Barah phoi meda karei gauk di yaok urang. Dom bruk brei mboh bhian yau ye patuk, meda lac patuk thu atau patuk hu laban; pandiak dalam rup, lagah la-an; pandik tada, rilo meng lac tuk hreic yava tame atau patuk; kan thuak yava, thuak yava samar; glaih glar, alah mbang. Dom urang ruak daok meda pandik akaok, pandik ralo rup, taglaoh aok atau aih caraoh.

Di uranaih sit, barah phoi oh hu mboh cambaih laih. Amaik ame brei caik hatai tuk uranaih patuk, pandiak rup, thuak yava samar, thuak yava marat prein, tada taluk tuk hreic yava tame, alah mum atau klak mbang. Uranaih ndih suai, kan di pamedeih, bram cambuai atau mboh kan thuak yava njauk brei ba tame labik y te ka drah.

Di urang praong, bruk mboh ruak gaok mai oh pndiak rup glaong bo tok mboh glaih glar, mbang huak oh thau bingi, war drei, kurang bruk medeih jangaih atau kurang prein pahat rup. Dom salih oh bhian ini juai maong lap, njauk ndom tal lac di urang ruak arak baoh hatai, me-ik saradang atau ruak phoi suai man tinh.

Bruk duah mboh drah aval daong ka urang ruak hu pasang iek saong taong ruak njauk lagaih, patakik pakurang bruk mbuan tamuh ruak karei. Tuk hu mboh kan thuak yava, pandik tada, bram cambuai, gila menuac atau bruk prein yava jhak nao samar drah, brei nao daong iek ruak chip samar.

Oh ta-eng drei brei taong padam ruak barah phoi yau meng kan mai meng jalan taong ruak bhap bini. Bruk menyum ginup ia, padeih padei saong mbang huak ginup daong rup pabhap pasiam siam jang. Meyah pandiak rup atau pandik lagah, urang ruak meda pandar jru patrun pandiak rup, patrun pandik lagaih tui tacei ba di urang ngak bruk y te. Oh ta-eng pandar aspirin piah patrun pandiak rup, njauk ndom tal lac oh pandar ka uranaih mala umo 16 thun meyah oh hu pato tacei di bac si.

Piah patrun bruk mbuan njauk ruak barah phoi, yaok urang brei khik tani tanat bruk bhian randap pacang khik prein yava jalan thuak yava:

Klauk vaccine ginup: Njauk klauk jru caga tui pachreih kakei, dalam nan hu dom vaccine caga kum, phế cầu saong dom ruak njom mbak meda ba tal barah phoi, patui yaok thun umo saong bruk di prein yava.

Khik pahacih sa-at rup drei: Rao tangin bian meng jabon, pacang pabah saong idung tuk patuk atau taglak, patakik taom gaok jaik haong urang daok njauk ruak jalan thuak yava.

Oh njuk pakao; patakik cum arthak saong dhul mun, njom nerak alam langik saong dom janih kajah jalan thuak yava.

Mbang huak ginup janih, ndih ginup manik, menyum ginup ia saong pahat rup njauk lagaih piah paglaong prein yava.

Tui dom urang njauk ruak arak baoh hatai, me-ik saradang, hen phế quản atau ruak phoi gar tavak suai mãn tính brei ngak tui bruk taong ruak, pasang iek ruak yaok tukvak saong tui iek prein yava.

Tuk hu dom bruk mboh kanda medil, urang ruak brei hu pasang iek ruak drah aval, oh ta-eng taong ruak di sang meng jalan ngak oh ka thau cambaih laih. Duah mboh njauk ruak saong taong ruak dil samu lac asal kadha hu makna daong patakik bruk ruak tamuh trak jang, pacang caga khik jalan thuak yava saong prein yava suai atah./.