Ong Võ Thành Tâm, daok di tổ 2, puk Lang Minh daok raong 30 drei pabe mek ralo brei thau: “Gam haong taneh ngak mbang 1,6ha, dahlak kaoh 60m2 ngak var ro, binah taneh daok veik pala amraik kalu, kophi, phun mbang baoh, pala hareik. Dahlak pala ginup dom janih phun meda hu pandar ngak kaya mbang ka pabe. Jien mek tame meng phun pala saong var ro di baoh sang mek hu labaih 500 trieu dong/thun”.

Halau kaya mbang ka pabe urak ini di puk Lang Minh biak rilo. Langiu di rup phun, kanduh, hala tangei saong dom janih ritak, pabe biak chreih mbang hala dom janih phun urang ngak nong ngak gang jamang amraik kalu yau ye: xoan, muồng, keo, gòn. Meng halau kaya mbang rilo, hu dahlau di bhum palei nan jien pandar ka kaya mbang brei ka tapol pabe biar. Tapol meng 60-70 drei meda mek tame laba sumu haong 1ha taneh pala 2 mbang padai saong 1 mbang tangei.

Daok Tui ong Lê Văn Trường, daok di tổ 12, dalam luac jalan raong, drei halei gheih ye ong khik ngak pabe pajaih, daok veik ye raong palamek pablei pabe ralo duah laba. Meng ilamo dalam raong glang, yaom lac tok hu 400m2 taneh daok saong ngak tabiak min jeng khik tani tanat tapol pabe pajeih 20 drei saong pabe ralo 50-60 drei. Jien mek tame meng raong glang saong pablei pabe daong ong Trường meda sangka ka 3 urang anek mbang bac.

Ong Trường khan mayai lac: Sa drei pabe pajaih hu yaom 20 trieu ndong, 2 thun menek 3 mbang, sa mbang menek 2 drei. Yaom pabe mek ralo urak ini hu meng 150-170 ribau ndong/kg. Yau nan, meng 1 drei pabe binai pajaih, hadei 2 thun raong jeng laba labaih 30 trieu dong. Tok khin hu taneh ngak var ro, urang raong meda patagok tapol pabe meng dom pluh drei tal 100 drei. Tui tapol pabe meng 40-50 drei, urang ngak nong meda mek laba sumu haong 1ha taneh pala padai, tangei/thun.

Puk Lang Minh lac bhum taneh lagaih haong rilo janih phun pala nan urang ngak nong pala padai, tangei, amraik kalu, kophi, phun mbang baoh. Urang ngak nong di puk Lang Minh thau pandar kaya tathuak di bruk ngak nong ngak kaya mbang ka pabe. Gam haong nan, khak pabe hu pa-auk ngak khak drak ka phun pala nan ngak hu chuoi ngak tabiak khak huu ke, patakik pandar khak hoa hoc.

Palei Lang Minh urak ini hu labaih 60 baoh sang raong pabe hu taong abih tapol di nyu hu labaih 7 ribau drei. Piah pachreih urang ngak nong pandar halau kaya tamo hu dahlau dalam bruk parilo tapol pabe, Kapul Urang ngak nong xa hu padang 2 kapul pambuak raong glang pabe haong 20 urang dalam kapul. Dom urang jeng mesraiy phun jien meng Kadung jien daong urang ngak nong ban raya hu taong abih yaom jien lac 2 ty dong (100 trieu dong/urang dalam kapul). Kayua bruk ngak pakhil kandauk ba mai siam lagaih kinh te glaong nan tukvak anak tal bruk taong abih tapol pabe di palei Lang Minh kuhria patagok samar.

Ong Nguyễn Minh Nghĩa, Akaok kapul urang ngak nong puk Lang Minh ndom lac: Urang ngak nong dalam puk palei biak lagaih haong dom janih phun pala, athur raong njauk lagaih haong hatai caong di darak pasar nan raidiuk di dom baoh sang dak harei dak paglaong. Urang ngak nong daok pandar dom bruk ngak tabiak pakhip kandauk tui jalan ngak tabiak khak huu ke piah pacang khik prein yava urang pandar, urang ngak tabiak.

Urak ini, dalam puk hu 2 baoh sang raong pabe meng 900 drei ba tagok, dom drei daok hu dom pluh tal 100 drei. Piah khik kajap asar siam tapol pabe, urang raong glang srap gap phun jien mesraiy laba lap meng gilang pariak piah padang var ro, patame pajaih pabe Boer thuần chủng ba mai patagok pajaih, parilo tapol. Gam haong nan, baoh sang raong caong khin hu daong padang angan je, hu akaok tabiak tani tanat piah patagok karo kajap./.