Tamia Chằn daok ieu lac tamia Rô Băm Yeak Rom, bhian hu peih ngak  dalam dom harei raya praong di urang Khmer yau Tet Chôl Chnăm Thmây (uan thun bahrau), Sene Đôlta (adat duh paling mukkei) saong Oóc Om Bok (adat paling yang ia bulan).

Ong Kiên Sô Phát, Dang akaok baha Bôtum Kiri Răngsây (sang baha Khedol, puk palei Thạnh Đông, phuong Bình Minh, tinh Tay Ninh) brei thau, meng tukvak bac di gauk, salih jalan ngak mbang kinh te - ilamo - rahra di urang Khmer urak ini rah tabiak biak khang, dui tui bruk mbuan kurang lahik dom yaom kaom ilamo, dalam nan hu seni tamia bhap bini. Dahlau diah, dalam bingun raya Tet, langiu di adat dalam agama, banah adaoh tamia dalam sang baha saong pum soc Khmer rilo meng lac tamia Rom Vong saong adaoh tamia bahrau. Dom thun jaik ini, rilo sang baha saong bhap bini Khmer di Tay Ninh hu ba seni tamia Rô Băm, abih di nyu nan lac ragam tamia Chằn hu pamedeih veik di labik ngak adat cambat saong harei raya. Dom ong acar gam haong dom urang buh abih tung tian ka ilamo bangsa hu kham merat pamedeih veik ragu ragam ngu am bhap bini, da-a dom nghe nhan meng Soc Trang saong Tra Vinh klak mai tal Tay Ninh pato ka rai rah dam dara. Tapa nan pamedeih veik sa kadha tamia, gam haong nan pambuak atah halau ilamo Khmer di angaok bhum taneh Tay Ninh.

Tamia Rô Băm Yeak Rom lac ragam tamia gheih karei mai meng mblang tamia Rô Băm - janih adaoh tamia meng kal klak di urang Khmer, mai meng adaoh tamia mặt nạ Lakhol Khol di An Do, pamedeih veik dom banah kadha dalam akayat Riêm Kê. Meyah Lakhol Khol sangka iek praong bruk adaoh tamia haong mặt nạ, ye tamia Chằn gilac pataom tame bruk khan dalikan meng rup pabhap, dalam nan hu bruk tamia di tangin saong takai, piah brei mboh ka urang menuac dalam akayat, rilo meng lac thaik thaot di dom yang mebang saong kamalai dalam kadha akayat. Bruk pamedeih di tamia Rak dalam raidiuk bhap bini Khmer Tay Ninh oh lac brei mboh hatai thau khik ramik ilamo bangsa, bo daok brei mboh siam lagaih di bruk khik ramik drap ar ilamo oh mboh di meta dalam jaman urak ini.

Adei Binh Na Quinh (umo 18 thun, daok di xa Ninh Điền), nghe nhan sit thun umo brei thau, meng camreip adei bac taong hagar Chhay-dăm, hadei nan, adei gam haong dom ayut cuai sahabat dalam palei hu nghe nhan Tra Vinh pato tamia Rak. Kapul ta-eng rik jien blei khan ao, kaya tamia saong mặt nạ “akaok Rak” piah tamia. Mbang akaok camreip hu dang angaok mblang tamia di raya adat, taduan hu bruk daong prein di mikva, adei mboh biak hadah mbaok meta, haniem phol.

Daok urang nghe nhan sit thun umo tamia Chằn gam haong tamia hagar Chhay-dăm Phan Đết brei thau, tukvak jaik ini, kapul bhian hu da-a tamia rilo abih dalam bingun Tet Chôl Chnăm Thmây, Adat Pok tagok Khan ao Kathina saong di dom sang baha, bhum palei. Kayua jien mek tame meng tamia Rak oh tani tanat nan bruk khik tani tanat bruk pasram saong dui pachreih dam dara hu mbaok tame daok rilo kan kandah. Yaom lac urang nghe nhan urak ini daok biak takik, min bruk njauk bui sambai lac hu rilo adei sit di dom phum soc Khmer duah thau, pasram tamia Chằn.

Thac si Ngô Tư Lê, urang dalam Kapul Van hoc Nghe thuat tinh Tay Ninh ndom lac, dom rilo yaom kaom nghe thuat dalam raidiuk ilamo - hatai di dom bangsa hu daong brei mboh cambaih laih kadha akayat bhap bini bangsa. Adaoh bhap bini, ragam ragu bhap bini, ragam tamia bhap bini oh lac hu khan tapa baoh panuac, ragu ragam, thaik thaot bo daok hu khik dalam glo akaok di bhap bini. Min, janih seni ini hu daok veik rilo meng lac tapa bruk khan meng pabah, oh ka hu cih vak gilac ka ginup. Tuk urang nghe nhan plang lahik bo oh hu thei patui veik bruk, dom ragu ragam, ragam hagar, ragam tamia nan mbuan lahik. Langiu di nan lac di rilo labik, urang nghe nhan praong thun umo oh meda patui veik bruk, dalam tuk nan rairah sit thun umo takre ragu ragam, ragam tamia tui jalan urak ini. Meyah oh khik ramik dil samu, dom janih ini brei dang anak bruk mbuan lahik.

Tukvak tapa, Ndang mbo tinh Tay Ninh brei mboh jirah rivang lac gah brei hu patagok samar, hu makna abih lac ba Labik jirah rivang ceik Bà Den jeng sa labik mai rivang me-in njauk pakat negar. Pagam saong jalan ngak ini, bruk khik ramik saong paglaong ragu ragam, adaoh bhap bini, tamia bhap bini di dom bangsa hu maong yau lac bruk ngak hu makna, brei kein lagaih piah jhul tagok kinh te - xa hoi, abih di nyu nan lac bhap bini bangsa takik. Jalan ngak puac abih lac paglaong raidiuk ilamo, pamedeih hatai mboh hadah mbaok meta bangsa, peih praong janih jirah rivang, rik daong ba ilamo Tay Ninh pambak tabiak atah, ba drei tame dalam jaman bahrau./.