Daong dang ngak hu labaih kurang 200 urang ngak, urang ngak mbang blei salih di ini khik hu karo bruk ngak tui harak dak dalau di urang blei mek ndap nda pablei tabiak pasar darak nagar Amirika Mỹ, Eropa chau Au dan song Autralia gam gam tut tangin blei, daong ka urang po ngak mbang blei salih peih praong bruk ngak mbang.

Piah tui sumu dil masa harei bilan urang dak harak blei ndap nda kaya bahrau, sang mac buh tabiak 2 baoh jamariak majam chik, tui hatai duah mek labaih kurang 300 urang tame ngak. Min, yaom mada ba tabiak ralo kadha khan raok manuac urang tame ngak, dom manuac urang duah hu oh ka ganap tui hatai caong khin. Ong Huỳnh Văn Quang – Yam ndok Sang mac jhik An Phúc, xa Ninh Phước, Khanh Hoa khan brei thau lac:

"Urak ini, harak dak blei ndap nda di công ty biak ralo, ndap nda kaya ngui pablei tabiak darak pasar nagar Amirik Mỹ, Đức dan saong Úc. Piah ganap hatai urang blei, khol dahlak khin caong peih praong bruk ngak, peih duah ralo jang urang ngak. Kongti pambuak saong dom palei jeng ye dom labik pato magru piah duah urang ngak, pabak manuac urang daok ngak, ganap hatai ngak tabiak ndap nda di sang mac."

Piah daong ka urang ngak bruk di bhum palei hu bruk ngak sagat chip, ralo po urang ngak mbang blei salih buh jien tabiak blei jamariak dak di palei pala. Ini jeng ieu lac jalan ngak lagaih, daong ka bhap bini manuac urang pilih ruah bruk ngak, oh nao ngak mbang atah di palei; daong ka po urang ngak mbang blei salih sanang hatai dalam bruk padang halau jung urang ngak hu di labik drei. Ong Ngụy Tấn Minh- Palei Hamu Craok, xa Ninh Phước mboh biak bui sambai tuk hu bruk ngak karo:

"Dahlak ngak kongti ini labaih 5 thun mai dan saong raong anek tame dai hoc blaoh, mboh biak bui hatai. Jien bilan dak harei dak tagok."

Gam saong bruk ngak karo, dom urang ngak mbang blei salih jeng ba tabiak ralo janih pachreih urang ngak yau ye brei jien bilan, jien mayaom, brei harak BHXH jeng ye dom janih daong karei. Urang ngak bruk 8 tuk mek hu jien meng 6 tal 7 trieu dong yaok bilan. Daok urang ngak gheih tangin, ngak bruk lawik thun atau ngak ralo tuk jam jang tui adat brei ye jien mek tame hu tagok glaong jang. Sa-ai Nguyễn Thị Kim Ngoan – Palei Từ Tâm khan brei thau lac meng di tuk tame kongti rai diuk di sang danaok drei karo jang dalau biak ralo:

"Dahlau diah, adei jeng chik menyim di kong ti karei. Hadei di nan adei mai ngak di labik ini. Gam tui yaom jien labaih kurang 6 trieu dong sa bialn, adei mboh karo jeng ye mboh lagaih saong adei daok di bhum urang palei. Langiu di nan, bruk ngak di ini jeng mboh bui sambai adei saai jeng bui be adei jeng mboh sahnang hatai."

Bilan 7 thun 2026 ini, gah menyim chik tinh Khanh Hoa daok mek hu ralo baoh siam makre. Yaom kom pablei tabiak langiu nagar mek hu jaik 130 trieu dolla Mỹ, tagok glaong jang 21% dut tui masa yau thun blaoh. Bruk ini brei mboh lac prein yawa gok gha brei ka bruk ngak mbang, ngak tabiak ndap nda jeng ye naih tuah duah darak pasar di po urang ngak mbang blei salih brei ka jhik mayim dak yam dak tagok. Tapi min ralo sang mac sang ngak bruk daok kurang ralo urang ngak; njauk peih praong bruk ngak tabiak ndap nda kaya ngui min oh ka duah hu ganap urang ngak. Bian halei po urang ngak mbang blei salih, palei pala jeng ye urang ngak duah hu tanut dreih gauk brei ka bruk ngak, brei ka jien mek tame jeng ye bruk gam gam ngak mbang saong gauk dalam masa atah dhua, ye gah chik mayim Khanh Hoa meng hu jeng tali khang brei patagok karo kajap./.