Bahrau labaih 2 tuk hadei di asau kaik takai, ong Lê Hữu Duy (umo 59 thun, daok di phuong Tân Bình) hu mbaok di Bilik pasang iek klauk jru caga, Jabat Pasteur Ban raya HCM piah ka bac si pasang iek ruak saong klauk jru caga. Bruk rah tabiak tuk ong nao di angaok jalan, sa drei asau dalam sang urang katuak nduac tabiak kaik. Hadei di tuk ngak bruk saong po raong asau saong karja palei piah ngak cambaih bruk ini, ong samar drah chip nao tal labik y te piah pacang caga ruak gila:

 “Dahlak iek tui khau tin yau nan ye thau tal ruak gila biak kan kandah, hu rilo urang metai yau nan ye oh dhan khin klak tapa. Dahlau diah dahlak jeng klauk jru caga ruak gila sa mbang blaoh paje. Mbang ini yaom lac cuk tarapha atah min asau nan jeng kaik bhup tapa, njauk takai nan dahlak nao klauk jru chip tuk nan. Tui dahlak, po raong asau brei khik iek asau tani tanat, oh palao barat; meyah ba palao tabiak labik di rahra ye brei pacang pabah piah plaih bala kan kandah brei ka urang”.

Jabat pasang iek klauk jru caga, Jabat Pasteur Ban raya HCM, yaok harei taduan meng 50-60 urang mai pasang iek ruak, ndom meyai saong klauk jru vaccine caga ruak gila hadei di tuk asau, mayao atau dom janih anek athur karei mbuan njom jit ruak tui jalan kaik, girao barac.

Tui BS.CKI Đinh Văn Thới, Akaok Bilik pasang iek ruak klauk jru caga ruak gila tuk tamuh ruak ye bruk ba tal metai lac jaik abih. Min ini lac janih ruak pacang caga hu meng vaccine meyah urang nan njauk asau, mayao kaik blaoh hu daong taong ruak njauk jalan saong klauk jru caga dak aval dak siam. Min, jeng daok oh takik urang ruah pilih ruah jalan taong ruak meng kal pagap yau mek ia mek, pandar jru Nam, jru Bắc oh khin nao tal labik y te. Dom bruk ngak ini oh daong hu ka bruk caga ruak gila saong meda lac daok ngak ka urang ruak klak tapa “tukvak ameh” piah daong taong ruak caga.

Tui BS. Đinh Văn Thới, vaccine pacang caga ruak njauk caong hu tukvak piah rup pabhap patabiak prein bruk pacang jit ruak. Bac si meda pamaong tame bruk di labik mbaih laka, labik kaik saong brei thau ka athur kaik piah brei klauk jru caga atau huyet thanh pacang ruak gila njauk lagaih:

“Ruak gila hu tukvak pa-auk ruak, min tuk klauk caga jru accine khol drei jeng brei maong iek tukvak. Kayua yau nan ye tuk hu asau kaik, mayao kaik, mayao barac, langiu di bruk sangka labik mbaih laka jeng njauk brei nao tal labik y te aval drah abih kayua tuk nan siam lagaih klauk jru caga dak harei dak glaong. Oh brei nao klauk jru suai, oh klak tapa caik tapa rilo harei ka meng nao klauk jru”.

BS. Đinh Văn Thới jeng brei thau, hadei di tuk asau mayao atau anek athur mbuan si ba virus gila kaik, brac atau lah tagok kalik mbaih laka kayua meda ngak tagok bruk mbuan virus njom tame dalam jang tame mô. Mikva oh pandar dom jalan taong ruak meng kan yau mek ia jhak, tauk hala atau pandar jru Nam kayua meda ngak suai bruk taong ruak caga.

Urak ini, Jabat Pasteur Ban raya HCM saong rilo labik y te jeng khik kajap ginup jru vaccine caga ruak gila saong ia darah huyet thanh caga uốn ván, gam haong nan jabat Pasteur hu patagok bruk ngak gam tukvak kreh pandiak jala, ngak gam harei 7 saong harei adit piah pabak ka hatai caong klauk jru pacang caga ruak di bhap bini rahra./.