Labaih meteh rai manuac ndam gam haong daneng menyim, Urang gheih tangin angan H’Nir daok di bon Ka La Dơng, xa Quang Khe, hu mong yau “urang khik apui” brei ka bruk menyim jih dalah meng kan di urang bangsa Ma daok di gah Pai tinh Lam Ndong. Bruk pok angan je brei ka mikva oh lac sa janih urang gheih tangin, blaoh daok ieu lac sa bruk abih hatung hatai dalam khik ramik saong tacei pato bruk ngak.

Tui amuk H’Nir, menyim jih dalah oh mbuan lac bruk ngak meng kan blaoh daok ieu lac bruk ngak ilamo bangsa; daok jih dalah nan lac suan sap jiwa ilamo, pambuak pagam haong rai diuk di mikva bhap bani bangsa Ma. Yaok mbang jum pataom, ma-in bhap bani, dom blah khan, blah ao, tanjak, kadhung atau srok hu urang Ma blei pandar ye hu ngak jeng sambo ilamo hadah tanjak.

    Ndam gam saong bruk menyim jih dalah rilo thun, amuk H’Nir hu thau cambaih laih jang ka yaok janih ilamu menyim, yaok bingu hala kan klak, yaok janih sambo ban njaom khan bai. Tui amuk, piah ka hu sa blah jih dalah siam gheih oh lac mbuan, hu blah lahik yaok sa adit, hu blah dui atah yaok bilan. Kayua yau nan ye, yaok janih ndap nda ngak tabiak oh lac tok pambuak pagam di tukvak, pren yava bo daok lac ilamu bhap bani, hu yaom glaong saong hu urang bangsa Ma khik ramik yau drap ar.

      Piah ka bruk menyim jih dalah hu khik ramik, caik rai brei ka harei hadei, Urang gheih tangin Uu tu H’Nir hu buh tabiak rilo tukvak piah tacei pato tacei ka rai rah ranaih. Urang gheih tangin H’Nir klah rabha: Amuk mboh biak bui sambai tuk hu Ndang, Karja sangka, daong piah tacei pato daong ba ka anek taco, piah ka dom adei thau bruk menyim, khik bruk menyim saong oh klak asal ilamo bangsa drei...

      Meyah urang gheih tangin H’Nir khik ramik bruk menyim meng ilamu meng kan saong akaok saneng di urang nao dahlau, ye di phuong Ndong Ya Nghia, rilo urang kamei bangsa Ma daok patui dak dalikan jih dalah tui sa jalan ngak bahrau – pambuak pagam bruk ngak meng kan haong mbang angui saong hatai caong khin di darak pasar. Bruk dak padang To tổ pambuak bruk menyim jih dalah oh lac tok daong ka adei sa-ai hu jien mek tame tani tanat, bo daok ngak brei ka bruk ngak meng kan ralai pagam tame dalam rai diuk bahrau.

          Sa-ai H’Bình urang daok di palei N’Jriêng, Akaok To pambuak bruk gam haong dom dom urang daok dalam to oh lac tok menyim ngak tabiak ndap nda duh ka bruk mbang angui dalam sang, bo daok saneng duah jalan ngak tabiak rilo janih karei yau srok, kadhung, tanjak, suek laghaih haong hatai caong khin di tuai damuai. Meng 8 urang akaok mereip, to pambuak bruk urak ini tagok hu 13 adei sa-ai gam hu mbaok tame, ngan haong yaom jien mek tame kuhria rah tapa labaih 7 trieu ndong yaok urang yaok bilan. Sa-ai H’Bình brei thau: Adei sa-ai gam khik hu ilamo meng kan, gam saneng duah jalan ngak tabiak janih bahrau piah ndap nda jih dalah ngak tabiak hu siam mekre jang, bahrau bahrang jang min jeng khik hu asal ilamo; dom sa-ai caong mong bruk menyim jih dalah meda hu khik ramik saong meyaih khan ndap nda tal tuai damuai atah jaik. 

        Tui amuk Lê Thị Trúc Linh, Phaok akaok So Ilamo – padhih saong rivang ma-in Lam Ndong, tuk bruk menyim jih dalah pambuak pagam haong darak pasar, sambo ilamo  dom bangsa takik ndom harung, bangsa Ma ndom karei meda hu pambak prong jang, hu jeng ndap nda pablei salih biak karei di palei.

        Kayua yau nan ye, bruk khik ramik jih dalah urang bangsa Ma oh lac sa janih brei khik sa bruk ngak meng kan blaoh daok ieu lac sa jalan cak rok patagok khang kajap, pambuak pagam ilamo haong mbang angui, rivang ma-in bhap bani. Dom tal pato pathram, bruk nao gam di gah ilamo gam haong hatung hatai di urang gheih tangin saong bruk saneng duah di rai rah ranaih  dam dara daok ngak jeng takei khang kajap piah ka bruk menyim jih dalah di bangsa Ma hu mbaok miat miat saong bak prein khang dalam rai diuk jaman ini.