Mamek darah tagok glaong mboh hu tuk pasang iek prein yava yaok tukvak atau hadei di tuk rah tabiak mabuh ruak arak baoh hatai trak. Oh takik urang ndom lac tok brei takik mbang ralo mamek lac meda caga mamek darah glaong. Mintapi, biak nao, rilo di nyu mai meng bruk bhian randap dalam mbang huak saong daok dang nda lac iek yau ye oh kanjah jhak hagaik min tapi biak di nyu ngak ka cholesterol saong triglyceride tagok glaong.

Sa di dalam dom bruk ngak chung suan rilo abih di nyu hu lac patakik janih mamek min mbang huak biak rilo lisei, tacuk, phở, ahar mì, ahar yamein, ia yamein atau dom kaya mbang hu rilo saradang. Langiu di lamek hlai lagaih, saradang saong tapung ngak jeng ndap nda jeng ngak tagok mamek dalam darah. Kayua yau nan ye, bruk pasang iek saradang saong tapung brah dalam dom janih mbang huak daong pakurang patakik lamek.

Dom janih asar, baoh kayau tahana thu atau ia asar bhian hu maong yau janih siam ka prein yava. Min, meyah mbang menyum oh njauk, nyu jeng ba tame rup biak rilo dut tui ganap caong khin di rup pabhap.

Rilo urang jeng bhian menyum mbie dalam tuk mbang huak kayua sahaneng lac mayum takik oh mada hagait tal prein yava. Min tapi biak di nyu lac, alak mbie ieu lac sa di dalam dom janih bhian ngak brei urang tagok ia lamek dalam darah. Hadei di tuk nyu tame rup pabhap blaoh, alkon nyu tame baoh gan, ngak pataom mamek dalam baoh gan. Bruk ini meda rah tabiak di dom urang oh labaih kilo atau oh mbang rilo janih lamek.

Urang takik pahat rup ngak ka ndap nda dalam rup oh halai hu pa-abih, ngak ia mamek pataom gul dalam rup, ngak kanjah jhak tal luac jalan salih lipid. Dom urang thau ilamo brei pachreih, urang praong brei khik tani tananat takik abih 150 minit pahat rup di tanut kuhria rah tapa yaok adit.

Srau kadau ia lamek dalam darah oh ngak pandik atau kan si bom truh dalam tukvak akaok meti nan rilo urang oh maong tal, nao pasang iek ruak tuk mboh pandik. Dom urang hu asal kadha mbian labaih kilo, mamek bhi, tagok darah, me-ik saradang, njuk pakao atau hu urang dalam sang njauk ruak arak baoh hatai njauk brei nao pasang iek mamek darah yaok tukvak piah duah mboh aval bruk oh bhian.

Piah pacang caga saong pasang iek kadha mbung srau mamek dalam darah, yaok urang brei padang bruk daok dang hu ilamo saong khik tani tanat suai atah. Njauk brei caik dahlau bruk mbang huak njauk lagaih, mbang ralo njam patam, baoh karaoh that, ngu coc tamo asar saong dom janih đạm siam mekre yau ikan, asar ralo, ritak; patakik dom kaya rilo saradang, ia menyum hu saradang, takik alak mbie, oh njuk pakao saong pasang iek prein yava yaok tukvak. Srau kadau mamek darah taong abih meda hu pasang iek drah aval saong salih bruk daok dang njauk lagaih. Tok hu dom salih sit dalam bruk mbang huak saong daok dang yaok harei jeng meda daong patakik bruk mbuan njauk dom yau arak baoh hatai, pacang khik prein yava suai atah./.