Di mbon palei Sut M’đưng, xa Quảng Phú, tinh Dak Lak dom thun jaik ini, sap caing gilac sameng tagok dalam dom vaktu pataom gauk di bhap bini. Pasamar tukvak daok lahei, kapul adaoh tamia bhap bini di mbon palei khik tani tanat bruk pasram, tuk ye paoh caing, tuk ye yuk talak, adaoh khan akayat. Oh lac me-in ka mikva dalam mbon palei, dalam xa, dom kadha ini daok hu me-in ka tuai damuai jirah rivang, atau me-in di angaok mblang adaoh tamia dom mbang pakacah. Tui amuk H Riết Êban, Akaok mbon palei Sut M’đưng, oh lac sap yava di harei raya, kong caing urak ini jeng sa talei tambuak dom rai rah dalam mbon palei.

 “Dom urang nghe nhan saong dom adei ye dak harei dak kham merat jang. Gah iek glang jeng yau kapul urang nghe nhan ye jeng kham merat daong gauk piah ka dom adei mboh hu hatai bui sambai tuk pasram paoh caing, ngak jeng bruk bui sambai, siam mekre piah ka dom adei mbuan thau jang”. 

Gam haong mbon palei Sut M’đưng, rilo mbon palei di Dak Lak daok dak harei dak pasiam labik ilamo bangsa, meng bruk paoh kong caing, ragam ragu bangsa, tal pamedeih raya adat saong dom danak dak dalam bhap bini. Dalam tinh khik tani tanat bruk ngak ilamo bhap bini di phuong xa, hu yaok rituh mbang urang nghe nhan, urang thau tani tanat ilamo bangsa tapak ba drei tame pato ka rairah dam dara.

Di xa Ea Súp (daok dalam huyen tapen negar Ea Sup dahlau diah), kapul kong caing mbon palei Ea Súp hu padang labaih 10 thun. Meng bruk tok jaik 10 urang meng camreip, tal ini kalup kapul dui pachreih rilo rahra ba drei tame, dalam nan hu rilo dam dara. Nghe nhan Niê Khăm Ta, Dang akaok kapul brei thau, gam haong bruk sangka di dom pakat, dom gah, bruk pato bruk ngak dak harei dak hu khik sampurna tani tanat.

“Meng thun 2024, hu So Ilamo jeng yau Jabat Ilamo saong karja palei sangka peih tal pato ka dom adei sit. Urak ini, dalam kapul hu ba tame dom urang nan. Dom urang hu tagok tal 46 urang, dalam nan, urang praong thun di abih ndih tapui di thun 1949 saong urang sit thun di abih ndih tapui di thun 2015. Abih di nyu nan lac hu sa kapul caing sit ka kalup kapul, tuk halei jeng khik tani tanat dom danak dak kong caing, ilamo”

Ong Nguyễn Lê Vũ, Phaok yam ndok So Ilamo, Pahat padhih saong Jirah rivang tinh Dak Lak brei thau lac, bruk ngak ini daong ilamo hu khik ramik di dalam raidiuk, dalam bruk daok dang bhian harei di rahra. Gam haong nan peih tabiak jalan nao bahrau piah ilamo jeng sa kein lagaih piah tagok prein manuac urang.

“Jeng khik tani tanat bruk ini yau sa bruk daok dang bhian yaok thun piah ka dom urang nghe nhan, dom rairah sit meda hu me-in, bac megru, jeng yau pato dom ilamo drap ar di rairah dahlau, pato veik ka rairah hadei. Pamedeih veik sa labik ilamo kong caing piah ka dom kapul me-in hu di dom adat cambat jeng yau dom bruk me-in paoh kong caing dalam bhap bini bo dom urang nghe nhan diukrai”.

Meng dom danak dak bruk ngak nan, apui ilamo daok hu patui veik nao tame dom rairah raidiuk dam dara, rairah sit thun umo di dom mbon palei. Dalam kapul caing di mbon palei Blôk, xa Quảng Phú, adei Y Rô Lăng Kriêng, umo 11 thun lac sa dalam dom urang sit thun umo abih. Hadei tukvak bac megru, adei tui dom urang nghe nhan pasram ragam ragu, pasram paoh caing. Tui adei, sap yava ragam ragu bangsa jeng sa janih takre meng biak aval.

“Ame pato anek me-in capi T’rưng, me-in ragam ragu, caing kreim. Anek chreih takre T’rưng hlai ragam. Anek khin jeng sa nghe nhan me-in T’rưng nan anek pasram hadei tukvak bac megru saong kham merat pasram haong dom sa-ai”.

Meng dom danak dak di mbon palei, ilamo hu khik ramik saong pato ka rairah sit thun umo. Ngan haong bruk dui khik di bhap bini, rairah sit thun umo duah mboh bruk mboh hadah mbaok meta dalam drap ar bhap bini saong patui veik pambak tabiak dom ilamo siam gheih. Ini lac sa janih kein lagaih piah ka ilamo dom bangsa di tinh Dak Lak hu brei khik ramik saong patagok karo kajap./.