Mbau pahe di aia asal la-u, di tapung brah, di hala mbanh seo mbak carak nan lac dom hagait bo khaol dahlak taduan mek hu tuk nao tal Hop tac xa Rivang ma-in ngak nong Con Son (phuong Binh Thuy - Can Tho).

Gam jan van kuhria cagga ka tapung piah tuh har mbanh xeo rilo sambo tui hatai caong khin di tuai damuai, amuk Lâm Thị Ý Thiệm hu ilamu labaih 40 thun ngak har bhap bani – Po bein Thanh Tam khan brei thau: janih har ini biak mek meta saong bingi kayua kanduh har lapih racam, sambo kanjih katam meng kan, asal dalam pahe laman ngan haong hadang – ralo, njaok racam that, mbau pahe aia asal la-u, hala lasun. Min piah salih bahrau jang, abih di nyu lac dalam harei roya ini, amuk ngak brei tabiak rilo kanduh har hu ngak meng ndap nda hu dalam bein:

"Pandar tapung brah, sambo mau ye mengkan mai nan lac pandar tapung lanjik, brei rilo jang sambo bahrau meng bingu ratak mbait, hala kam, hala yek,… brei ka nyu hadah tanjak tagok. Tuai damuai mong mboh ye chreih takre, har ngak tabiak tuai damuai jirah mbang thei jeng pok sap meyaom."

Atah sang urang gheih Ý Thiệm dom baoh, bingi mbau pahe di hala panat, har dak talauk, har kaip par tabiak meng sang bein Ngan Long Home&Camp jeng pachreih hu rilo tuai damuai mbang. Tukvak ini, dom urang gheih jeng kacah gaik ngak bahrau dom baoh har bhian randap yau: har kaip meda hu buh mbluak bingu ratak mbiat… Amuk Nguyễn Thế Ngọc, Urang dang akaok Ngan Long Home&Camp Con Son – Can Tho khan brei thau:

"Kham merat ba tabiak dom ndap nda bahrau, hu ngak bahrau jang piah ka har bhap bani mek meta, taom gaok hu haong tuai damuai rilo jang. Khaol dahlak jeng salih bahrau mbao mbi piah tapaok dom janih har bhap bani, tuai damuai blei ba nao sang ngak ndap mboh bahrau bahrang, mek meta jang."

Meda hu mboh, urang gheih tangin ngak har bhap bani di Can Tho jaik abih hu thun ngak kuhria yaok pluh thun. Yaok harei, dua plak tangin di dom urang gheih oh daok thaoh ngak tabiak yaok pluh janih har karei di gauk. Gam saong dom urang gheih tangin, bruk ngak tabiak har oh lac piah duah jien diuk rai bo daok lac than vak pambuak pagam haong rai diuk.

Mbang akaok meti ba drei tame Harei roya ngak har bhap bani di ban raya Can Tho hadei di tuk ba pagam, urang gheih tangin angan Chín Thủy (daok phuong Long My, tinh Hau Giang klak) jeng daok jan van kuhri kuhria dom ndap nda ka tuai damuai mai rivang iek duah thau ka ilmu ngak har mbong lan asal panaih tukvak harei roya.

Ngan haong janih har ini amuk Chín Thuỷ brei thau khik ilamu ngak har meng tangin piah khik hu asal racam xop, pahe bingi biak karei di har mbong lan meng kan. Har tok hu ngak bahrau di binah asal, ndap nda pandar nan lac panaih Cau Đuc daneiy angan di puk palei ngan haong asal lamen thanh, takik peik, pahe lavik:

"Yaok sa urang hu jalan ngak karei di gauk, ta-eng dahlak ye dahlak dak caik gaok khuon di angaok cuah blaoh am har. Tuk mbang har mboh pahe bingi meng dalam tabiak langiu, har racam abih baoh oh tik lac kanduh sraoh. Har ini mek hu angan 3 patuk OCOP paje, jeng hu angan je lac “Har mbong lan Chin Thuy” yau nan ye jeng hadah mbaok saong kham merat duah jalan ngak ka nyu bahrau jang."

Oh sa janih salih bahrau sambo mau, mui pahe, urang gheih ngak har bhap bani daok tacei pato tal hala tapaok piah pachreih urang blei. Kayua yau nan ye, Harei roya har bhap bani gah meraong oh lac sa bruk ngak ilamo, bo daok lac “yam taphia” brei ka bruk pambak prong bruk oh padeih saneng duah jalan ngak bahrau, meng nan ba tabiak janih har mbuan mbiah yam tabiak angaok dunya./.