Do labik peih ngak danak dak jalan tuh manyek palei Đăk Lim, ong Trần Trung Sơn, urang jakar di Pasak Jitvu Taong abih xa Đăk Ơ, labik dang ngak brei thau: Ini lac sa jalan pambuak labik daok di bhap bini saong labik ngak mbang, min labaih 2 bilan dalau, jalan ini daok jalan tabak kakai. Kayua yau nan ye, tuk xa hu jalan buh jien ndo tame brei tuh manyek, danak dak hu mikwa palei ba hatai buh tame biak praong.

Danak dak ngak jalan atah jaik 1,5km, praong 6,5m, saong abih jien buh tame 3 ty dong meng jien karja brei ka xa Đăk Ơ thun 2026. Jalan nao tapa taneh apuh di 17 baoh sang di bhap bini, gam saong taneh njauk dui tame labaih 1,6ha, mek bih jien labaih kurang 730 triệu đồng. Bruk mboh uan tabuan kayua lac oh thei mek jien bayar, Taong abih 100% dom baoh sang ini pok brei saoh, kaoh kayau jao taneh piah ka danak dak jalan brei peih ka drah. Dalam nan hu ong Trần Văn Thuấn daok di palei Đăk Lim pok alin 3,3 ngàn m², bih yaom jien labaih 150 trieu dong. Sang ong Nguyễn Đình Điều pok brei 2 ngàn m², bih yaom jien labaih 90 trieu dong.

Ong Nguyễn Mạnh Hùng, urang vakil lambaok dom urang daok ngak brei thau: “Yaom mada danak dak bahrau peih ngak, min mboh ralo lagaih kayua mblang taneh jalan peih huan biak drah samar, tal ini bruk ngak jalan hu blaoh 40%. Urak ini công ty caga ganao ndap nda gai huei ia cuah ganap, pataom prein jamraik ngak jeng ye kham marat jeng ye ba abih hatai brei ngak salah blaoh dahlau harei tui janji pambuak ngak”.

Di xa Đăk Ơ, urak ini hu 6 jalan dan saong 2 baoh catua hu brei buh jien jaik si 36,6 ty dong. Bruk ngak ini hu mikva bhap bini ba abih hatai jeng hu brei ieik glang tabi tanat di karja xa. Njauk caik hatai hu 3 jalan bahrau ngak blaoh dahlau harei brei ngak.

Sa-ai Võ Văn Mười, rah ra urang daok di palei Đăk Lim, brei thau lac: Dalau diah jalan ini hu tuh manyek min mbaok jalan sit, radiah praong pajeng ndap nda trak nduac tapa ralo, jalan nyu trun. Ralo jalan ndik haneik, vaiy vang, mbuan tamuh bala. Tal ini, danak dak ngak blaoh, jalan praong, mbaok jalan hu tuh mayek karak, nao mai lagaih laguo. Ribaong tathuak ia siam karo, brei ka mikva sahnang hatai, oh huac kanda tuk hu hajan praong.

Thun bac 2026-2027, gru saih dom pakat bac di xa Đăk Ơ uan tabuan chreih sambai hu sarak karja di ban raya Dong Nai mai buh jien ndo tame patagok karo siam bruk bac saong pato magru di 8 xa daok di talei tapen nagar. Dalam nan njauk caik hatai brei ka mbang huak di uranaih anek saih bac magru pakat tieu hoc saong THCS.

Meng bruk ngak ini, UB Bhap bini xa Đăk Ơ hu buh jien tame brei padang sang bac magru tui jalan dreih gauk mai meng bruk karja buh jien tame jaik 114 ty dong. Urak ini dom baoh sang bac di taneh xa jeng hu brei pasiam, pagheih daong ka nyu hu sampurna ndap nda sang danaok, daong siam makre brei ka anek saih.

Gru Bùi Văn Giang, Phaok Hieu truong Sang bac THCS Đăk Ơ brei thau: Sang bac hu labaih 1,2 ribau anek saih, urang bangsa takik bih 32%. Ralo adei anek saih hu sang daok atah sang bac labaih kurang 10km yau nan ye harei harei dom adei nao mai biak susah kandah kan, njauk ndom mayai di abih hu lac labik mateh daok mateh bac, daong ka anek saih hu sanang kein piah bac magru lagaih lagua jang.

Mai tal xa Đăk Ơ dom harei ini thei thei jeng mboh salih cambaic dom baoh salih barau di xa bhum palei tapen nagar. Langiu di sang danaok gheih siam yau gauk, daok mboh talei yak yum jum pataom sa tung sa hatai di bhap bini saong karja palei pala. Ini lac asar kadha brei ka Đăk Ơ oh padeih brei ka patagok, ut bara di dom xa, phuong karei dalam ban raya jeng ye karo kajap di bhum taneh tapen nagar./.