Yaom mada daok di bhum palei atah bayah, min tapi di dom harei ini, Pasak Duh di Jabat karja xa Thạnh Phú biak sahameng. Bhap bini rahra mai tal ini brei lang yah bruk kadha harak gal hu urang jakar daong ba bih tih hatai, harak gal hu taduan, hu lang yah tapak buh, oh daok hu thei njauk nao atah yaok pluh mbaik kilomet yau dalau. Urang bahrau buh blaoh harak gal hồ sơ, muk Đoàn Thị Thu, bhap bini rahra di palei Mỹ Thới, xa Thạnh Phú, mboh biak bak hatai lac:

“Harak gal di dahlak bahrau hu taduan mek, daok cang urang mbaoh tangin, mada biar harei atau page mada blaoh. Akau dahlak mboh adei sa-ai di ini biak bui sambai, ba abih hatai jai, tui dahlak akau biak sahnang hatai tuk mai ini. Rai diuk baoh sang ye karo, dahlak hulin praong thun yau nan ye kuhria sa janih raong pabui, sang danaok ganap mbang gap ngui cuk”.

Xa Thạnh Phú hu brei pagam saong xa Phú Cường dan saong xa Thạnh Lộc. Hadei di nan, majam politik dak yam dak sampurna, ngak bruk karo kajap. Yaok harei, Pasak taduon meng 40 tal 50 harak gal di bhap bini, dom lang yah ngak hu meng 97 tal 98%. Tui jalan “abih bruk oh lac abih tukwak”, jakar, urang pan bruk karja ba abih hatai ngak ralo tukwak piah lang yah ka blaoh hark gal brei ka bhap bini. Ong Nguyễn Anh Tuấn, Yam ndok Pasak Duh di Jabat karja xa Thạnh Phú, brei thau lac:

 “Khol dahlak kham marat ngak siam bruk hik di drei, taduan harak gal hồ sơ, lang yah njauk tui danak dak gigak, njauk tui pato tacei di angaok, dil samu, hacih saat, kham marat lang ka ba blaoh, oh brei harak gal nyu daok kandaong jeng ye paatah paguan sinya. Pasak jeng hu bruk ba gigak danak dak harak gal jabat karja trun palei duh daong ka dom urang kan daman. Bhian mboh di nyu hu di harei necar, urang jakar trun palei brei duh lang yah haral gal, tui hatai kham marat brei paka blaoh bruk hik di pakat angaok jao brei”.

Hadei di pagam jabat karja, xa Thạnh Phú hu 11 palei, ralo labaih 6.500 baoh sang rahra gam saong labaih 28.300 pabah mbang. Ngak mbang Kinh te palei pambak pagam tame bruk ngak hamu taneh, raong glang saong pala drak. Dalam nan, phun tamakai tamuh yut cuai gam saong bhum taneh Thạnh Phú meng dom pluh thun blaoh. Meng bruk kham marat tari tariang di urang bhap bini gam saong hu jalan pan akaok pato tacei di pakat ủy, karja palei, rai diuk kinh te - xa hoi di Thạnh Phú daok hu dom salih barau siam makre. Taong abih dalam xa tok daok 39 baoh sang kathaot, daok 0,61%. Di bhum palei hu 65 urang ngak mbang blei salih, sang ngak tabiak ndap nda kaya kan dan saong 1 HTX kaya kan ngak nong hacih saat daok karo. Mada lac sa baoh xa bhum atah bayah min dom baoh sang urang palei daok pandar hu ia hacih saat tui tanut pakat nagar jaik si abih angaok 99% urang baoh sang; pandar gom ndien yau ye jaik si abih 100%.

Di angaok jalan palei Thạnh Phú harei ini, biak mbuan si mboh mbaok mata di sa baoh bhum palei hu ralo salih bahrau. Jalan nao mai hu pasiam hu pok glaong, jaln mbak sang danaok gom hadah darak pasar dak harei dak mboh hu sampurna, daong siam jang tui hatai caong khin brei ka bruk nao mai jeng ye brei ka bruk pajeng ndap nda kaya kan di rahra bhap bini.

Min, bhum palei jeng daok ralo kan kandah, ralo abih mboh manuac urang jeng ye kaya ngui brei ka bruk padang ha tang jeng daok kurang. Ong Huỳnh Văn Toàn, Phaok Akaok UB Bhap bini xa Thạnh Phú, brei thau lac:

 “Xa jeng daok pok lakau tagok UB Bhap bini pakat tinh patui bruk iek glang, parabha prein yawa jien ndo manuac urang daong patagok ha tang palei. UB Bhap bini xa pok lakau dom danak dak pasak asal praong piah daong prein patagok yau ye jalan Nam kênh Hai Hạt, Nam kênh Kháng Chiến dan jalan Huyen 600 dui atah, gam tui yaom jien buh tame ngak labaih kurang 350 ty dong”.

Meng bruk lang yah brei ka harak gal karja tapak di palei tal dom bruk salih bahrau dalam bruk ngak mbang ngak tabiak ndap nda kaya kan, rai diuk dan saong ha tang, Thạnh Phú daok mboh prein hadiuk bahrau hadei di tuk ngak tui bruk karja palei 2 pakat. Urang jakar dan saong bhap bini rahra xã Thạnh Phú daok ba abih prein yawa tabiak brei ka bruk pakacah gauk ngak mbang, dak tuk dak yam roh duah prein yawa yaom kom ginup mada kaya angui kein lagaih, ba abih hatai jai padang bhum palei atah bayah dak harei ka kaya mada siam makre gheih ghang, ilamu./.