Ong Sằn Bồi Lộc urak ini lac sa urang po sa baoh sang jamraik chai brah Ba Cao daok di xa Hải Ninh, tinh Lam Dong. Dahlau diah, sang jamraik di ong lac sa labik chai padai sit piah duh ka mikva bhap bini dalam bhum palei, gam saong jien mek tame oh ralo, oh tal ganap piah pandar cai dalam raidiuk. Oh kadun takai, ong Lộc hu nao tal rilo labik, bac megru bruk ngak mbang patagok kinh te meng ayut cuai sahabat saong dom urang hu ilamo nao dahlau. Diuk pasang ong mek tangin peih praong bruk ngak mbang, buh jien tame paglaong patagok bruk ngak mbang, dak harei dak ngak bahrau labik chai padai di drei piah asar brah siam jang, pabak hu ka darak pasar.

Ong Sằn Bồi Lộc brei thau, tukvak akaok ba tangin tame ngak mbang, baoh sang ong brei nao mesraiy jien grauk labik saong padang abih drap ar. Gam haong bruk oh ka hu ilamo pandar majam jamraik chai brah hadah bahrau nan biak rabha tian suhsah. Njauk duh hatai abih lac oh ka duah hu akaok tabiak ka brah pablei. Meng kham merat, oh kanda kan kandah nan ong hu jak jeng:

"Di bhum palei drei ngak nong rilo, nan ye meng dahlau drei hu buh jien tame sang mac jamraik sit, hadei di ini meng patagok. Piah duh ka urang ngak nong hadei tuk yuak kuak, drei ngak dom baoh ging pathu, taong abih di urak ini hu 19 ging pathu bambu, lac piah duh tuk langik hajan, langik ribuk, piah duh ka urang ngak nong tuk yuak kuak."

Ong Lộc ba tangin tame padang angan je brah di drei mek angan Brah Ba Cao. Hadei rilo kham merat, meng labik chai bra sit ong Lộc hu buh jien tame patagok rah rah jeng sang mac jamraik chai brah pakat meteh saong urak ini ong ngak po 2 baoh sang chrai brah dalam tinh Binh Thuan klak (ini lac tinh Lam Dong), ngan haong dom phun jien buh tame yaok pluh ty dong, bruk chai hu 20.000 tan brah sa thun.

Piah angan je brah Ba Cao tuk halei jeng khik angan siam glaong, langiu di pandar majam jamraik bahrau, ong Lộc daok pambuak haong dom labik ngak tabiak pajaih padai siam pakat glaong piah pabak pajaih padai ka mikva urang ngak nong, hadei di nan blei abih ndap nda kaya. Yaok thun, ong daong tame labaih 1.000 tan padai ka mikva urang ngak nong dalam bhum palei saong pataom blei ndap nda kaya ngui tui yaom darak pasar. Urak ini angan je brah di ong Sằn Bồi Lộc oh lac hu dom labik dalam tinh chreih takre blaoh daok tabiak tal dom tinh, ban karei. Hadei tuk kaoh abih jien buh tabiak, baoh sang ong mek laba tame sang labaih 2 ty dong dalam sa thun. Gam haong nan, sang mac jamraik di ong Lộc hu brei bruk ngak tani tanat ka yaok pluh urang ngak bruk di bhum palei.

"Dua baoh sang jamraik hu labaih 18 urang ngak kong. Min tuk tame tabung glaong yuak padai, ye brei hu tagok labaih 30 – 40 urang ngak kong, lac brei bruk ngak ka dom urang ngak bruk di bhum palei, piah dom urang nan patruh kan kandah hu kinh te jien mek tame ka baoh sang."

Sa-ai Lương Tấn Trung, bangsa Cam daok di xa Hồng Thái, tinh Lam Dong chreih chrai brei thau, meng tuk ngak ka sang mac jamraik ye jien mek tame di baoh sang ong tani tanat jang, tuk jaik abih jien ye jeng hu ong Lộc brei nyim dahlau.

Oh sa janih lac sa urang ngak po di sang mac chai brah blaoh ong daok po angan brah Ba Cao di angaok darak pasar, ong Sằn Bồi Lộc daok lac urang ngak nong ngak tabiak kaya, ngak mbang naih joi rilo thun danak di xa Hải Ninh, tinh Lam Dong hu rahra je tame, anit ranam./.