu yaih khan jeng yau hu pablei angaok Riktok shop. Pagap yau di Vinh Long ye hu sa shop ieu lac “Luac jalan kaya nong Vinh Long” piah meda hu daong, tacei ba mikva padang kenh saong kaya ndap nda di mikva ngak tabiak hu ba tal tangin urang blei pandar."

Sa kadha hu brei mboh brei ka bruk salih drei khang nan hu  sa urang sa-ai kamei angan Thạch Thị Oanh Thi, pajeng tabiak saong praong tagok di xa Cầu Kè – bhum palei hu kaya li-u ralin danei angan. Tamat bac di thun 2017, sa-a kamei Oanh Thi peih shop di phuong Nguyệt Hóa, Vinh Long saong pambuak tuai damuai tapa nen tang lek taka so. Meng var livestream akaok meti tok hu sa tuai damuai, tal ini, yaok var kuhria rah tapa sa-ai taduan hu meng 300 tal labaih 500 kaya hu kakei blei. Jien mek tame tagok, saong abih di nyu nan lac, dom baoh li-u ralin di bhum palei hu tabiak rilo darak pasar negar langiu.

Oh lac baoh sang pablei salih sit, dom hop tac xa jeng kham merat pandar ilamu ngak kong nghe lek taka so tame bruk pablei kaya ndap nda. Hop tac xa Ngak nong Long Hiệp, padang tabiak di thun 2018, urak ini hu peih praong taneh ngak padai tagok 170 ha, dalam nan hu 20 ha padai huu co pambuak raong hadang giraong hijao. Kaya brah huu co Hạt Ngọc Rồng di HTX mek hu tanut OCOP 4 patuk pakat tinh saong lac kaya OCOP naih gheih di Bhum taneran kraong Cuu Long, hu mbaok di dom labik pablei salih ndien tu. Ong Trầm Minh Thuần, Yam ndok HTX Ngak nong Long Hiệp, brei thau: "HTX sangka iek praong pandar gah kenh pablei salih ndien tu piah ba ndap nda mai tal jaik jang haong urang blei pandar. Urak ini HTX hu pandar fanpage angaok facebook Art business piah klah rabha dom thaik thaot jeng yau dom video katut saong ba tagok tiktok piah pablei ka urang pandar. Bruk pandar dom ilamo ngak kong bahrau daong pambuak haong urang blei pandar jeng yau lagaih jang.”

Gam song bruk siam lagaih ba mai, tukvak anak mai tal, tinh Vinh Long patui veik daong haong dom Kaya OCOP, gah ngak mbang pablei salih, HTX saong urang ngak nong jhul khang salih lek taka so, patagok pablei salih ndien tu tui jalan hacih hijao, karo kajap. Ong Phạm Phước Trãi, Phaok Yam ndok So Cong Thuong tinh Vinh Long, ndom meyai lac:  "Pablei salih ndien tu ieu lac sa di dalam dom jalan langyah bo tinh daok peih ngak piah peih praong darak pasar. Dalam tukvak mai meng anak, tinh paglaong saong daong piah pato pakai, paglaong ilamo lek taka so ka urang ngak nong saong dom hop tac xa, gah ngak mbang pablei salih pablei ka urang blei pandar, piah paglaong yaom kaom kaya nong Vinh Long.”

Meda hu mboh lac, bruk pablei salih ndien tu oh daok lac kadha bahrau bo dak harei dak hu makna dalam jalan patagok pablei salih bahrau di tinh Vinh Long. Meng dom labik ngak kaya sit tal gah ngak mbang pablei salih jeng srap gap “tagok darak pasar”, dak harei dak ngak lek taka so ka bruk pablei salih. Luac jalan ba kaya nong tagok “darak pasar” lek taka so oh lac daong brei mboh angan je di kaya nong Vinh Long blaoh daok peih praong bambang sa darak pasar dalam negar saong dunya./.