Nao tabak takai ieu lac sa bruk pahat rup ngak brei siam ka ragam baoh haatai jeng ye brei ka thuak yava, kayua yau nan ye lac nao tabak takai hu dak tame kapul kadha pasram padhih arak baoh hatai. Ini lac bruk pahat rup jaik abih grauk urang jeng ngak hu, oh khin hu ilamo kan kandah, kaya pandar ka nyu.

Dut saong rilo kadha pasram cardio karei, nao tabak takai hu kein lagaih praong kayua nyu mbuan lagaih: Meda nao hu di grauk labik, meng bein bangu, tapen jalan, jalan palei tal pasak darak pasar atau mblang dalam sang. Meng bruk mbuan lagaih ini ngak ka bruk nao tabak takai jeng sa di dalam dom bruk pasram arak baoh hatai mbuan ngak abih ka grauk thun umo saong ilamo ka prein yava.

Nao tabak takai ba mai rilo kein lagaih ka prein yava saong hatai hu taduan dalam dom bruk roh duah ilamo khoa hoc. Tuk khik tani tanat bruk randap nao tabak takai yaok harei, rup pabhap meda taduan hu dom kein lagaih arak baoh hatai hu makna yau ye:

Nao takai samar drah daong ka darah hu kaya meda oxy nduac lagaih dalam rup, meng di nan nyu ba mai rilo kein lagaih hu makna, yau ye: Pasiam tanut cholesterol; patagok prein yava hatai glo akaok; Patrun saradang dalam darah; Daong patrun kilo saong patakik lamek dalam rup; Patrun bruk mbuan njauk ruak baoh hatai; patrun katang akaok man tinh… Dom lagaih ini pambuak khang haong gauk, daong pasiam prein yava taong abih meya hu khik tani tanat suai atah.

Nao tabak takai atau nduac takai, bruk halei siam di abih? Kan piah ndom lac nao takai atau nduac takai halei “siam jang”, kayua palih ruah njauk lagaih pambak tame jalan pasram saong prein yava di yaok urang.

Nduac takai meda cuh calo tagok dua mbang dut saong nao takai dalam sa tukvak. Min, nao tabak takai takik brei ka hu prein yava jang, rilo urang meda khik bruk nao takai suai jang dut saong nduac takai.

Nao tabak takai yau lac janih palih ruah siam karo jang ka suai atah kayua njuel njac haong atuk talang saong takik mbuan njauk rambuac. Dalam tuk nan, nduac takai ieu lac sa bruk hu pambuak khang, meda ngak kan kandah tal palak takai, ta-uk saong ka-ing, njauk ndom mayai lac nduac di angaok jalan betong atau akiak khang.

Piah taduan hu kein lagaih arak brei ka baoh hatai, drei khin nao tabak takai ginup samar piah patagok ragam baoh hatai saong ragam thuak yava. Tukvak nao takai samar drah bhian hu brei mboh lac labaih 5km/mon atau samar jang. Sa bruk mbuan sahnang piah ta-eng taong yaom lac: drei meda ndom meyai min biak kan adaoh tuk nao takai. Langiu di nan, meda hu pandar dong ho pasang iek tukvak, harak labik, kaya tui iek pahat padhih atau pandar smart phone piah tui iek tukvak saong jalan nao takai.

Tui tacei ba bruk pahat rup di Amirik Hoa Ky, urang praong njauk brei khik tani tanat nao tabak takai yaok harei 150 minit, pambuak dua harei nao takai patagok baoh apan yaok adit. Nao tabak takai sampurna saong siam lagaih, hu maong yau lac sa dalam dom kadha pasram arak baoh hatai siam di abih. Oh khin bilik pasram atau kaya chiat jien, tok khin khik tani tanat bruk randap nao tabak takai bhian yaok harei, yaok urang jeng meda hu pasiam pasiam prei yava arak baoh hatai, salih janih saong hatai glo akaok tui jalan karo kajap./.