Tacei tame blah pataih khan jih dalah hulin daok cuk di angaok rup, sa-ai kamei K’Hều, daok di palei 1, xa Đưng Knớ, huyen Lạc Dương, tinh Lam Dong chreih chrai meyaih, ini lac blah jih dalah sa-ai kamei eng menyim luac 2 adit. Sa-ai kamei K’Hều khan lac, rilo adei sa-ai kamei dalam palei jak gauk nao bac menyim khan bai, tuk ba dom pandap panda tagok internet ye hu dom urang sangka saong dak kakei blei.

 “Pagap yau drei ba tagok facebook, ye hu urang bangsa Lạch daok di Gia Lai ndom lac meyah drei menyim ye urang nan kakei drei menyim dahlau sa atau dua blah. Drei thau meda pablei hu ye drei eng menyim piah duah jien mek tame. Nan ieu lac kadha ngak ka drei chreih chrai bui sambai jang, khin menyim ka hu. Anak tal drei patui veik nao bac megru”.

Daok sa-ai Bon Niêng K’Huyên, daok dalam sa palei brei thau, mai meng thau menyim blaoh tuk daok saoh sa-ai hu jen mek tame.

“Drei bac megru saong thau menyim 1 thun ini mai paje. Tuk daok saoh lahe ye menyim saong pablei tabiak langiu Lạc Dương hu dom urang blei, yaom labaih 550-600 ribau sa blah, yaok bilan ngak hu 4 blah. Urak ini daok chreih chrai haong bruk bac menyim, caong khin peih veik tal pato bruk menyim jih dalah piah oh lahik bruk ngak bhap bini meng kal mai”.

Tuk khan bai pataih hu kakei dak blei rilo jang, dom sa-ai kamei pataom gauk jeng sa kapul menyim piah pandap panda di drei hu rilo gah blei jang. Saai Bon Niêng K’Gut, daok di palei 1, xa Đưng Knớ brei thau, meng pambuak hu haong Caritas Đà Lạt, kapul menyim di sa-ai hu rilo khan bai jih dalah pablei hu piah ngak khan ao lakhah, ngak gheih meta dalam baoh sang, ngak khan ao cuk bahrau… Sa-ai daok peih tal bac pato menyim di sang piah hu menuac menyim jih dalah pandap panda. 

“Drei caong hu patagok, pambak tal dom dam dara karei, daong padang ilamo bangsa drei. Hu peih tal meng thun blaoh paje, peih tal hu 15 urang ye hu 5 urang thau ngak saong eng piah pablei. Gah Caritas daong ngak jeng sa kapul ngak haong drei. Hu urang nyom, hu urang katung talei mrai, hu urang ngak ini ngak daih piah hu rilo pandap panda, njauk haong darak pasar min piah daong khik ilamo bangsa drei”.

Di Bhum atah bayah di huyen Lạc Dương haong labaih 90% rahra urang bangsa takik, masa tukvak tapa, xa Đưng Knớ taduan hu rilo hatai sangka di Ndang saong Karja, padang jalan mbak, ndien gom, sang bac, balai yte. Xa mek hu angan lac xa palei pala bahrau dalam thun 2021. Meng bilan 7 thun ini, huyen Lac Duong ba tabiak Sarak padang Palei ilamo yulit bhap bini xa Đưng Knớ hu peih tabiak hatai caong takre khik ramik ilamo bangsa pagam haong patagok jirah rivang di bhum palei.

Amuk Phi Srônh K’Ham, Akaok Kapul urang kamei di xa Đưng Knớ brei thau, meng bruk tacei ba di huyen, kapul urang kamei hu jak ba, pataom adei sa-ai kamei patui veik patagok bruk menyim jih dalah, padang ngak palei menyim jih dalah jeng jeng palei jrah rivang.

“Patagok ilamo bangsa piah khik ramik, caik ka rai hadei yau nan ye dom sa-ai kamei di ini jeng hu bac, hu jao ba ilamo menyim, pandap panda ngak tabiak patagok biak siam, parilo jien mek tame ka dom sa-ai kamei. Urak ini hu sarak daong, Kapul urang kamei daok pataom hu 20 sa-ai kamei daok hu hatai caong mesre phun jien ngak jih dalah, yaok baoh sang mesre glaong abih lac 50 trieu dong”.

Hu dom tacei ba cambaih laih di karja palei ka bruk khik ramik saong patagok bruk ngak bhap bini tui mukkei meng kal mai, rilo urang kamei bangsa K’Ho di xa bhum atah bayah Đưng Knớ daok pamedeih daneing menyim papan jih dalah, ngak tabiak dom pandap panda rilo sambo màu, ngak tabiak dom pandap panda bahrau meng khan bai pataih jih dalah di bangsa. Menyim jih dalah pataih oh lac daong rahra hu jien mek tame, blaoh daok peih hatai sambai caong takre ngak jeng palei ilamo yulit bhap bini dalam bhum palei pala bahrau./.