Dom harei ini, palei Kim Môn, xa Chư A Thai, tinh Gia Lai chreih chrai ndom klao gam haong sap jamraik ngak jalan pambuak palei daok hu peih praong 8m. Bruk ngak samar drah, chreih chrai pambak grauk bhum palei tuk mikva gam daong prein ngak jalan bahrau praong laneing lanoi, hacih sa-at, lagaih jang ka bruk nao mai, pajeng ba kaya nong saong kaya karei.

Piah danak dak samar drah salah blaoh, rilo baoh sang hu halan tian kadun talei paga, alin taneh. Baoh sang ong Phạm Văn Hùng lac sa dalam dom baoh sang ba drei ngak dahlau, taoh talaih taong abih paga, alin labaih 74 m² taneh. Dalam baoh sang ndih jaik jalan daok peih praong, ong Hùng brei thau hatai bui sambai tuk mboh bhum palei dak harei dak salih bahrau:

 “Baoh sang dahlak hulin alin taneh meng tapen jalan klak tame mblang sang lac 3m, khol dahlak hulin njauk hatai haong Karjan gak jalan piah hacih sa-at palei pala, jalan mbak lagaih taong abih, pajeng ba kaya nong jeng lagaih ka rahra. Rahra vil taom dan njauk hatai abih piah alin taneh gam haong Karja ngak”.

Bruk lagaih meng bruk alin taneh ngak jalan jeng mai meng raidiuk di rahra hu daok suai lavik thun ngan haong dom jalan pambuak bhum palei katial ganik, hu ngak meng lavik mai. Dahlau diah, tame bilan yuak kuak, radaih pajeng ba oh tame hu tal labik piah pataom blei kaya ngak nong kayua jalan sit, rilo jalan oh daok kajap. Rahra brei pajeng padai, habei bhong tabiak jalan Tinh lo 662B piah pablei ka gah ikak kaiy. Ong Đỗ Văn Lời, Bi thu Chi bo haong Akaok palei Kim Môn, xa Chư A Thai, tinh Gia Lai brei thau, tuk bruk peih praong jalan hu tame ngak, dom baoh sang jeng samar drah ngak tui.

“Pato tacei di pakat angaok ka bruk peih praong saong alin taneh ngak jalan palei pala ye hu lagaih ka rahra, mikva sa hatai haong jalan sahaneng lac ngak ka drei nao lac drei hu lagaih, kein lagaih di rahra hu mbang tui jeng biak praong”.

Ong Phạm Văn Lượng, Phaok Bi thu Ndang uy, Akaok UB Bhap bini xa Chư A Thai, tinh Gia Lai brei thau, xa daok peih ngak veik 7 jalan bahrau saong taduan hu bruk njauk hatai glaong di rahra.

“Peih ngak dom jalan hu taduan hu bruk njauk hatai glaong di rahra dalam bhum palei, daong karja peih ngak samar dom danak dak. Dalam luac jalan peih ngak khol dahlak hulin hu padang kapul jak ba pathau khan bruk peih paha taneh saong padang kapul jak ba pathau khan, sa majam chinh tri di dom palei tame mbang jak ba pathau khan ka mikva ngak tui mbang jak ba alin taneh ngak jalan”.

Meng dom banah taneh rahra bhap bini hu halan tian alin brei, dom jalan bahrau di xa Chư A Thai, tinh Gia Lai daok ngak. Jalan praong jang, bruk nao mai saong pajeng ba ndap nda kaya ngak nong jeng hu lagaih jang. Bruk ngak hu praong abih nan lac yaok jalan nan, hu bruk njauk hatai di rahra gam haong karja palei dalam luac jalan padang palei pala dak harei dak gheih ghang siam mekre./.