Dom harei ini, di mbon palei Bu Ndrung, xã Đắk Ndrung, huyen Đắk Song, tinh Dak Nong, baoh sang bahrau di sa-ai Điểu Phạm Dương, bangsa M’Nông hu salah blaoh. Meng bruk rilo thun nao ngak jang padang sang apah ka urang, sa-ai Dương biak bui sambai dang di anak baoh sang selamat haniem phol di drei, hu padang meng bruk daong di Mentri Kong an saong baoh sang rik pabak tame veik:

“Baoh sang ini hu padang tui jalan sahnang di dahlak hulin, hu taong abih 77m2 taneh. Kreh ging saong bilik tuai hu sa baoh kla, hadei hu jien blei tivi caik di ini. Ging lac labik piah baoh sang tahanek mbang huak. Daok bambang tabiak gah likuk ini, lac piah padang sang pahacih hanjol drei”.

Bhian hu mbaok di dom danak dak brei oh daok baoh sang taik tahak di dalam bhum yau sa “urang pasang iek”, Urang dang akaok mbon palei ong Điểu Khuy, daok di mbon palei Bu Ndrung brei thau, mikva di ini biak gul pataom.

 “Hu Ndang, Karja sangka daong, ye mikva khol dahlak hulin sahnang hatai saong bui sambai. Mikva khol dahlak hulin dalam mbon palei Bu Ndrung ini, tuk hu bruk praong thei jeng mai tanyi sua ravang saong daong biak abih hatai jai. Pagap yau padang sang danaok; thei hu prein ye daong prein, thei hu drap ar ye daong drap ar”.

 Di labik ngak bruk katmang Nâm Nung, huyen Krông Nô, rilo sang taik tahak jeng daok dak harei dak hu salih tapa baoh sang daok laneing lanoi. Sa-ai Y Kram daok di mbon palei Ja Rah brei thau “dalam raidiuk tok padang sang sa mbang, sang hu Karja daong nan brei kham merat padang biak karo kajap”.

“Ngak sang blaoh paje, yaom lac kan kandah min jeng kham merat padang ka kajap khang piah khik kajap ka anek bik hu tani tanat; kayua ngak blaoh ye pandar luac raidiuk. Dahlak hulin kham merat mesraiy jien piah hadei bayar ka adei sa-ai. Baoh sang kan kandah, hu Karja daong 60 trieu dong; adei sa-ai mikva daong, meng hu sang danaok yau ini. Thun blaoh kopi jeng hu yaom, patak pataom dom thun ka meng padang hu yau nan”.

Atah di nan oh hu dom, baoh sang bol lin meng kal dahlau di ong Y Choi daok peih harei uan tabuan tagok tame sang bahrau dalam bruk bui hatai, chreih sambai. Dalam sang danaok praong laneing lanoi ba mbaok nao tapak danao Nâm Nung mat la-an, ong Y Choi brei thau hatai bui sambai di drei.

“Dahlau tuk padang, dahlak hulin daok dalam sang taik tahak meng thun 1989, jaik si jaleih. Hu Karja daong jien padang saong daong dahlak hulin mesraiy jien di gilang pariak tui sarak karja dahlak hulin hu sang danaok praong laneing lanoi kajap yau ini. Baoh sang dahlak hulin biak bui sambai saong chreih chrai dahlak hulin likau thau dhar phol Ndang, Karja biak rilo”.

Meng bruk peih ngak di labik, amuk H’Thương, Phaok akaok UB Bhap bini xa Nâm Nung, huyen Krông Nô brei thau.

"Dahlak hulin mboh meng pakat Nagar Trung uong mbiah tal pakat karja xa, danak dak brei oh daok baoh sang taik tahak biak siam lagaih. Di ini, khol dahlak hulin pasang iek, jhul tagok njauk tukvak, njauk hukum. Thu tuong Rajaei hu maong mboh mikva kurang sang danaok, brei ngak urak ini. Urak ini tal bilan hajan, duh hatai ka rahra, Thu tuong hu pato tacei ngak khik kajap njauk tukvak, piah mikva tame, biak lagaih”.

Thun ini, tinh Dak Nong daong brei oh daok sang taik tahak ka 1.755 baoh sang, dalam nan, dom danak dak pakat Negar daong labaih 1 ribau baoh sang; Danak dak brei oh daok baoh sang taik tahak kayua Thu tuong Rajaei peih ngak lac 540 baoh sang soang danak dak Daong sang daok ka urang daong taneh ia negar lac 145 baoh sang. Mentri Kong an jeng hu daong tinh Dak Nong ka jien padang 500 baoh sang ka rahra./.