Dahlau diah, baoh sang sa-ai Võ Thị Thu Nga daok di labik Bình An, phuong Long Bình rilo di nyu diuk meng bruk ngak hamu. Tuk taha, oh daok prein ngak hamu apuh, sa-ai salih tapa bac megru bruk pak dom kaya meng njam hang. Di jalan ngak dom kaya akaok meti sa-ai ba nao pambu di anak mblang sang. Dom kongti tuk nao tapa mboh kaya gheih nan hadei nan hu duah tal sa-ai kakei blei. Meng di nan, sa-ai taduan hu dom harak kakei blei blaoh yaih khan, tacei ba ka dom adei sa-ai palei hu mbaok tame. Urak ini yaok bilan palei pak njam hang di labik Bình An di sa-ai Nga jao yaok rituh kaya ka dom kongti, ngan haong jien mek tame labaih 50 trieu dong.

“Kongti kakei blei pak rilo kaya anek rasa, blaoh bangu thị, baoh gom, blaoh paok pak mata, paok vil, khai buh kaya jeng hu ginup, rilo lo. Urang kakei blei halei ye drei ngak kaya nan. Ngak dalam sang ye nyu njuel, drei hu prein drei ngak miat miat, malam harei daok dalam halui, jeng hu jien mek tame gap mbiah”.

Bruk pak ngak dom janih kaya meng njam hang oh lac sa janih daong ka sa-ai Nga patagok kinh te baoh sang blaoh nyu daok brei bruk ngak ka rilo urang kamei dalam bhum palei. Meng dom urang di harei akaok meti, tal ini labik di sa-ai Nga dui pachreih labaih 20 urang kamei hu mbaok tame pak dom kaya ngui meng njam hang.

Sa-ai kamei Trương Thị Kiều daok di labik Bình An yaok harei, hadei di tuk nao tahanek mbang pah ka sa gah pablei salih, tukvak lahei sa-ai srap gap pak njam hang piah duah jien mek tame piah sangka brei ka raidiuk. Sa-ai brei thau lac:

“Dahlak nao ngak waktu page, biar harei mai pak njam hang. Pak meng mon tuk 2 biar harei tal tuk 6 malam. Kongti brei kaya halei ye drei pak kaya nan, rilo kaya lo. Dhlak pak sa bilan hu labaih 3 trieu. Mboh jien mek tame jeng tani tanat, yaok bilan jeng hu jien sangka ka anek nao bac.”

Tui Kapul Urang Kamei phuong Long Bình, bruk pak njam hang di bhum palei hu ngak meng tangin. Dom gah ngak mbang pablei salih pabak praong, thaik thaot kaya ngui saong kakei blei; dom labik taduan kaya pablei gilac ka adei sa-ai kamei pak meng tangin. Hadei tuk salah blaoh, kaya ndap nda jao gilac ka gah ngak mbang pablei salih.

Tui sa-ai kamei Lê Thị Kiều Thu – Phaok Akaok Kapul Urang Kamei phuong Long Bình, bruk lagaih di bruk pak njam hang lac lagaih haong urang kamei praong thun umo atau dom urang kan duah bruk ngak di langiu.

“Njauk ndom mayai lac adei sa-ai kamei di labik ini ye daok pak sang daong bruk baoh sang, yang ka dua di nyu hu lac bruk hamu bein lac hu ngak rilo. Meyah yau bruk nao ngak atah ye oh hu thei sangka baoh sang, nan bruk ini jeng brei hu bruk ngak ka dom adei sa-ai kamei di bhum palei ini, gam sangka baoh sang gam hu jien mek tame ka baoh sang. Kuhria di phuong Long Bình hu labaih yaok rituh adei sa-ai kamei pak njam hang.”

Meng dom njam hang theih ndong dalam ia, tapa tangin di urang kamei bhum palei, hu ngak jeng rilo kaya ngui duh ka darak pasar. Hu makna jang, bruk pak njam hang daong rilo adei sa-ai kamei hu tukvak lahei, gam sangka ka bruk dalam baoh sang, gam hu jien mek tame, daong pasiam raidiuk di bhum palei di drei./.