Tui hatai caong khin padang bruk ngak mbang karo kajap, parilo bruk ngak tabiak, parilo jien mek tame dalam saong brei daong pasiam raidiuk, baoh sang amuk Nguyễn Thị Trang, urang daok di puk B1, xa Tân Long, ban raya Can Tho, hu bhum palei daong maong iek, daong thau pandar halau phun jien mesraiy meng Gilang Pariak Sarak karja rahra. Meng phun jien mesraiy, sang amuk kein lagaih buh jien tame blei anek pajaih, ngak var ro, dak harei dak padang ngak hu sa bruk raong pabe, peih tabiak jalan patagok ngak mbang bahrau.

Amuk Trang brei thau, meng 5 drei pajaih akaok meti, tal ini tapol pabe di dalam sang tagok hu 15 drei. Dalam nan, 5 drei ine daok metian, brei kein lagaih piah baoh sang patui peih praong tapol dalam tukvak anak tal.

“Labaih sa thun sangka iek glang ine pabaiy hu brei manek mbang akaok meti. Urak ini labaih dua thun ye tagok sa pluh dom drei dalam var blaoh. Dahlak mboh pabe paralo siam. Dahlau diah, langiu di bruk hamu taneh ye daok lahei rilo, urak ini drei cakak hareik, sangka pabe. Raong glang pabe oh lahik rilo prein sangka; klau harei rao pahacih ro war sa mbang, bruk ngak rilo di nyu hu meng lac nao cakak hareik ka pabe mbang.”

Baoh sang ong Lâm Thương, daok di puk 1, xa Tân Long, lac sa dalam dom baoh sang pandar siam lagaih phun jien mesraiy ini. Ong Thương brei thau, meng phun jien 50 trieu dong mesraiy di Gilang Pariak Sarak karja rahra, baoh sang buh jien tame blei dua drei pabui nac piah menek. Pabui anek hu dom, sang di gait brei khik raong pabui ine. Tal ini, tapol pabui di sang tagok hu 5 drei pabui nac, yaok mbang manek pablei tabiak labaih 30 drei pabui mek ralo. Klah rabha ka kein laba di bruk raong, ong thương ndom meyai lac:

“Yaok mbang ye baoh sang pablei labaih 2 tan pabui ralo. Meyah kaoh abih jien buh tabiak, yau ye drei nac ine hu yaom labaih 1,5 trieu dong sa drei (baoh sang ta-eng pabak), blaoh jien kaya mbang ini diah, tuh kaoh abih ye drei hu laba meng 1,7 tal 2 trieu dong sa drei.”

Piah halau phun jien glaong siam lagaih, langiu bruk brei kein lagaih ka rahra hu mesraiy phun jien, dom kapul, ndoan the di labik daok pambuak pathau khan, tacei ba urang dalam kapul pandar phun jien njauk bruk, ruah bruk ngak njauk lagaih saong paglaong siam lagaih phun jien. Tapa di nan, daong paglaong ilamo thau ka bruk di urang masraiy, patakik bruk pandar phun jien oh njauk bruk, gam haong nan brei kein lagaih piah rahra patagok kinh te karo kajap.

Ong Thạch Hương, Phaok Akaok UB MT Negar Viet Nam, Akaok Kapul Urang ngak nong xa Tân Long, ban raya Can Tho, brei thau:

“Tukvak mai meng anak daok tal brei daok pasang duah, taong yaom. Gam saong dom bruk ba mai siam lagaih ralo, Kapul Urang ngak nong xa brei ndom biai haong dom pakat dang akaok patagok, peih praong piah rahra hu phun jien patagok bruk ngak mbang, paglaong siam lagaih saong pabak hatai caong di mikva dalam tukvak anak tal.”

Meda mboh, jien mesraiy tui sarak daok daong hu makna dalam bruk ngak jalan patrun kathaot, khik kajap an sinh xa hoi saong padang palei pala dak harei dak patagok. Hu bruk daong di Gilang Pariak Sarak karja rahra gam haong bruk pambuak di karja saong dom kapul ndoan the, phun jien laba lap patui veik lac jalan langyah lagaih, daong urang ngak nong hu halau prein patagok kinh te, parilo jien mek tame saong tani tanat saron mbon dalam raidiuk./.