Labaih 30 thun ngak mbang ndam gam haong ia tasik, ong Nguyễn Văn Bộ, urang taong ikan daok di phuong Phuoc Hoi, tinh Lam Ndong (labik ban sit La Gi, tinh Binh Thuan klak) tuk halei jeng ngak njauk tui dom adat hukum dalam bruk nao tasik. Ong brei thau, dahlau diah, bruk tut mek harei bilan nao tame tasik taong mek ikan meng tangin, taong mek labik halei, tut tangin brei thau cambac lac labik nan jeng oh laghaih rilo. Urak ini taong abih bruk cih vak tut tangin hu brei ngak di angaok baoh talephon bahrau.

"Cih vak tut angan harei bilan meng angka taka mbuan laghaih jang harei bilan meng tangin. Dahlau diah, drei taong mek hu mejam halei ye drei cih vak brei thau gilac meng tangin, urak ini taih tame talephon, blaoh drei ndom tame ka nyu mek sap dalam nan. Pablei salih ndap nda jeng mbuan sanang jang, nyu brei thau ka halaw gha kayakan, drei taong mek labik halei piah ka drei oh ngak suan tui IUU nan lac hu paje. Blaoh ngak dom harak gar tui adat brei di balai pabah lamnge, bol lin bien phong pasang iek jeng mbuan mbiah jang".

Piah rik daong ngak brei cambaih laih khaw tin, harak gar brei thau ka halaw gha kaya ikan taong mek, duh ka bruk pacang cakak taong mek njauk tui IUU, meng nan tal puac bilan ini, di dom pabah lamnge meda hu peih ngak bruk mek pagam app pandar cih vak harei bilan taka angaok talephon atau angaok pandap ndien tu jak karak ka po gilac, urang peih gilai. Langiu di nan, tacei pato jalan ngak angaok he thong cih vak harei bilan taka piah cih vak khaw tin harei bilan nao tasik; payua harak khan brei thau taka ka jabat khik iek pabah lamnge dahlau di tuk veik mek kaya ikan tui njauk adat hukum.

Ong Nguyễn Thanh Thu, Akaok Mban khik iek tacei ba bruk di balai pabah lamnge Phan Thiet brei thau, ngan haong bruk peih ngak harak gar taka, tukvak blaoh tapa jabat jeng hu pathau khan ka bruk pandar harak gar taka brei ka po gilai, urang peih gilai ikan meng 12m tagok ka dom siam laghaih di harak gar taka meng jamraik.  

"Ndom ka vaktu peih ngak asal kadha harak gar taka, ngan haong nyaom gilai meng 21m tagok ye hu peih ngak meng harei 1/7/2026; nyaom gilai meng 15m tagok ye hu peih ngak meng harei 1/9/2026 saong nyaom gilai meng 12m tagok hu peih ngak meng harei 1/1/2027".

Kuhria tal harei 1/5, tinh Lam Ndong hu 8.196 chruh gilai ikan. Taong abih sruh gilai angaok nan hu tut angan, brei thau angaok he thong majam VNFishbase saong hu duah thau ka angan je sruh gilai, angan je po gilai pambuak pagam khaw tin di VNFishbase saong khaw tin labik daok bhap bani (VNeID).

Tui So Ngak nong saong alam moi truong Lam Ndong, piah khik iek bruk taong mek ikan khang kajap, dalam tukvak mai meng anak jaik tal gah karja khang tangin oh brei tabiak nao tasik ngan haong dom po gilai, urang peih gilai oh ngak njauk tui adat hukum hu ba tabiak blaoh.

Gam saong hatai caong khin paglaong yaom kaom brei ka kaya ikan taong mek hu jeng yau jalan ngak khik iek bruk taong mek ikan khang kajap, urak ini dom gah jabat karja gam haong urang taong iken tinh Lam Ndong daok pandar ilamu taka tame dalam bruk khik iek saong taong mek. Dalam nan, hu bruk pandar he thong harak gar taka (e-Logbook).

Bruk peih ngak samu gauk, mek hu baoh jeng siam mekre dalam majam harak gar angka taka meda rik daong ngak brei thau cambaih laih jang brei ka khaw tin, harak gar brei thau ka halaw gha kaya ikan taong mek hu, duh ka bruk pacang cakak taong mek IUU./.