ThS. BS Vũ Thị Thùy Dương, Phaok akaok khoa Nhiễm Sang iek ruak Uranaih 2, Ban raya HCM brei thau, dom uranaih ruak pandiak tabiak darah taong ruak di khoa daok hu tagok rilo, dalam nan rah tabiak dom bruk rah tabiak trak.

Njauk caik hatai di nyu hu lac, tukvak kan kandah di ruak bhian laik tame harei ka 3 tal harei 7, njauk tukvak uranaih njauk ruak saong abih ruak pandiak rup. Ini lac tuk amaik ame mbuan klak tapa kayua sahneng lac uranaih abih ruak, dalam tuk bruk muan njauk shock, kurang arak mach jeng meda rah tabiak.

 BS.CKI Văn Thị Xuân Quỳnh, Phaok Akaok Khoa Noi Tong quat dalam Sang iek ruak Da khoa Xuyên Á Ban raya HCM, dalam kapul urang ruak tame sang iek ruak hu dom bruk rah tabiak ruak karei yau ye shock pandiak tabiak darah, pandik baoh gan, baoh hatai, baoh than, rilo labik dalam rup saong tabiak darah jalan tung pruac trak, dom bruk njauk brei panduan tagok sang iek ruak pakat angaok.

Tui bac si, pandiak tabiak darah urak ini oh ka hu jru taong padam abih ruak di nyu. Kayua yau nan ye, bruk thau aval drah saong tui iek jaik bruk rah tabiak hu makna dalam bruk pacang caga ruak tamuh karei:

“Dom janih ruak lagah kum bhian yau ye patuk, gar idung biak rilo min di ruak pandiak tabiak darah ye lac biak takik. Urang ruak rilo meng lac pandiak rup glaong, mboh glaih glar, alah mbang, menyum ia oh jeng saong mbang huak jeng kan kandah, dom bruk yau nan njauk brei drah aval nao sang iek ruak piah pasang iek taong ruak”.

Di Sang iek ruak Nhiet doi Ban raya HCM, dom urang ruak pandiak tabiak darah hu mboh daok galap tagok. BS.CKII Nguyễn Thanh Phong, Phaok Yam ndok sang iek ruak brei thau, sang iek ruak urak ini hu labaih 120 urang ruak pandiak tabiak darah daok taong padam ruak.

Tui bac si Phong, bruk njauk caik hatai lac pandiak tabiak darah meda ruak trak di tuk urang ruak patrun ruak atau abih ruak pandiak rup. Dalam tuk ini, bruk tathuak darah meda ngak patrun payeng, ba tal tru darah saong shock. Meyah shock dui atah, urang ruak meda pandik di rilo labik dalam rup, pagam tui srau kadau khang darah saong tabiak darah.

Tui dom ruak trak, urag ruak meda brei pabak prein yava, daong thuak yava, halang darah saong dom kaya sambo bar patui ruak. Njauk ndom tal lac, tuk shock dui atah ba tal pandik rilo labik dalam rup, mbuan ba tal metai.

Tui BS Nguyễn Thanh Phong, tui pandiak tabiak darah, abih pandiak rup oh lac abih ruak, ini lac sa dalam dom makna ngak ka urang ruak mbuan oh caik hatai tal saong klak tapa tukvak brei hu caga tui iek glang nyu:

“Drei jeng brei pachreih rahra nao klauk jru vaccine ka aval karei dalam nan njauk caik hatai tal dom urang mbuan gaok kan kandah glaong trak yau ye uranaih, urang praong thun, dom urang hu ruak karei dalam rup dahlau, hu ruak trak dahlau, lamek bhi. Dom thun jaik ini hu dom urang lamek bhi njauk ruak pandiak tabiak darah rah tabiak srau kadau”.

Dalam bilan hajan, rahra urang brei srap gap caga pandiak tabiak darah meng di labik daok, kayua jamaok pambak ruak meda menek dalam dom kaya padang ia biak sit vil sang. Dom baoh sang brei bhian pasang iek, gam sir atau neh klak dom kaya meda kandaong ia yau jeik, pakuang, kalaok, balaok, kaya klak; gam haong nan salih ia, rao hacih sa-at dom kaya padang ia yaok tukvak, pametai lang quang piah patakik jamaok cakrok saong patakik bruk mbuan njom mbak ruak pandiak tabiak darah dalam bhap bini./.