Urak ini, sang iek ruak Quân y 121 daok taduan mek saong pasang iek ruak ka yaok pluh urang ula kaik. Binah prong dom urang njauk bala tuk daok ngak bruk di langiu mblang hamu. Bilan hajan saong aia ndik nan jeng ieu lac tukvak masa ula sambo hijao iku bhong di ĐBSCL klak dom mbuan phun kayau piah nao duah labik daok bahrau. Bruk dom drei ula ini nduac duak angaok mbuan taneh tambok atau tame sang bhap bani ba tal bruk mbuan si ula kaik meyah khaol pambak gaok. Urang ruak Trần Bảo Châu, phường Ngã Bảy, ban Cần Thơ daok mek ruak ula kaik di sang iek ruak Quân y 121 brei thau.

“Page masup dahlak nao ngak hareik, ula daok dalam mbuan hareik dahlak oh mboh, bahrau traok tangin trun ye nyu camboh chip. Tuk njauk ula kaik dahlak jeng oh mboh rup ula, urang adei nao ngak gam nyu gak mbuan hareik tabiak meng mboh drei ula ndih dalam nan, blaoh labik nan hareik biak rilo; hadei di nan nyu pasiam veik  inem rambuis blaoh ye nyu ba dahlak tagok tapak sang iek ruak, tagok ini, gru jru dut iek darah, kluak jru”.

Kadha biak huac kanda urak ini, rilo urang hadei di tuk ula kaik ye oh nao tal balai iek ruak piah brei samar drah iek ruak padam ruak blaoh brei caik mong iek di sang atau ta-eng drei glang iek. Tal tuk labuh ruak triak, mboh dom kadha mbuan ba tal metai lahik, ye meng ba tame sang iek ruak, ngak brei ka bruk pasang iek ruak gaok rilo kan kandah. Yau bruk di urang ruak Trịnh Công Thành, xã Cầu Kè, tỉnh Vĩnh Long, njauk ula kaik min gilac mek ruak tui jalan bhap bani. Urang ula kaik Trịnh Công Thành khan brei thau.

“Dahlak nao pasang mek ikan, arieng, baw, kriuk,… juak baoh mbrong, hu ula dalam nan, ula nyu camboh, blaoh barah tagok, urang dalam sang pajeng dahlak tagok sang mikva jaik taphia sang; tame nan ong gru nan ngak gul, pluh tathak, blaoh ong brei nao sang lac paguh mesup nyu abih. Min nyu oh abih, daok barah praong jang, pandik camboh rilo jang; yau nan ka dom sa-ai daok jaik taphia ndom mayai lac njauk nao tame sang iek ruak, hadei di nan urang dalam sang meng mek radaih pajeng dahlak tame ini”.

Tui panuac kakei di Thượng tá, BSCKII Lê Thị Ánh Như, akaok Khoa Nội tiêu hóa saong Huyết học lâm sàng, Sang iek ruak Quân y 121: bhap bani njauk peih ngak dom jalan ngak pacang caga yau ye puh ramik hareik hareim vin taom dhal langiu dalam sang, puh ramik alam win sang ka nyu hacih sa-at; juak takhaok, cuk ao tangin tuk nao ngak; nao melam njauk pandar gom  menyek pin; juai glaoh tangin tame mbrong lubang, mbuk njuh, mbol phun kayau atau dom labik bo drei mong iek oh hu,… Meyah oh patuah njauk ula kaik, njauk khik kajap hata, juai nao mai rilo, kak kajap labik njauk ula kaik piah oh brei ka nyu pambak prong iai jru mek nọc độc saong samar drah pajeng ba urang ula kaik nao tame sang iek ruak. Juai ta-eng drei raih inem rambuis, tuak hala jru. Thượng tá, BSCKII Lê Thị Ánh Như klah rabha.

 “Taong abih dom janih ula độc chak jeng hu di ĐBSCL, dalam nan mboh rilo nan lac 2 janih nyaom ula hijao saong nyaom ula rimaong. Tuk njauk ula độc chak kaik ye nyu rabha jeng dua nyaom. Ngan haong nyaom bo ula rimaong, ye nyu ngak pambak tagok tế bào glo akaok; nan lac ngak khang tê liệt tế bào glo akaok, ba tal patrun jalan suak yava, trụy baih hatai. Daok ngan haong nyaom ula hijao ye nyu ngak barah pandik di labik kaik, ngak pambak tal tế bào di cơ; ngak brei srau dhau tal jalan darah, urang njauk ula kaik meda njauk nduak darah angaok rup bhap”.

Bruk njauk brei samar duahduah thau janih ula, pandar njauk darah huyết thanh pacang cakak ia chak ia nọc di nyu, pambuak haong dom jalan ngak pasiam pren yava saong tui mong tui iek catang jalan lâm sàng ye hu daong paglaong baoh jeng siam mekre dalam bruk mek ruak, pakatut jang tukvak masa ndik iek ruak saong patrun biak rilo jien ndo brei ka urang ruak. Rilo urang ula kaik medhil lac oh tapa hu ye gilac hu tapa truh diuk gilac saong pasiam veik pren yava biak siam. Kayau yau nan ye njauk nao tal labik iek ruak samar drah, mek ruak njauk jalan meda daong patrun biến chứng, pacang khik hu pren yava jeng ye metai lahik./.