Hadei di rilo thun buh jien tame, tal ini ong Bảy Lữ hu 3 bein mblang labik raong menuk la-an, taong abih taneh hu labaih 5.000 mét vuông, hu taong abih tapol labaih 60.000 drei. Tui ong Lữ, raong menuk dalam labik pasang iek nhiet do daong patakik jit ruak, tapol menuk patagok samar saong samu gauk. Hadei labaih 45 harei raong, menuk hu labaih 3 kg/drei saong hu patabiak ro tui harak pambuak bruk haong gah pablei salih. Yaok thun, dom labik patabiak ro 5 rai manuk, jien mek tame meng 20 tal 25 ty dong, laba labaih 10%. Daok ndom ka siam lagaih di bruk raong menuk la-an, ong Nguyễn Đức Lữ brei thau: 

“Raong menuk la-an hu rilo lagaih. Ka sa di nyu lac drei pasang iek pandiak laan di nyu, meyah pandiak lo ye drei ngak ka la-an, daok la-an lo ye drei ngak ka pandiak. Ka dua, raong labik la-an ye patrun bruk mbau di nyu, nan ye vil taom dar labik raong menuk oh hu mbau. Drei ngak ka la-an mat menuk, menuk mbang rilo ye drah praong”.

Tui ong Lữ, ilamo piah raong jak jeng lac brei ngak catang dalam bruk klauk caga, brei jru menyum ka njauk; gam haong nan brei cih vak piah dar piah thau, tui iek bruk piah thau tagok dom kilo, meng nan srap gap kaya mbang saong njru ka njauk

Oh tok buh jien tame tani tanat ka var ro, ong Lữ daok pandar ilamo kong nghe so dalam bruk pasang iek saong sangka tapol menuk. Meng jalan raong kandauk, ta-eng ngak rilo gah nan yaom lac taong abih tapol hu labaih 60.000 drei, 3 labik raong tok khin 8 urang ngak bruk bhian. Labik raong glang jang hu sangka, ala haluk jeng hu tuh kam, khak menuk hadei di nan hu kuac pataom, saong pablei khak drak ka phun pala. Meng di nan, bruk ngak gam patakik njom nerak gam pandar hu kaya tathuak piah ba mai kein lagaih.

Oh hu sa janih pablei salih naih joi, ong Nguyễn Đức Lữ daok srap gap rik daong ka bhap bini. Ong bhian daong karja, kapul nyaom bhum palei sangka dom baoh sang kan kandah, rik daong padang jalan mbak saong ngak rilo danak dak sangka rahra. Ong Trần Công Lên, rahra phuong Đạo Thạnh, mboh lac:

“Urang raong menuk 4-5 bilan meng pablei, daok ong Bảy Lữ tok hu 45 harei hu patabiak ro, biak siam lagaih. Dahlak hulin hu blei menuk di ong mai raong veik, hu drei praong tal 8 kg. Raidiuk di ong Bảy Lữ meng bruk raong glang dak harei dak meda. Langiu bruk ngak mbang, ong daok rik daong ka bruk daong rahra di bhum palei biak rilo”.

Meng sa urang oh hu bac magru ilamu ralo dalam ka bruk raong glang, meng hatai chreih takre, bruk kham merat bac tangi saong khang hatai pandar ilamo khoa học – ky thuat, ong Nguyễn Đức Lữ hu padang bruk raong menuk kandauk praong, ba mai siam lagaih kinh tế glaong. Di umo 70, ong Nguyễn Đức Lữ jeng chreih takre pablei salih, rilo meng lac bruk raong glang menuk ilamo kong nghe glaong. Tui ong, ngak bruk oh tok piah parilo jien mek tame blaoh daok piah khik tani tanat prein yava saong ngak kreih camin ka anek taco:

“Dahlak hulin mboh bruk ini chreih lo, biak siam lagaih. Drei pambuak haong dom kongti langiu negar jeng biak siam karo, drei brei khik angan je tui harak pambuak bruk haong kongti, dalam harak pambuak bruk yau habar ye drei ngak njauk yau nan. Tukvak meng anak daok tal, dahlak kuhria duah labik hu quy hoạch raong glang piah peih veik labik raong, gam haong nan ngak menuac langyah ndom meyai, daong anek bik peih praong bruk ngak “.

Bruk raong menuk dalam “bilik la-an” di ong Bảy Lữ oh sa janih ba mai jien mek tame glaong, blaoh daok brei mboh jalan nao bahrau dalam raong glang bahrau: pasang iek siam jit ruak, patakik bruk pambuak meng langik, patakik urang ngak bruk saong paglaong siam lagaih bruk ngak tabiak ndap nda kaya angui.