Tui camereip, tapa dom harei pataom mbok, dom bol lin ndon Bien phong Lac Quoi hu ba bruk pathau khan brei ka dom adei sa-ai kamei thau ka dom ilamu brei ka bruk ngak po di bhum taneh, dom adat hukum pambuak pagam tal jalan tapain negar, tame tabiak negar, pacang cakak kon kanjah jak, pacang cakak bruk pablei salih bleik saleik saong tame tabiak negar chung adat hukum.

Hu paglaong akaok saneng, thau cambaih laih bruk ngak di drei dalam bruk khik iek an ninh trat tu karo di jalan tapain negar yau nan ye dom adei sa-ai kumei thei jeng abih hatung hatai hu mbaok tame dom danak dak yau “Urang kamei hu mbaok tame pacang khik bhum taneh po nagar, an ninh jalan taapain negar”,“Nao gam haong urang kamei bhum tapain negar”, atau dom bruk ngak “Kapul nyaom urang kamei ta-eng drei khik iek jalan tapain, ghang karo kajap”,“Baoh sang urang kamei oh ngak chung adat hukum saong dom kanjah jak dalam rah ra” hu peih ngak grauk labik blaoh jabat karja daok khik iek.

Dalam vaktu pasang iek gam haong bol lin tapain nagar dom adei sa-ai kumei hu samar duah mboh saong pabak khao tin pambuak pagam tal dom bruk ngak suan tui adat hukum. Sa-ai Neáng Phương, Akaok Kapul nyaom urang kamei xa Ba Chuc, tinh An Giang brei thau:

"Mai meng baoh jak jeng siam mekre di bruk peih ngak ye adei sa-ai kumei dalam kapul nyaom thei jeng pachreih tui bruk ngak ini saong urak ini kapul nyaom jeng peih prong manuac urang piah hu mbaok tame rik daong pacang khik an ninh jalan tapain ghang jameng, jeng yau khik kajap an ninh chinh tri, bruk sron mbon di bhum tapain negar. "

Hadei di yaok harei brei pasang iek, dom sa-ai caik tabiak tukvak masa nao tal dom balai khik iek tapain negar, tangi sua, pachreih hatai saneng di urang jakar, bol lin daok ngak bruk di ini, duah thau ka rai diuk ilamu daok dang mbang angui di dom adei sa-ai di dom balai khik iek… Rilo danak dak hu makna jeng hu peih ngak rik daong kak catang jang talei gul pataom di bol lin – bhap bani, ngak jeng pren khang dalam bruk pacang khik bhum palei tapain negar.

Trung uy Võ Hoàng Thanh, Akaok kapul nyaom jak ba bhap bani, ndon Bien phong  Lac Quoi, Ban chi huy BĐBP tinh An Giang brei thau:

"Dalam tukvak masa nao pasang iek dom sa-ai kamei tuk halei jeng pachreih khaol dahlak saong daong ka khaol hulin dahlak hu pren khang jang piah pacang khik khang kajap bruk ngak po di bhum taneh tapain negar. Khaol dahlak hulin tuk halei jeng nao tal puk palei gam haong dom adei sa-ai kamei piah pathau khan jak ba bhol bhap rahra, daong ka mikva thau cambaih laih jang ka bol lin bien phong ngak brei khik kajap bruk khik iek jalan tapain negar. "

Dalam tukvak masa mai meng anak, piah ka bruk pambuak gauk dak harei dak mek hu rilo baoh jeng siam mekre jang, jabat haong Kapul nyaom urang kamei patagok bruk pathau khan, pato tacei adat hukum, pambak prong dom bruk ngak siam gheih, jalan ngak mek hu baoh jeng siam mekre. Langiu di nan, caik hatai tal bruk daong ba urang kamei cak rok patagok bruk ngak mbang kinh te, palaghaih ka adei sa-ai kamei pambuak pagam haong puk palei, abih hatai hu mbaok tame bruk pacang khik bruk ngak po di jalan tapain negar. Amuk Lưu Thị Mỹ Linh, phaok Akaok UBND xa Ba Chuc, tinh An Giang taong yaom lac:

"Ndon balai bien phong hu brei panuac siam ka puk palei dalam bruk pacang caga khik bruk ngak po karo kajap an ninh jalan tapain negar saong peih ngak siam dom sarak di Mentri caga nagar ngak habar khik siam hu bruk pacang khik ngak po an ninh jalan tapain negar, binah ini dahlak taong yaom glaong dom bruk ngak di gah Ndon bien phong Lac Quoi."

Bruk ba tangin rik daong sa hatung hatai haong gauk di balai ndon Bien phong Lac Quoi saong Kapul nyaom urang kamei xa Ba Chuc daok rik daong biak prong tame bruk dak padang labik tapain negar hu sron mbon, tani tanat saong cak rok. Mai meng dom bruk ngak hu mboh di anak meta, ye hatai saneng di yaok urang bol, abih di nyu lac kapul nyaom urang kamei hu paglaong, rik daong gam haong bol lin Bien phong khik kajap mblang taneh ginreih siam di bangsa taneh iar Negar./.