Pathu rup dalau di tuk tame sang: Bruk akaok meti tuk mai sang meyah rup pabhap njom ia hajan ye drei brei uak brei ka thu rup pabhap aval chip. Tuk tathah ia hajan ba tal rup la-an, drei brei pandar tanyak uak rup saong salih ngui cuh khan ao karei bahrau. Atau meyah oh ye drei meda mek khan menei njuk ia di khan ao tathah piah meda plaih caga lagah la-an khang.

Rao tangin hacih: Yaom lac oh khin menei min hadei tuk nao di langiu mai tangin takai nerak kayua ia hajan, ia barong, atau ia parah tuk peih nduac radaih. Kayua yau nan, drei brei rao tangin meng jabon piah plaih dom ruak brei ka kalik tangin saong rao dahlau tuk mbang huak piah plaih dom ruak ka jalan tung pruac. Hadei tuk rao hacih ye mek siuk uak gilac ka pandiak.

Ngak pandiak rup: Bruk ngak pandiak rup hadei di tuk njom hajan biak siam piah caga ka lagah la-an. Drei brei palih ruah khan ao atah atau cuk ao dalam piah khik rup tani tanat. Piah khik kajap bruk caga siam lagaih, drei brei kham merat khik pandiak rup pabhap yau ini hadei takik abih 30 – 45 minit blaoh meng nao menei ia.

Menyum rilo ia pandao, ia taiy hu laya: Piah pacang caga ruak jalan thuak yava ye hadei di tuk rup pabhap drei hu ngak brei thu drei brei menyum sa glaik cawan ia pandao atau meda hlai sa patiek ia taiy laya atau ia taiy plang. Hadei tuk menyum ia pandao ye rup drei mboh pandiak tagok, njauk ndom tal lac tuk pan sa li ia pandao brei ka sahnang dalam rup jang.

Plaih nyaik mbang huak atau gaok tame kaya la-an: Hadei njauk iar hajan mai, oh mbang dom kaya la-an yau ye: ia patau, kem, iar tasau masam, dom kaya dalam garaong tu la-an. Saong njauk ndom lac og daok anak tadik jamraik atau jamraik ngak la-an.

Pandar jru pasiam dom bruk lagah la-an: Tuk drei lagah la-an, brei rah tabiak dom bruk mboh kan si bom dalam rup yau ye: tagalak, gar idung, pandiak rup, patuk, barah tarakaong,…Tuk ini drei meda pandar jru piah pasiam dom bruk brei mboh ini.

Pabak vitamin: Tuk lagah la-an, vitamin ieu lac janih jru daong lagaih di majam pacang ruak, njauk ndom tal lac vitamin C. Brei pabak dom janih kaya mbang hu rilo vitamin C yau ye: kruac, uas, amraik chuông… Langiu di nan meda srap gap pandar dom janih asar piah pabak vitamin C mboh siam lagaih.

Ngak hagait piah caga lagah la-an: Piah plaih nyaik lagah la-an ye bruk akaok meti lac dreo oh hu luai ka rup pabhap la-an. Njauk ndom tal lac idung, tarakaong tuk halei jeng brei khik pandiak saong paacih sa-at.

Langiu di nan, bruk daok dang, pasram pahat rup saong mbang huak ginup janih brei daong majam pacang ruak di drei khang kajap jang. Njauk caik hatai lac drei oh klak var huak page, kayua tuk lipa tian bom la-an di dalam rup oh truh kayua prein nyu trun ralo./.