Rilo urang sahaneng lac cakau racam atau inem pabrah bram lac kayua kurang janih ia siam. Min, bac si kakei brei mboh di dom ruak hakik atau srau kadau bruk panduan salih dalam rup pabhap.

Bac si chuyen khoa 1 Nguyễn Minh Phong, Sang iek ruak da khoa pakat dunya Nam Sai Gon, brei thau rilo urang bhian oh maong tal tuk mboh cakau tangin salih sambo bar atau mboh sọc juk kayua sahaneng tok njauk paoh tangin nuel atau kurang janih. Min biak nao hu dom bruk duah mboh ung thu meng bruk brei mboh biak sit sot ini.

Yau ye bahrau meng blaoh, dom bac si di Sang iek ruak Kalik Trung uong taduan sa urang likei labaih 60 thun mai pasang iek ruak kayua sa inem bram juk di cakau tangin luac rilo thun. Meng akaok meti, urang ini sahaneng lac juk bram cakau yau bhian nan oh nao pasang iek ruak. Min tui tukvak, inem bram juk dak harei dak pambak praong, cakau salih karei, papaok saong pataplaot oh yau bhian. Hadei tuk pasang iek dalam, urang ruak hu pasang mboh njauk ung thu hắc tố di cakau – sa dalam dom janih ung thu hu tanut jhak glaong kayua bruk tamuh euak karei samar meyah pasang mboh oh aval oh drah.

Bac si Phong kakei lac: “Oh lac dom bruk salih sambo bar jeng gaok kan kandah, min rah tabiak sọc balang juk bram bahrau, praong labaih 3mm, labik sắc tố oh samu tui tukvak atau kakau salih dui atah nan brei nao pasang iek chuyen khoa kalik piah hu pasang iek tani tanat jang”.

Nan ye dom bruk brei mboh halei rah tabiak di kakau tangin brei oh klak tapa?

Cakau racam, mbuan si jaoh: Rilo urang sahaneng lac cakau tangin laman lac kayua ngak nail rilo mbang atau kurang canxi. Kakau thu, lapih, mbuan papaok tal, tanrac atau jaoh bhian pambuak tal bruk kurang janih siam, njauk ndom tal lac biotin. Biotin atau vitamin H, bhian daok dalam kapul B lac janih siam hu makna daong kakau khang, đàn hồi saong khang kajap. Tuk rup pabhap kurang biotin, kakau laman jang, mbuan papaok saong labik tanut khang kajap atau kurang janih siam dui suai atah.

Rah tabiak balang juk atau salih sambo bar oh bhian: Langiu di bruk barah ia juk hắc tố, dom sọc ini meda rah tabiak tuk arak darah sit di ala kakau njauk kan kandah kayua njauk paoh gaoh catang.

Kakau salih tapa sambo patih chang atau patih bang rilo di dom kakau (tok caik gilac sa labik bhong di akaok kakau) jeng meda pambuak tal bruk kurang darah atau bruk di baoh gan kurang, atau ruak baoh hatai. Dalam tuk nan, kakau kanyik dui suai atah gaok mai rah tabiak meng ruak vảy nến atau njom nocotine kayua njuk pakao hala.

Kakau tangin blo atau daok ieu lac tanau tangin gai taong hagar. Ini lac bruk di akaok tanau tangin barah praong, kakau vaiy tagok vil oh yau bhian. Tui urang ilamo, bruk brei mboh ini bhian pambuak tal bruk kurang oxy darah man tinh, meda gaok di rilo urang njauk ruak phoi atau baoh hatai tim mach…

Tui Bac si Nguyễn Minh Phong bruk kan kandah urak ini lac rilo urang hu bruk randap ta-eng roh duah bruk ini angaok mang blaoh brei jru atau kaya ngak gheih mai roh duah di sang. Bruk ini meda ngak ka ruak dalam njauk labaih saong tamuh tagok trak jang. Kayua yau nan, grauk urang jeng pang rup pabhap saong srap gap rivang pasang iek ruak tuk mboh bruk oh yau bhian dui atah./.