Di Jalan atah jaik 2km ba tame mbon palei Bu Sir, xa Quảng Sơn, tinh Lam Dong harei ini praong laneing lanoi, hacih sa-at, pambuak dom sang sron mbon di sambo hijao di phun kophi saong ceik glai. Rahra nao mai, pajeng kaya ngak nong hu lagaih; jalan palei pala hu leaning lanoi, raidiuk dalam mbon palei tani tanat, sron mbon salamat. Amuk H’Thoan, mbon palei Bu Sir brei thau, dalam mbon palei hu daong prein, kaoh alin taneh, padang jalan mbak, min taha palei, akaok palei Y Long hu daong rilo prein abih.

“Dahlau diah ye jalan nao mai biak kan kandah, meng hu ong Y Long nao trun yaok baoh sang jak ba mikva alin hadiah brei taneh, daong prein ngak jalan. Urak ini jalan gheih ghang, radaih oto, moto nduac nao mai lahgaih, drei nao tabak takai jeng hacih sa-at, laneing lanoi”.

Urang Taha palei angan Y Long lac sa dalam labaih 880 urang hu angan je dalam bhap bini urang bangsa takik daok di tinh Lam Dong. Oh sa janih lac jak ban gak jalan, naih gheih dalam bruk ngak mbang, ong daok hu ndap ndom hu makna angan dalam bhap bini, daong pathau khan ka hukum, ba pasiam menuac urang, paglaong bruk gul pataom saong khik sron mbon labik palei pala. Tui ong, piah mikva pang tui saong ngak tui ye dahlau abih rup drei saong baoh sang drei brei ngak kreih camin dahlau piah urang pasang.

“Jak ba mikva ngak jalan ka njauk, oh tui panuac urang ndom, oh pang panuac pacuh padrak ini diah. Oh yah yac oh Pabrai rai… Thau kuria tame bruk ngak mbang. Dahlau abih, drei pato ka anek taco dalam sang drei, diuk anek drei blaoh ka meng ndom urang pang hu”.

Daok di xa Bảo Thuận, taha palei K’Tiếu, palei Duệ jeng lac sa urang hu angan je, hu daong bhap bini bangsa K’Ho palei Duệ khik ramik, patagok ilamo. Lac urang nghe nhan kong caing, ong srap gap pato kong caing ka rai rah dam dara urang sit thun, pathau khan ka rahra tayah klak dom adat oh daok lagaih, gul pataom saong patagok bruk ngak mbang. Meng bruk ngak cambaih laih dalam raidiuk, taha palei K’Tiếu kham merat jak ba mikva daok gul paataom, oh brei ka bruk mesao gauk rah tabiak:

“Drei brei kham merat hu mbaok tame dom mbang nyaom biai piah ngak tui dom jalan ngak, sarak di Ndang saong hukum di Karja, blaoh mai pato ka anek taco dalam sang, ka mbon palei saong but pajaih di drei. Drei jak ba, ba dom jalan, sarak pandar tame raidiuk piah ka dom urang nan thau”.

Meng Quảng Sơn tal Bảo Thuận saong rilo urang bangsa takik karei, kapul hu jaik 900 urang hu angan je daok jeng tatua pambuak di rahra saong pakat uy, karja, Mat tran saong kapul Kong an. Tui bruk thau tanat ka labik bhum saong sap ndom hu makna dalam bhap bini, dom urang nan daong ba jalan ngak, sarak hukum nao tal yaok baoh sang; dil samu thau, ba pasiam menuac urang, jak ba mikva oh ngak chung hukum nagar, oh pang dom panuac pacuh padrak, neh rabha.

Ong Bon Yô Soan, Phaok Akaok Mat tran Negar Viet Nam tinh Lam Dong brei thau, urang hu angan je lac dom urang hu makna dalam kapul rahra, paglaong bruk gul pataom saong padang bhap bini karo salamat meng labik bhum palei.

“Bruk di urang taha palei, dom urang hu angan je naih gheih dalam bhap bini bangsa takik paglaong bruk di drei dalam bruk dak harei dak tayah klak dom adat oh daok lagaih. Njauk ndom mayai di nyu nan lac pathau khan dom jalan ngak, sarak di Ndang, Karja nao tal mikva. Lac urang kreih camin dalam padang bhap bini, padang palei pala, padang labik daok rahra tame adat di palei?"

Sa dalam dom panuac kakei dil samu, sa mbang ba pasiam bahrau rah tabiak atau bruk jak ba mikva oh pang panuac pacuh jeng daong pacang cakak dom bruk srau kadau meng aval drah, meng labik. Meng angan je, bruk naih gheih saong bruk ngak di dom urang taha palei, urang hu angan je, bruk khik an ninh, siam mekre hu pasiam meng bhap bini saong bruk karo salamat hu pabak yaok harei dalam yaok mbon palei di tinh Lam Dong./.