Di ralo tinh, ban gah mraong, ruak tabiak darah mboh daok tamuh tagok ralo. Kadha Urang ieik ruak harei ini, daa mikwa saong abih gauk duah tahau ruak dan saong caik hatai caga ruak pandiak tabiak darah.

Anek ruak Dengue njaom mbak tapa manuac urang kayua anek jamok dut jeng pambak prong. Urang ruak meda njaom mbak 1 tal 4 anek vi rut saong meda ngak jeng jit gam tui anek ruak nan tal luac rai. Bruk ini, oh brei thau lac urang njauk ruak pandiak tabiak darah meda mien dich gam saong 3 janih anek ruak daok kandong. Kayua yau nan ye, sa urang meda njauk ruak pandiak tabiak darah rilo jang sa mbang.

Ruak pandiak tabiak darah rah tabiak luac thun saong tabung glaong di nyu hu lac dalam bilan hajan, bilan menek mabaoh di anek jamok. Ruak padiak tabiak darah bhian hu mboh di urang prong dan saong anek uranaih, ruak ngak pandiak tagok glaong, glaih glar, pandik talang, srau dhau jalan pal darah, tabiak darah, darah trun. Tui dom urang meda ngak jeng ruak trak ngak kanjah jhak tal pren yava. Urang njauk ruak pandiak tabiak darah caong khin hu mong iek ka nyu njauk jalan, caik hatai tui mong tui iek bhian harei. 

Ruak pandiak tabiak darah hu 2 janih ruak yau ye nan lac pandiak tabiak darah njual dan saong ruak pandiak tabiak darah triak. Ruak pandiak tabiak darah pambak tui yaok tanut meda hu dom kadha brei mboh karei di gauk. Kadha brei mboh ruak pandiak tabiak darah njual bhian meluk haong dom janih ruak yau pandiak dom, la-ar dom atau tamuh mbang bhong. Dom kadha bhian mboh rilo abih di ruak pandiak tabiak darah njuan nan lac: pandiak gam haong pandik meta, pandik akaok, tamuh mbang, padik talang, taglaoh ta-aok, pandik akaok talang,…

Urang njauk ruak pandiak tabiak darah meda dui atah dom kadha bhian mboh meng 4 – 7 harei. Meyah ruak pandiak tabiak darah njual, urang ruak thau mong iek njauk ilamu meda abih ruak hadei di sa adit.

Tuk njauk ruak pandiak tabiak darah triak ye urang ruak meda hu mboh dom kadha di janih ruak njual gam haong dom kadha karei yau: tamuh dom anut bhong di langiu kalik; nduac darah idung atau di ling tagei; taglaoh ta-aok atau hu darah dalam khak (kayua nduac darah di jalan tung pruac); taglaoh rilo, pandik hatian, tangin takai lagah la-ar; urang ruak glaih glar, huen akaok…

Tuk urang ruak salih tapa ruak pandiak tabiak darah triak ye caong khin hu ba nao tame sang iek ruak brei ka chip samar drah, meyah caik suai ye meda mbuan metai lahik atau caik kandong dom kadha kanjah jhak ka harei hadei brei ka manuac ruak.

Ruak pandiak tabiak darah hu angan Dengue mbiah tal urak ini oh ka hu janih jru padam ruak, blaoh patui di nan urang taong mek ruak pambak tui dom kadha hu mboh. Tuk tamuh pandiak gam haong dom kadha brei mboh di ruak pandiak tabiak darah ye urang njauk ruak meda nao pasang iek ruak di sang iek ruak. Ngan haong ruak njuan ye urang ruak meda hu brei taong mek ruak di sang, tukvak taong mek ruak meda dui atah meng  7 – 10 harei.

Urang ruak taong mek ruak di sang njauk hu mong iek ka nyu tani tanat. Meda pandar jru Paracetamol piah padam pandiak, pandar meng 10 – 15mg/1kg/mbang, menyum jru atah di gauk takik di nyu abih 4 tuk.

Urang ruak caong khin hu padeih padei di ghe kik neng, plaih ngak triak kayua lac tuk ini urang ruak glaih glar saong mbuan si huen akaok meda labuh tuk nao ta-eng sa drei. Brei ka urang ruak menyum ginup aia yaok harei, brei menyum rilo aia baoh kayau, aia pabak ka mbuan lang laar dalam rup, brei mbang aia bu. Njauk parabha jeng rilo van mbang sit ka urang ruak mbuan mbang, pandap mbang njauk lac pandap mbang hu aia atau janih kaya mbang la-mar. Brei ka urang ruak menei meng aia pandiak, uak rup njuan njac juai uak khang tangin tagok kalik rup./.