Ndih tapui saong praong tagok di bhum taneh kaya mada ilamo bangsa Tày, sap yava di ragam ragu ndantính saong dom ragam adaoh then hu jeng bhian randap pagam saong umo ranaih di sa-ai Đinh Thị Yến. Min bruk patagok di rahra ngak dom bruk siam gheih nan dak harei dak kurang jang dalam hatai di rairah sit thun umo, bruk nan ngak ka sa-ai Yến duh hatai saong kham merat ngak hagait piah salih. Tuk daok nao bac, sa-ai Yến ta-eng bac ragam ragu tính saong adaoh then tapa dom asal kadha online.

Khan ka bruk ini, sa-ai kamei Đinh Thị Yến, Akaok kalup kapul “Adaoh then, ragam ragu tính” xa Lương Sơn, tinh Lam Dong brei thau, meng akaok meti, bruk ta-eng bac tapa mạng oh njauk mbuan kayua oh hu thei pato tapak. Sa-ai brei iek nao iek mai yaok video, maong cambaih laih meng bruk pan ragam ragu, bruk taih talei tal bruk pambuak ragam haong kadha adaoh. Sa-ai Yến brei thau: Tuk bac tamat blaoh dai hoc, ka bruk ngak di xa Lương Sơn sa-ai mboh lac brei padang tabiak sa Kalup kapul “Ragam ragu ndantính, adaoh then” piah daong prein tal rairah harei hadei ka ilamo siam gheih di bangsa Tày, bangsa Nùng. Meng bruk nan, tuk Karja hu Danak dak pakat negar ka bruk khik ramik dom ilamo siam gheih di bangsa takik, sa-ai kamei ndom meyai haong Ndang uy saong karja palei padang tabiak Kalup kapul “Ragam ragu tính, adaoh then” di thun 2022.

Adei Phan Linh Chi, sa urang bac ragam ragu sit thun umo di kalup kapul “Ragam ragu tinh, adaoh then” di xa Lương Sơn brei thau, yava sap di ragam ragu tính saong adaoh then saong dom ilamo siam gheih di bangsa Tày, Nùng oh lac sa bruk di meng kal bo tuk ha;ei jeng hu rah tabiak, daong prein ka rairah harei hadei dalam raidiuk jaman bahrau.

“Bingi jamein yau sap yawa di ia craoh, pandiak jang apui bhong, mbak sarak jang yaok ribau kadha adaoh lac sap ragam ragu ndantính bhum palei… Anai Yến hu pato ka ilamo, ka bangsa Tày, bangsa Nùng anek biak bui sambai.”

Ngan haong bruk di drei lac Akaok kapul “Adaoh then, ragam ragu ndantính” xa Lương Sơn, sa-ai bhian ba dom urang dalam kalup kapul nao adaoh me-in ragam ragu di dom danak dak, dom var adaoh tamia dalam saong langiu xa. Tapa yaok mbang parang iek, sa-ai Yến khan veik dom asal kadha ka ragam ragu mai meng halei, bruk ngak jeng ragam ragu tính atau makna ginreih di ragam adaoh then, doang grauk urang thau saong iek praong ilamo siam gheih. Sa-ai Yến ndom meyai lac:

“Dom kadha adaoh then jeng yau kadha adaoh bhap bini, adaoh bhap bini Nùng An ye dom amuk, dom amaik, dom sa-ai brei pasram biak suai, saong gam haong nan ye dom taco saong dom anek jeng bac tui. Yau ye dua urang anek di dahlak, sa likei sa kamei, langiu di dom tuk pasram di sang bhap bini jeng hu tuk pasram di sang, ye dom anek jeng bac tui dom urang dalam kalup kapul. Tuk pan ragam ragu atau adaoh dom ragam adaoh nan, ye dom adei jeng pasram paik saong adaoh tui.”

Amuk Nông Thị Thông, sa urang ma-in ragam praong thun umo dalam kapul “Adaoh then, ragam ragu tính” xa Lương Sơn brei thau, sa-ai kamei Đinh Thị Yến lac urang naih gheih dalam bruk khik ramik ilamo bangsa Tày. Oh lac hu sa janih chreih takre ragam ragu ndantính, adaoh then, bblaoh  sa-ai daok thau tani tanat dalam bruk khik ramik saong pambak praong ilamo bangsa. Hatai saong bruk ngak di sa-ai Yến biak lac daong prein tal rairah harei hadei, daong hu makna tame bruk khik ramik ilamo bhum palei.

“Meng tuk padang Kalup kapul “Ragam ragu tính, adaoh then” saong khik tani tanat tal harei ini lac biak siam paje, min urak ini, dahlak hulin jeng taha thun blaoh paje, brei pato anek taco thau ka ilamo di drei piah pato brei ka rairah harei hadei.”

Sap ragam ragu ndantính, adaoh then di sa-ai Đinh Thị Yến oh lac hu sa janih brei pahadar tal ilamo siam gheih bhap bini bo daok peih tabiak pambang piah ka rairah sit thun umo di bhum atah bayah ini thau veik, anit ranam veik ilamo bhap bini di bangsa drei. Ngan haong sa-ai Yến, ragam ragu oh lac sa ragam ragu bo daok lac bruk brei mboh ka binguk yava bangsa Tày, lac talei pambuak di meng kal saong urak ini. Sa-ai Đinh Thị Yến hu ngak saong daok kaot cih jeng asal kadha gheih ka jalan khik ramik ilamo; sa asal kadha biak hu siam gheih, pambuak atah ilamo siam gheih meng meng kal, urak ini saong pamaong tal harei hadei./.