Sa-ai Nguyễn Thị Lan, sang daok di phuong Long Thanh (xa Long Thành klak) klah rabha brei thau, baoh sang di sa-ai hu rilo thun gam oh ngak hu bruk pabak brei harak brei pandar taneh kayua kurang rilo harak gar gah taneh riya. Meng di harei rajaei dua pakat nao tame pandar, sa-ai patui veik pambuak bruk haong puk palei saong jabat karja piah hu tacei pato. Di Pasak duh Harak ba-ar karja phuong Long Thanh, sa-ai hu urang di ini tacei pato biak cambaih laih, mbuan thau piah ka sa-ai ngak salah blaoh harak ba-ar. Sa-ai Lan ndom mayai lac:

 "Rilo mbang nao tal UBND xa piah ngak harak taneh riya, min gah taduan mek harak gar javap lac taneh oh ginup taka mblang taneh nan ye oh ngak hu. Hadei di rilo mbang nao mai, dahlak gilac hu urang jakar tacei pato biak cambaih laih saong hu ngak blaoh harak ba-ar piah cang pabak brei harak taneh. Dahlak mboh biak bui sambai, urang jakar di ini thei jeng abih hatung hatai".

Hadei di tuk ba pataom, Thanh uy Ndong Nai hu tabiak danak dak bruk tacei pato peih ngak ba pandar, bruk ngak di karja dua pakat, parabha cambaih laih bruk ngak ka yaok urang dalam Mban Thuong vu, Mban Chap hanh Ndang mbo tui iek tapak, tacei pato, pasang iek, pachreih peih ngak bruk ngak di karja dua pakat piah samar tacei pato, langyah dom kadha cuang kandah, tavak tave bahrau tamuh.

Tui amuk Nguyễn Thị Thanh Thảo, Phaok Akaok Pasak duh harak gar karja ban Ndong Nai, hadei di tuk taduan mek dom sarak ba tabiak di Thanh uy, UBND ban ka bruk parabha, ba bruk brei ka jarka di pasak tui jalan ngak “kayua bruk ngak bo ba caik urang”. Oh brei tamuh tabiak dom bruk lon tondalam bruk parabha, ba brei bruk ngak, yaih kan urang jarka saong peih ngak bruk ngak karja:

"Dom urang jakar hu ba nao ngak di Pasak duh harak ba-ar karja ye njauk hu ilamu, pabak hu hatai caong khin di bhap bani saong urang pablei salih tuk mai ngak harak ba-ar jit vu. Ngak harak ba-ar karja ye njauk bui sambaih haong bhap bani, urang pablei salih, abih hatung hatai saong njauk adat hukum di urang jakar tuk peih ngak dom harak ba-ar karja".

Langiu di dom baoh jeng siam mekre mek hu, tui pasang iek di pakat ala di ban Ndong Nai brei mboh jeng daok dom cuang kandah yau bruk parabha, brei pakat dalam bruk khik iek urang jarka oh ka cambaih laih, urang pal akaok saong urang jakar ngak chuyen mon di dom labik oh ka hu ba caik ginup abih bruk ngak, rilo bruk ngak bahrau, oh ka hu rilo ilamu.

Amuk Phạm Thị Loan, Duk ngak harak taneh riya ban Ndong Nai klah rabha, yaom lac bruk ngak biak rilo, kateik prein catang, min kapul nyaom urang jakar labik ini thei jeng kham merat bac megru, gul pataom gauk piah ngak siam bruk ngak di drei:

"Tukvak masa akaok mereip ye khaol dahlak daok karung karang, yau nan min hu bruk sangka di pakat angaok mai blei buh tame ralo jang ndap nda jamriak, manuac urang... mai meng nan dak harei dak kham merat, ngak siam dom harak ba-ar piah brei ka bhap bani saong urang pablei salih, oh daok kan kandah yau dahlau diah".

Tal harei ini, kapul nyom karja urang jakar ngak bruk di ban Ndong Nai hu ramik veik daok takik, patrun akaok bruk, urang khik iek; jalan saneng urang jakar mboh khang kajap jang, grap tanat hahuan mblo dalam bruk tacei pato, ba ngak, rik daong paglaong baoh jeng siam mekre bruk khik iek karja, patrun jien ndo ngak harak ba-ar karja... taong abih brei ka kein laba di taong abih saong ba caik kein laba di bhap bani tagok dahlau di abih./.