Di tinh Lam Dong, mikva bangsa Cam daok pataom rilo di dom xa: Tuy Phong, Liên Hương, Bắc Bình, Hồng Thái, Hàm Thuận Bắc, Hàm Thuận, Tân Thành, Sơn Mỹ saong Tánh Linh (daok di Binh Thuan dahlau diah).

       Dalam dom harei ini, bruk bui sambai srap gap uan raok ka Harei Kate hu chreih chrai di dom palei urang bangsa Cam. Grauk urang buh tangin ramik hacih sa-at meng jalan palei pala, blaoh ngak mbang ron, kadha yaih khan ka harei raya. Dom kapul urang tamia daok brei drah samar chip pasram piah ka dom var tamia. Loa papar sap yava tagok haong sap ragam Cam yaih khan ka tukvak peih ngak saong dom bruk di Harei Kate ngak ka thei jeng chreih chrai brei ka harei uan raok Kate. Ong Đào Ngọc Vỹ, Akaok palei Phan Hiệp, xa Bắc Bình, tinh Lam Dong, brei thau:  "Urak ini, mban palei jeng pathau khan bruk peih ngak harei Kate 2026 di kalan Po Nit…”

        Dalam dom baoh sang urang bangsa Cam, bruk srap gap uan raok harei Kate hu tame ngak. Sa-ai Lâm Bảo Minh, urang daok di palei Cakak Cảnh Diễn (palei Canar Tịnh Mỹ klak), xa Hồng Thái, tinh Lam Dong (labik Bắc Bình klak), brei thau: "Thun halei jeng nan, jaik tal harei Kate baoh sang ramik hacih…”

     Labik hu angan Inem mek bimong Po Sah Ine daok di phuong Phú Thủy, tinh Lam Dong (labik ban Phan Thiet, Binh Thuan klak), labik jirah rivang di rahra saong tuai damuai dalam harei Kate daok hu pasiam majam gom truac haddah saong srap gap ka Harei Kate. Ong Đồng Trung Tín, urang pasang khik bimong Po Sah Ine brei thau:  “Mban pasang iek inem mek jeng hu brei urang tagok cakak hareik…”

        Hadei Harei Kate di bimong Po Sah Ine, mikva bangsa Cam di xa Hàm Thuận (Binh Thuan dahlau diah) brei patui raok Kate di kalan Po Dam di 2 adit meng anak tal. Piah pabak hatai caong duh Po di urang Cam labik ini, thun ini, kalan Po Dam hu buh tame labaih 5,85 ty dong piah pasiam pakajap saong hu salah blaoh, jao gilac dalam bilan 5.

         Harei Kate oh lac bingun piah pahadar mukkei, likau salamat, ngak hagait hu nan, baoh sang trei sir blaoh daok ba tui bruk pambuak bhap bini. Ong Thông Minh Lợi, Akaok Mbang Pasang iek kalan Po Dam brei thau, tuk labik danaok Po hu khik ramik, bhap bini hu kein lagaih piah ngak adat ilamo, pato veik adat cambat saong pato megru ka rai rah sit umo ka halau agha ye raya adat Cam dak hu makna jang:  “Mikva khol dahlak thau dhar phol Ndang saong Karja…”

         Harei Kate di bangsa Cam hu jeng labik pagun sanya di dom urang anit ranam ilamo bangsa Cam saong jeng lac labik jirah rivang brei ka tuai damuai daok di dalam saong di langiu negar. Tapa yaok bal Kate, dom asal kadha ka ilamo bhap bini hu pato veik dalam raya, daong rai rah sit umo thau jang ka ilamo saong hu thau khik ramik ilamo di bangsa drei./.