Langiu umo 60 thun, bruk pandar smart phone gam haong ong Quách Hiếu, daok di puk Sóc Lèo, jeng daok rilo kan kandah. Dahlau diah, yaok tuk khin ngak harak gal karja, ong bhian brei nao tal Pasak Duh bruk karja di xa piah hu tacei ba. Daok urak ini, gam haong bruk daong jitviu karja hu padang di puk palei, ong Hiếu tok khin nao tal sang bhap bini, urang jakar saong urang dalam kapul daong tacei ba yaok yam piah ong meda hu ta-eng ngak dom harak gal di smart phone di drei.

“Bhum palei peih labik ngak di puk palei piah tacei ba ka rahra, daong khol dahlak thau hu dom jitvu karja. Gam haong rahra khol dahlak, yau nan mboh biak mbuan, lagaih, brei kein lagaih ka rahra ngak bruk di labik, oh njauk nao atah rilo mbang. Yau dahlau diah ye brei nao tagok tal Uy mban, min urak ini meda hu ngak di puk palei.”

Njauk caik hatai dalam bruk ini hu lac, bruk ini oh ngak ka rahra bo pataom tame bruk “pan tangin pato bruk”, daong mikva dak harei dak ngak jeng ilamo saong meda ta-eng ngak dom harak gal dalam dom mbang hadei. Ong Bùi Minh Thương, Akaok Mbang rahra puk Giồng Giữa, brei thau:

“Bruk daong khol dahlak brei mboh sahaneng lac mikva ta-eng ngak, khil dahlak hu janih tacei ba. Ade isa-ai di labik daong oh ngak salih bo tacei ba yaok jalan piah mikva meda hu ta-eng ngak di angaok phone di drei. Jalan ngak di khol dahlak lac harei ini tacei ba ye mbang hadei mikva meda ta-eng ngak hu di sang.

Meda mboh lac, bruk daong jitvu karja di dom puk daok ngak jeng “tangin pambuak atah” di Pasak Duh bruk karja xa. Ong Lê Công Tạo, Yam ndok Pasak Jitvu karja xa Lịch Hội Thượng, brei thau lac:

“Pasak jeng peih ngak dom tal pato, pabak ka ilamo, yau salih taka so, bayar jien online saong ngak taka so ka harak gal, dom nen tang taka so dalam bruk langyah harak gal karja. Gam haong di nan. Pasak jeng pabak ginup dom harak gal tacei ba, harak biểu mẫu, harak angan karja mbat taok di Mban rahra piah rahra lagaih ka pasang iek harak gal karja.”

Meng bruk ngak ini, xa Lịch Hội Thượng pamaong tal padang majam daong praong di dom puk palei, piah rahra meda hu pandar jitvu taka so lagaih meng labik drei daok. Bhum palei kham merat yaok thun tagok meng 10 tal 20% rahra, gah ngak mbang pablei salih ta-eng ngak jitvu karja online; dak harei dak ngak jeng bruk bhian randap pandar VNeID, bayar jien online saong dom jitvu taka so. Piah bruk ngak hu paglaong siam lagaih, ong Trần Minh Nhẫn, Akaok UB Bhap bini xa Lịch Hội Thượng, ndom khang lac:

“Mbang ka sa lac khik kajap hu ginup urang daok khik bhian piah daong rahra tuk hu caong khin. Ka dua lac bhian pasram, pabak ilamo taka so ka dom urang dalam kapul. Khol dahlak dak yam dak daong rahra ngak jeng bruk bhian randap pandar, ta-eng ngak dom lagaih taka so dalam raidiuk yaok harei, daong padang rahra taka so, xa hoi taka so jeng yau padang karja taka so meng di labik.”

Tuk rahra meda hu ta-eng drei ngak dom harak gal karja di angaok labik taka so, karja saong rahra jaik taphia gauk jang, daong paglaong siam lagaih bruk pasiam salih bruk pasiam salih bruk karja, pamaong tal padang bruk karja ka lagaih, hadah bahrau saong duh Rahra./.