Trun di papan taduan harak gal taneh riya di Pasak duh bruk karja di xa An Lão, tinh Gia Lai ngan haong harak pagun bayar bruk ngak hu dalam tangin, ong Trương Văn Chín daok di palei Tân Lập biak njauk hatai. Ong mai ngak harak gal neh calah mblang hamu piah alin ka baoh sang anek likei meeteh. Meng akaok meti sahaneng harak gal nyu srau kadau, brei nao rilo labik, min tuk mai tal pasak, ong Chín hu urang jakar tacei ba cambaih laih piah pabak veik harak gal. Ong Chín chreih chrai tuk harak gal hu taduan saong bayar bruk ngak hu di sa akaok.

“Dahlak tagok harak gal neh calah taneh. Urang jakar ndom mayai lac daok kurang dom harak gal, drei mai ngak ginup. Harei ini tagok, urang jakar patui veik ngak bruk. Dom urang nan tacei ba ka drei biak tani tanat”.

Oh sa janih langyah jaik abih harak gal karja ka rahra, karja xa, Phuong di Gia Lai daok hu rabha pakat tanggung jawap dalam rilo gah yau ye gah padang, jien padai, gah ngak nong, alam moi truong. Meng di nan, rilo bhum palei hu srap gap ngak dom bruk dahlau diah hu maong yau lac kan, yau ye dui pachreih gah buh jien tame atau tapak peih paha mbaok taneh meng dom danak dak praong di tinh. Di xa Ia Le, ong Đăng Lê Minh, Phaok Akaok UB Bhap bini xa brei thau tok hade isa thun peih ngak bruk bahrau, hu dui pachreih labaih 10.000 ti dong phun jien buh tame, bruk ngak jeng biak lagaih siam dut haong dom thun dahlau:

“Urak ini, xa hu 31 danak dak urang ngak mbang pablei salih sangka duah thau. Dalam nan hu 18 danak dak hu brei jalan buh jien tame, daok di thun 2016 hu 13 danak dak. Dom danak dak daok hu peih ngak. Tukvak anak tal, xa brei patui veik pambuak haong dom so, dom gah di tinh ieu veik dom danak dak, peih ngak siam jang kein lagaih.”

Di pakat tinh, gam tui caong khin dui katut panak 25% tukvak ngak danak dak saong patrun meteh tukvak langyah harak gal buh jien tame. Gia Lai daok danei tagok yau bruk krah hadah dui pachreih buh jien tame di bhum Kreh negar – Tay Nguyen. Daok di Nyaom biai jhul tagok bruk buh jien tame rah tabiak di bilan 3 meng blaoh, tinh Gia Lai hu mbaoh tangin ka jalan buh jien tame saong mbaoh tangin harak gal kanal hadar ka taong abih 273 danak dak, hu taong abih phun jien tut angan saong kuhria tagok tal 850.000 ti dong (labaih 33 ti USD). Dalam nan, 144 danak dak taduan bruk mbaoh tangin ka jalan buh jien tame ngan haong phun jien labaih 230.000 ti dong.

Ong Phạm Anh Tuấn, Akaok UB Bhap bini tinh Gia Lai brei thau: bhum palei daok pataom tame taoh talaih dom kan kandah, tavak tavaiy gam saong hatai sahaneng ngak habar piah duh ka rahra siam jang, patagok kinh te samar jang:

“Dua asal kadha praong lac duh ka rahra saong patagok bruk ngak mbang. Ini lac asal kadha suluruh jalan dhuan di karja. Saong tuk ngak hu bruk ini blaoh ye bruk an sinh xa hoi biak lagaih saong hu meda blaoh ye bruk khik kajap an ninh siam mekre lagaih rilo. Ka dua lac ilamo ngak bruk karja, brei ngak njauk bruk buh abih hatai tian, ngak tasak bruk ka bhum taneh ini, bhum palei ini saong brei mboh lac ngak abih bruk, oh njauk ngak abih tuk”.

Hadei sa thun ba tame ngak, bruk karja palei 2 pakat di tinh Gia Lai jeng daok rilo bruk brei njauk daok patui ngak. Min meng bruk lagaih akaok meti daok ngak jeng hatai je dak harei dak praong di rahra saong gah ngak mbang pablei salih ka sa bruk ngak karja drah samar jang, jaik rahra jang, siam lagaih jang./.