Dalau diah, bhap bini urang daok di xã Thạnh Hóa pambak daneing tame bruk ngak hamu apuh, ngak sit ngak tukik, baoh karaoh mek tame sang oh hu ralo. Mikwa urang ngak mbang oh sanang piah thau ilamu khao tin jamariak barau gah khoa học - kỹ thuật jeng daok kurang, dalam nan hu lac brei ka gah khao tin brei ka sarak daong ka bruk ngak mbang barau, kein lagaih brei ka bruk ngak, mayao mayit dalam rahra, darak pasar blei salih ndap nda kaya kan…

Hadei pagam karja tame hasa (thị trấn Thạnh Hóa, 2 xã Thủy Tây dan saong Thạnh An klak) jeng ye ngak tui jalan karja 2 pakap, langi di pataom prein tame ngak bruk asar njauk ngak, UBND xã marat hatai tal patagok kinh tế - xã hội, ieik glang rai diuk rahra, dalam nan hu bruk patrun kathaot karo kajap. Meng di nan daong ka rahra bhap bini ilamu glao akaok ngak mbang jeng ye uak drei tagok truh kathaot. Dalau di nyu brei dakwah, pathau khan, pambak kaotin hu brei salih cambac dalam rahra.

Di xã Thạnh Hóa, bruk jao phun usaha daong brei ngak mbang ka urang kumei hu Kapul Pahasa Kumei xã peih ngak piah daong ka urang daok kan tame bac magru. Yaok urang Kumei daok dalam kapul hu brei daong meng 1,5-5 triệu đồng piah ngak phun blei salih, ngak jeng kaya kan ndap nda, patagok bruk ngak lagaih tui sang danaok rup di drei. Khao tin ieu lac baoh kadha praong brei ka bruk patagok, xã Thạnh Hóa ngak jeng ye daok ngak brei parao jalan khao tin, majam khao tin, padang majam ba bruk jaik taphia rah ra bhap bini. Meng majam kao tin nan, ralo khaotin brei ka bruk masraiy jien phun kein lagaih, danak dak pato magruk bruk ngak, daong brei ka bruk ngak mbang, sarak karja brei ka bảo hiểm y tế, bảo hiểm xã hội rahra,… tal bruk ngak mayao mayit karja meng khaotin tapak jeng hu urang jakar jeng ye kapul nyom jao ba tal bhap bini rahra patut panak mbuan si thau paham.

Mada mboh, di angaok jalan patrun kathaot, bruk chul khang bruk ngak patrun kathaot ka gah kurang khao tin jeng ye paglaong ilamu dui mek kkhao tin. Gam tui di nan, bruk daong brei thau dom mayao mayit brei ka y tế, pato magru, dakwah hukum jeng ye brei ka gah jien ndo daong ka urang kathaot, urang jaik kathaot. Dom bruk kham marat ini jeng nao tal padang bruk ngak mbang karo kajap, daong urang kan sanang mbuan duah bruk ngak mbang, peih praong bruk ngak mbang blei salih, jeng ye pambuak praong darak pasar siam lagaih jak jeng jang.

Tui ong Mã Thanh Điền, Phó Chủ tịch UBND xã Thạnh Hóa, taong abih urang dalam xã urak ini hu 18 baoh sang kathaot dan saong 106 baoh sang jaik taphia kathaot. Karja palei ieik ini lac njauk caik hatai dalam nan hu urang biak kathaot, urang jaik taphia kathaot, baoh sang urang barau truh kathaot,… mek hu khaotin siam lagaih piah duh ka bruk ngak mbang, patagok raidiuk, patruh ieik kathaot, bac magru, y tế jeng ye ngak njauk tui hukum,… piah daong pasalih barau rai diuk.

Kadha praong glaong abih di patrun kurang kathaot khao tin brei ka bhap bini ieu lac sa jalan jao brei ka bhap bini jalan patagok bruk ngak mbang ka rup eng drei. Bien halei bhap bini paham thau cambac khaotin, jie jeng ye ngak po khaotin hu, bhap bini meng taeng drei uak tagok truh kathaot, ngak kaya mada karo kajap. Kayua yau nan ye ptrun kathaot khaotin yau ye baoh “baoh catua” peih bah mbang tal bruk padang baoh sang trei sil, haniem phol selamat atah dhua.

Masa meng anak, karja palei daok ba khaotin nao tal bhap bini rahra brei pamadeih hatai kham marat tame bruk ngak mbang truh kathaot jeng ye bruk pasalih bruk ngak mbang patruh kathaot karo kajap. Pamadeih glao akaok saneng, tangung jawap rup drei di urang jakar, bhap bini jeng ye taong abih rahra bhap bini brei ka bruk truh eik kathaot, sa tangin hatai saong gauk tame bruk jammaah rah ra bhap bini./.