Page 29/9, dalam tuk daok cakak hala phun brei iek dalam sang, ong Lê Tuấn Kiệt, daok di xã Phú Túc, tinh Vĩnh Long, njauk drei ula rup hijao iku bhong caik tame tangin gah hanuk. Inem kaik ngak haok darah, ngak jeng pandik pandua. Hadei di tuk hu ba tal labik labik pasang iek ruak samar drah, ong patuaj jamo oh njauk hagait tal pren yava atau rup bhap:

 “Nyu bahrau kaik tame tangin mboh pandik cambaoh rilo, nduac darah ye drei mong trun mboh sa drei ula. Njauk ula kaik ye drei nao tapa Balai ula Ndong Tam piah hu mong iek chip. Urak ini drei huac paje, dahlau di tuk cakak phun kieng njauk ngak yau habar piah ka phun nyu megei juh, atau drei mek gai hagait nan drei glaoh tagok… ye yain tangin tagok, ba tangin tame njauk ula kaik mboh huac rilo".

Meng akaok thun tal ini Khoa taong iek ula kaik, Pasak raong pala, roh duah, ngak tabiak jru cavao - Quan khu 9, nan daok iew lac Balai ula Ndong Tam, di xa Kim Sơn, tinh Đồng Tháp, hu taduan taong mek ruak ka jaik 800 urang njauk ula kaik saong dom janih con trung kaik. Di Sang iek ruak Quan y 120 jeng bahrau taong mek abih sa urang njauk ula kaik biak triak.

Tui dom urang hu ilamu, tame bilan hajan, bhap bani njauk caik hatai pacang caga plaih di ula kaik tui jalan ngak puh ramik hacih sa-at vin taom dhar sang danaok, bah trah hareik hareim, patakik jang labik daok brei ka ula. Tuk nao mai melam ye njauk pandar menyek pin pasang hadah. Tuk ngak bein, ngak hamu atau puh ramik bah trah dom labik hu rilo hareik hareim, ye bhap bani njauk mong iek ka nyu tani tanat, pandar mbaik gai atau pandap karei piah tuak ula; juai mek tangin  ba tame dom labik kanduak, sup atau dom labik mbuan hu ula daok. Đại úy Nguyễn Danh Hiếu, Kapul nyaom raong pala phun jru, Pasak raong pala, roh duah, ngak tabiak jru cavao - Quan khu 9, hu panuac kakei dahlau:

“Gam haong bhap bani ye juai sahaneng lac dalam dom harei hajan ribuk atau lac dom harei aia dauk vin taom dhar sang, drei njauk caik hatai tal dom bruk ngak. Dom labik bhian hu ula daok yau ye labik glaong jang gah langiu. Saong tuk ngak hamu ngak apuh, ngak bein ye njauk cuk khan ao pacang caga, gang tangin, takhaok kalik atau lac mbaik gai piah bo tuk drei mboh nyu ye drei taok nyu atau drei plaih juai juak tagok nyu".

Meyah oh patuah njauk ula kaik, ye bhap bani njauk khik hatai kajap, takik nao mai, caik kajap tangin atau takai njuak ula kaik saong samar drah pambak manuac urang pajeng ba tame labik iek ruak jaik abih. Juai ta-eng drei garô, raih inem kaik, njuk mek noc doc atau taok hala, jru cavao karei tagok inem kaik atau pandar ngak dom jalan ngak bhap bani piah taong mek ula kaik. Thuong ta, Gru jru CKI Lê Văn Tâm, Phaok akaok Khoa Taong mek ula kaik di Balai ula Ndong Tam, caik hatai, tuk njauk ula kaik ye bhap bani njauk nao chip tal labik iek ruak:

“Tuk ula kaik ye urang ruak jeng daok ngak dom bruk yau panjiak darah saong taok dom janih hala, dom janih jru cavao. Meng nan ba tal baoh jeng siam mekre oh hu, bo daok lahik tukvak piah nao tal labik iek riak hu darah huyet thanh pacang caga noc piah taong mek ruak ka nyu samar drah. Kayua yau nan ye, tuk urang njauk ula kaik ye njauk nao tal labik iek ruak piah ka dom gru jru duah thau lac njauk drei ula hagait kaik saong hu tukvak piah tui mong tui eik. Tui yaok janih ula bo hu tamuh dom trieu chung, nan ye khaol drei mai ini samar drah jang halei siam jang nan.”

Bhum taneran kraong Cuu Long daok tame bilan hajan, aia ndik daok ngak ka ula mbuan nao duak labik karei piah daok piah kandauk, ngak brei patagok bruk ula sro tame labik daok di bhap bani saong sang danaok. Bhap bani njauk paglaong akaok saneng, iek prong bruk pacang caga saong samar drah nao tal labik iek ruak tuk oh patuah njauk ula kaik. Urak ini, jaik abih dom sang iek ruak, pasak iek ruak di dom tinh, ban dalam bhum jeng hu taduan saong taong mek dom urang njauk ula kaik./.