Ong Rơ Lan Lết, daok di palei Klăh, xa Ia Mơ, tinh Gia Lai hu dua urang anek daok tui bac danak dak 2 var/harei di Sang bac Tieu hoc saong THCS Nguyễn Văn Trỗi. Yaok harei, ong brei 4 mbang raong pajeng ba raok anek, daok dom harei jan bruk apuh pakak, dom adei ta-eng juak radaih mai sang huak pandiak jala, biak susah glaih glar.

Kayua yau nan, tuk pang khau tin xa Ia Mơ brei hu buh jien tame jaik 200 ty dong piah padang sang bac gam daok gam bac pambuak pakat, hu ginup aduk bilik bac, bilik chuc nang, labik daok meteh harei, sang mbang huak, mblang me-in gam haong majam ndien, ia saong y te dalam sang bac, ong Lết oh padauk hu bruk bui sambai. Ong jie lac, tuk sang bac bahrau salah blaoh, anek drei hu labik mbang daok tani tanat di sang bac, gam haong nan hu bac megru dalam labik praong laneing lanoi, bahrau jang.

“Ndom ka sang bac, dahlau diah hu paje. Min meng anak tal, karja palei dua pakat buh jien tame ngak sang bac gam daok gam bac ka anek kamuan drai, sang bac bahrau ye biak uan tabuan lo. Mikva biak chreih chrai, biak siam”.

Oh lac amaik ame, gru pato jeng biak chreih chrai. Gru Ngô Văn Vững, Phaok Akaok Sang bac Tieu hoc saong THCS Nguyễn Văn Trỗi, xa Ia Mơ brei thau, di bhum palei hu rilo sang bac atah tal 18km, ngak ka anek saih bhum atah bayah brei truh tapa jalan atah atau tapa tinh karei piah bac megru. Kayua yau nan, meyah hu sang bac gam daok gam bac pambuak pakat, brei langyah hu bruk khik tani tanat anek saih bac, paglaong asar siam brei ka bruk pato megru:

“Biak bui sambai. Kuhria sang bac hu praong laneing lanoi jang, bahrau, hu ginup ndap nda kaya duh bruk pato, bruk bac, rilo bilik chuc nang bo sang bac daok kurang. Yau nan sang bac hu padang di sa labik. Bruk nan daong paglaong bruk bac megru.”

Gam tui haong xa Ua Mơ, urak ini, UB Bhap bini xa Ia Pusch, tinh Gia Lai jeng hu ruah labik taneh 6ha di palei Goòng, labik lagaih ka jalan mbak, piah caga mbaok taneh ka bruk padang sang bac gam daok gam bac pambuak pakat ka labaih 730 anek saih tieu hoc saong THCS. Danak dak hu 24 bilik bac, 14 bilik mon bac gam haong majam gilang tapuk, bilim langyah ndom meyai ka bruk bac megru, sang bac pahat padhih, labik me-in pahat padhih, sang padeih padei ka gru pato saong ha tang ilamo ky thuat samu gauk.

Tui kuhria, labik tapen negar tinh Gia Lai urak ini hu 9.400 anek saih. Dalam nan hu labaih 50% lac anek kamuan urang bangsa takik. Tui jalan di Mentri Chinh tri hukria tinh Gia Lai brei hu buh jien tame labaih 1.200 ty dong peih ngak di 7 xa tapen negar gah Pei.

Meng di bilan 7 tal ini, UB Bhap bini tinh Gia Lai hu pato tacei So Pato Megru pambuak haong karja palei daok peih bruk roh duah tapak, gam haong nan dom gah pasang iek samar drah salah blaoh harak gar piah srap gap peih ngak. Kuhria, dom danak dak brei hu padang ngak di puac thun 2025. Ong Phạm Anh Tuấn, Phaok Bi thu Tinh uy, Akaok UB Bhap bini tinh Gia Lai pandar dom xa ngak samar chip dom harak gar ka taneh riya saong sang bac brei hu padang peih ngak samar drah aval.

 “Pandar khin caong dom labik, bhum palei peih ngak dom harak gar ka taneh, harak gar jao bruk, dut iek, bayar jien. Anak meta mek taneh ka sang bac gam daok gam bac, ngak tapak di bilan 9 piah bilan 10/2025 ini tuk hu cih thaik thaot di Mentri Padang lac tinh hu ngak capat hadei nan”.

Tui hatai kham merat nan, dom baoh sang bac laneing lanoi, bahrau di bhum tapen negar kan kandah di tinh Gia Lai daok rah rah jeng biak, peih tabiak sa harei hadei bruk bac megru hadah krah ka rairah harei hadei./.