Urak ini daok lac tuk salih bilan di bilan pandiak tapa bilan bhang, bruk salih ndiet do saong tanut tathah meda ngak kan kandah tal prein ta-eng pacang khik di niem mac jalan thuak yava, dalam dom virus jalan thuak yava meda hu kein lagaih piah daok diuk saong njom mbak. Urak ini uranaih tame nao bac, daok labik rilo urang saong jaik gauk jeng ngak ka virus mbuan njom mbak meng urang ini tapa urang diah.

Dom ruak bhian gaok dalam tukvak ini hu kum, njom virus hợp bào thuak yava, dom ruak hu bhian gaok kayua virus yau ye kayua phế cầu, patuk hu gà; taphia nan bhap bini brei caik hatai sangka tuk ruk sởi jeng gam gam rah tabiak, ruak pandiak tabiak darah, tangin takai pabah, dom ruak njom mbak karei yau ndaih baoh, barah glo viem nao Nhat Ban, lac ruak kayua Nao mô cầu jeng rah tabiak.

Dalam dom jalan caga ruak, klauk vaccine hu bruk biak hu makna ngan haong dom ruak hu blaoh vaccine caga. Vaccine daong majam pacang ruak thau dom bruk ngak tamuh ruak saong brei bruk hadar pacang ruak dahlau tuk rup pabhap gaok virus atau anek ruak.

Uranaih brei pasang iek tukvak klauk jru caga piah khik kajap hu klauk ginup dom vaccine dalam danak dak klauk jru caga saong dom vaccine hu pachreih kakei tui thun umo, njauk ndom tal lac bruk caga sởi, sởi – rubella, sởi - quai bị - rubella, bạch hầu – patuk ho gà – uốn ván-bại liệt- Hib, phế cầu, kum, ndaih baoh thủy đậu, barah glo viêm não Nhật Bản, viêm gan A, viêm gan B ... tui pato tacei saong tukvak njauk ngak tui.

Ngan haong urang praong thun umo, brei sangka iek praong vaccine kum yaok thun, phế cầu saong dom vaccine karei patui bruk hu klauk jru meng dahlau, thun umo saong ruak hakik. Ini lac kapul urang mbuan njauk ruak trak, tame sang iek ruak saong metai tuk njauk dom ruak njom anek ruak jalan thuak yava.

Urang kamei metian brei hu langyah bruk klauk jru caga ka njauk, dalam nan vaccine kum meda hu pandar dalam tuk metian saong daong pacang khik amaik saong anek dalam dom bilan akaok rai. Vaccine caga bạch hầu – uốn ván – patuk ho gà dalam tuk metian hu makna dalam bruk brei kháng thể pacang khik anek kaman anak ruak patuk hi gà, vaccine caga RSV klauk jru ka amaik dalam 3 bilan puac di tukvak metian piah brei bruk pacang ruak caga ruak RSV brei ka anek dalam dom harei akaok rai.

Urang njauk ruak dahlau yau ruak arak baoh hatai, ruak phoi man tinh, me-ik saradang, ruak thận, kurang prein pacang ruak…nan hu bac si taong yaom bruk klauk jru caga piah pabak dom vaccine njauk hu. Dalam kapul ini, caga ruak meng vaccine karei crih hu makna kayua tamuh jeng ruak karei tuk njauk ruak njom mbak bhian glaong jang urang khang kadang.

Klauk vaccine oh salih taong abih ka bruk caga ruak njom mbak. Tuk salih bilan, brei khik tani tanat bruk bhian rao tangin, pacang pabah tuk patuk saong taglak, laneing lanoi arthak di labik daok saong tal bac, patakik taom gaok urang ruak jalan thuak yava. Uranaih njauk ruak brei hu padeih padei saong patakik taom gaok urang karei tal tuk patakik bruk mbuan njom mbak. Baoh sang jeng khik kajap janih siam, ndih ginup, pahat rup lagaih saong pasang iek siam dom ruak hu dahlau. Oh ta-eng pandar kháng sinh piah caga ruak virus.

Dom urang ilamo pachreih kakei: Salih bilan oh lac sa makna ngak tamuh ruak njom mbak, min lac tukvak brei patagok bruk pacang caga. Juai sang jit ruak rah tabiak ka meng caga ruak. Brei pasang iek aval saka klauk jru caga di yaok urang dalam baoh sang, njauk ndom tal lac uranaih, urang praong thun umo, urang kamei metian saong urang hu ruak dahlau. Klauk vaccine njauk tukvak saka, ginup jru saong srap gap dahlau bilan ruak lac sa dalam bruk hu makna abih piah patakik njauk ruak, ruak tamuh karei, tame sang iek ruak saong metai./.