Sa bruk ngak praong dalam hu Kapol Urang kumei huyen Thuan Chau (klak) pambuak kajap haong gah Y te Son La peih ngak di grauk 23 xã biak kan kandah. Ngak tui jalan “bruk pathau khan dahlau, daong tui hadei”, dom urang jakar di kapol urang kumei song y te  tame tal yaok mbon palei, kham jak ba, ngak brei salih “jalan sahaneng, bruk ngak”. Muk Lường Thị Thanh Thủy, Pho Bí thư Đảng ủy xã Thuận Châu, dahau diah lac Akok Kapol Urang kumei huyện Thuận Châu (klak) khan lac, paok jien daong ka urang ndih tapui anek hu siam mekre daong ka urang jakar hoi, urang kumei  saong abih di nyu lac dom urang kumei bangsa takik. Meng nan, dom urang kumei bangsa takik hu mbang tui sarak nan biak ralo kuhria meng thun 2021.

“Peih bruk daong ndih tapui hu salamat ka urang kumei bangsa takik di danak dak 8 tui danak dak pakat negar patagok kinh te xa hoi bhum urang bangsa takik saong bhum ceik vaktu ka 1 (2021-2025). Kapol urang kumei huyen Thuan Chau ba tabiak jalan ngak cambaic laic  dom kadha saong dom bruk dalam paok daong ka ndih tapui nan tal dom kapol nyaom, abih di nyu nan lac dom urang jakar hoi kumei lac urang hu daong tapak meng sarak ini. Hu yau nan, adei sa-ai kumei bangsa takik  hu mbang tui sarak nan biak ralo”.

Piah ngak hu siam lagaih, Kapol Urang kumei huyen Thuan Chau ( klak) peih tal pasram paglong prein ngak bruk. Kapol pambuak haong gah y te peih tal pasram patia. Urang hu mbaok tame lac urang jakar kumei saong urang jakar y te pakat xa, dom urang ngak bruk daong ka kapol nyaom di bhum palei.

 Yeng tui panuac amuk Lường Thị Thanh Thủy, Pho Bí thư Đảng ủy xã Thuan Chau, meng thun 2021 tal abih thun 2024, huyen Thuan Chau (klak) hu daong labaih 1.600 urang kumei bangsa takik ka bruk ndih tapui hu siam mekre. Kuhria abih jien bayar ka dom urang ngak amaik tagok tal 2 ti 400 trieu dong. Ini lac sa dalam dom bhum palei hu ralo urang bangsa takik ngak amaik hu daong ndik patui anek ralo abih di tinh Son La.

“ Dahlau tuk peih ngak paok daong nan ( dahlau thun 2021), urang bangsa takik  hu dut iek metian anek saong ndih tapui anek di balai y te daok biar, tok hu labaih 600 urang amaik yaok thun. Min, tok hadei labaih 3 thun peih ngak, labaih 1.000 urang kumei hu taduan saong mai ndih tapui anek di bala y te. Meng nan, iek glang prein yawa urang ngak amaik saong uranaih hu patagok siam, dom urang ngak amaik metai tuk ndih tapui trun ralo, kuman birau ndih tapui jeng hu trun ralo.”

Dom bruk ngak hu nan lac bruk hu makna praong piah Kapol Urang kumei Thuan Chau  pok tagok Trung uong, tinh saong dom gah chuc nang patui veik bruk peih bei paok daong dalam vaktu ka 2 meng ini tal thun 2030, piah daong veik ka urang kumei bangsa takik di tinh.

Jaik 2 ti 500 trieu dong hu peih brei, 1.084 urang kumei di Thuan Chau hu daong tapak. Sa-ai Lò Thị Hồng sa urang kumei bangsa Thai khan lac: 

“Dahlau diah khol dahlak huac mai bala iek ruak, gam oh hu jien. Urak ini urang jakar mai tal sang jak ba, blaoh daok hu daong jien mbang huak, jien radaih nao mai, khol dahlak mboh sahanang hatai. Anek drei ndih tapui tabiak khang kajap lac uan tabuan ye”.

Bruk salih birau kuhria mboh tapa taka so cambaic laic. Meyah thun 2021, dalam huyen hu tal 327 mbang urang ndih tapui anek di sang, ye tal thun 2023 - 2024, hu trun ralo. Dom urang kumei hu mai pasang iek metian yaok bilan saong ndih tapui anek hu urang gah y te daong tagok rilo jang. Danak dak 8 oh lac  ba prein khang mai ka bhum kan kandah, bo daok hu makna praong jang, ba mai ilamo, ngak brei salih jalan sahaneng saong jao brei salamat ka dom urang ngak amaik di bhum glong, rik tame daong padang ka rairah harei hadei hu khang kajap saong sumu gauk jang./.