Me-ik saradang ieu lac janih ruak rah tabiak rilo dalam dunya saong hu bruk tagok samar drah kayua bruk diukrai takik pahat rup, bruk mbang huak oh hu lagaih saong bruk labaih kilo, lamek cak.

Meyah oh hu pasang iek siam, me-ik saradang meda ngak tabiak rilo ruak karei yau ye ruak baoh hatai, matai dail dot quy, kurang baoh ritak than, ngak kan kandah tal than kinh, kurang meta saong gaok mai ngak metai. Dalam nan, bruk dinh duong biak hu makna dalam bruk pasang iek saradang dalam darah, khik tani tanat kilo lagaih saong patakik dom bruk tamuh karei suai atah di ruak.

 Rilo urang tuk njauk ruak me-ik saradang bhian hu ein taong abih janih tapung saradang atau dom janih kaya mbang. Min, ini lac bruk oh ka njauk. Urang ruak me-ik saradang jeng brei hu bruk mbang huak ginup dom kapul janih siam dalam nan hu janih tapung saradang, janih ndam, janih lamek, vitamin, janih khoang saong janih xo piah khik kajap hatai caong khin ngak bruk di rup pabhap.

Dalam kaya mbang yaok harei, urang ruak brei caik dahlau dom kaya hu tanut saradang dalam darah biar, meda janih hu rak yau ye njam hijao, dom janih ritak, ngu coc tamo asar saong dom janih baoh kayau takik yamein yau medan, kruac bung, baoh uas, baoh le. Janih xo daong ngak suai luac jalan patame saradang, meng nan patakik bruk tagok saradang hadei mbang.

Pabak ginup kaya mbang hu ndam asar siam glaong meng ikan, ralo menuk ada brei klak kalik, baoh menuk ada, ia tasau takik lamek atau dom janih ritak. Dom kaya mbang ini daong khik rani tanat ralo cơ saong pabak nang luong njauk hu ka rup pabhap.

Tuk mbang, brei mbang suai, mameh suai klik, plaih mbang biak samar atau mbang biak trei. Bruk khik tani tanat klau var huak njauk tukvak dalam harei saong meda pabak dom var mbang huak njauk lagaih tui jalan tacei ba di bac si brei daong pasang iek saradang dalam darah tani tanat jang.

Urang ruak brei palih ruah dom janih tapung patame suai yau ye brah lek, yen mach, ahar banh mi tamo haleik, dom janih ritak tamo asar saong njam patam baoh karaoh. Dom kaya mbang brei hu ngak meng bruk tuk, tanek atau am salih ka bruk hana, xao rilo menyek.

Gam saong kapul janih lamek, brei caik dahlau dom janih lamek hu lagaih ka baoh hatai yau menek oliu, menyek ritak mbong, menyek bangu ia harei, dom janih asar saong ikan hu rilo omega-3. Dom janih lamek ini daong pasiam lemek dalam darah saong patrun bruk tamuh ruak karei ka baoh hatai.

Piah pasang iek siam saradang dalam darah, urang ruak brei patakik dom janih kaya mbang yau ye ahar keo, ia yamein, ia hu gas, siro, mut, dom janih baoh kayau ngak thu hu buh saradang. Urang ruak jeng brei paatakik kaya mbang hu rilo janih lamek halai saong cholesterol yau lamek athur, noi tang, kalik menuk ada, kaya mbang samar, kaya ngak blaoh dahlau, kem lamek saong dom janih ahar yamein hu rilo janih lamek.

Yaok urang ruak me-ik saradang meda hu hatai caong khin ka dinh duong karei gauk. Kayua yau nan ye, bruk padang harak kaya mbang brei patui tame bruk pato tacei di bac si atau urang ilamo gah dinh duong. Urang ruak brei kanal hadar dom bruk hu makna dalam nan hu bruk mbang njauk tukvak, rabha bruk mbang huak tuk njauk ngak, oh luai ka biak lipa atau biak drei, khik tani tanat kilo saong pambuak bruk pahat padhih rup yaok harei.

Caik hatai kanal hadar lac: me-ik saradang oh njauk lac brei ein mbang biak rilo. Sa bruk mbang huak hu ilamo, rilo saong samu gauk, pambuak haong bruk pandar jru njauk pato tacei saong tui iek saradang dalam darah bhian brei daong urang ruak pasang iek siam ruak hakik, patakik ruak tamuh karei saong khik tani tanat asar siam raidiuk suai atah./.