Gam labaih 11 ha darang Ido hu ngak tabiak tui jalan VietGAP, pamaong tal darak pasar pablei tabiak, ong Nguyễn Thành Thắng, di Thới An, phuong Ô Môn, ban raya Can Tho thau cambaih bruk hu makna di bruk ngak tabiak karo kajap, siam mekre haong alam langik. Baoh sang ong hu ilamo pataom kanduh kalaok, kadung jru pacang khik njam patam phun kayau hadei pandar saong ba mai tal labik brei pataom di nyu piah langyah. Meng bruk ini hu ngak, ong Thắng kham merat jak ba mikva gam haong gauk ngak saong pataom di dom labik, thung padang tui adat. Tui ong Thắng, yaok kanduh kalaok, kadung pacang khik njam patam phun kayau klak di mblang hamu jeng meda jeng bruk ngak njom nerak, ngak kan kandah tal taneh, ikan hadang saong dom sinh vat hu lagaih.

"Pataom kanduh kalaok, jru pacang khik njam patam phun kayau pala anak meta ngak ka bein taneh di drei gheih, oh hu kanduh kadung jru, ka dua lac pacang khik alam langik ye drei oh cum mbau dom jru hoa hoc, pacang khik hu klau halau lagaih ikan hadang, thiên địch. Pachreih kakei mikva thau ha sit ka bruk pacang khik alam langik, tuk pruh jru pacang halak haling, atau pametai hareik blaoh drei brei pataom tui adat piah karja hu jalan ngak ka labik daok hu hijao, hacih sa-at jang."

Meyah yau dahlau diah hadei di tuk pandar jru pacang khik njam patam phun kayau pala blaoh, rahra klak barat kanduh kalaok, kadung di sa labik blaoh meng ramik. Meng bruk pataom ramik hu peih ngak, mikva brei srap gap pataom, ba tal dom labik pakuang padang, labik pataom tui adat, daong patakik bruk parah kanduh kalaok, kadung di ar danao, ribaong, barait. Meng di nan, mblang hamu, bein phun hacih jang, gam haong di nan daong pacang khik prein yava saong labik ngak tabiak. Sa-ai Nguyễn Thành Nghi, di labik Thới Trinh, phuong Ô Môn, brei thau, piah bruk ngak hu peih praong, brei patui veik hu pathau khan, jak ba piah rahra salih bruk bhian randap, gam jak ba bhap bini tui ngak :

"Bruk ini tui dahlak hulin mboh lagaih, kayua tuk drei ngak tabiak tuk drei tame bein mboh kanduh kadung hu pataom abih, blaoh hacih sa-at, tuk hu gah pambuak bruk ngak mbang mai tal urang rivang iek hu mboh jeng taong yaom ka drei siam veik. Ngan haong mikva urang biak sangka bruk ini, urang jeng mboh drei ngak urang jeng ngak tui min.”

Urak ini dom urang dalam phuong hu pataom meng 50-70kg kanduh kalaok, kadung jru pacang khik njam patam phun kayau pala. Bruk pataom hu ngak yaok tukvak saong hu ramik tui adat ngan haong janih tathuak klak kanjah jhak. Bruk njauk bui sambai lac urak ini mikva srap gap rami ramik, pataom kanduh kadung di dom labik brei di nyu.

Amuk Lê Thị Tú Trân, Akaok Kapul urang ngak nong phuong Ô Môn brei thau tukvak anak tal, phuong brei peih ngak “Harei Adit Hijao” yaok 2 adit/sa mbang, piah patakik bruk kanduh kalaok, kadung jru pacang khik njam patam phun kayau daok kandaong di dom mblang hamu, bein phun mbang baoh. Kapul kham merat padang labik pataom di dom labik hu tabneh ngak tabiak bruk ngak nong piah rahra pataom njauk brei adat:

"Salih ka meng dahlau tuk nao ngak hamu, hadei pandar mikva klak di ribaong, barait, min tapa peih ngak bruk ini dalam dom kapul jeng yau urang dalam kapul, ngan haong mikva jeng hu ilamo jang, mikva hadei di tuk pandar ye mikva brei pataom gilac di labik pataom di kapul, mbang akaok meti brei mboh hu sa bruk chreih chrai dalam ilamo di mikva."

Bruk pataom kanduh kalaok, kadung jru pacang khik njam patam phun kayau dak harei dak ngak jeng bruk bhian randap bahrau dalam bruk pacang khik alam langik tasik. Tuk yaok rahra gam haong gauk salih meng dom bruk sit, mblang hamu, bein phun hacih sa-at jang, halau ia saong he sinh thai hu pacang khik, tapa nan daong padang bhum ngak tabiak bruk ngak nong salamat, paglaong asar siam kaya ndap nda ngak nong./.