Lac sa di dalam dom baoh sang hu rilo thun pala njam ngò gai, ong huỳnh Văn Luận, urang daok di quan 12, phuong Soc Trang, brei thau, ini lac janih phun njam mbuan si pala, mbuan si raong, jien buh tame ka nyu oh ralo min tapi nyu brei jien tame rilo. Baoh sang ong urak ini hu 5.000m2 taneh pala phun njam ngò gai, yaok harei brei paik jaik 100kg piah ka urang ikak kaiy mai blei.

“Kein lagaih di nyu lac jien buh tabiak takik. Jru, khak drak jeng oh abih ralo dut saong dom janih ngak karei. Min laba glaong jang. Gam saong 1.000 m2, meyah mek hu labaih 2,5 tan ye drei mek tame klau pluh, pak pluh trieu jien dong.”

 Tui dom baoh sang pala ngo gai, hadei labaih 3 tal 4 bilan trun pajaih, phun brei buac pandar hu. Yaok mbang pala di taneh 1.000 m2 meda mek hu kuhria rah tapa meng 2 tal 3 tan njam ngò gai.

Urak ini hu gah ikak kaiy mai tal labik blei haong yaom 15.000dong/kg. Hadei di tuk kaoh abih jien phun buh tabiak, urang ngak nong meda mek laba labaih 20 trieu ndong di yaok kong taneh. Di bilan bhang, yaom pablei nyu mada tagok labaih 25.000 dong/kg, daong jien tame di urang pala hu siam rilo. Langiu bruk pablei hala, rahra hu jien mek tame meng bruk pablei ngò gai.

Oh tok sangka iek praong peih praong taneh pala, dom baoh sang rahra daok buh tame ka majam hanyol pacang pandiak saong pruh ia ta-eng, daong patakik prein ngak, pandar ia siam lagaih jang. Njauk ndom mayai di nyu nan lac, 8 baoh sang pala ngò gai hu pambuak padang kapul ngak tabiak kaya hu taong abih taneh labaih 2ha. Hadei meng tukvak peih ngak, dom urang dalam kapul bhian klah rabha ilamo, daong gauk dalam bruk ngak tabiak saong pandar ilamo khoa hoc ky thuat di bhum palei hu brei pato pasram. Meng di nan, asar siam ka yaok kaya dak harei dak hu paglaong tagok, njam pala hu tani tanat jang, gam haong di nan brei kein lagaih piah pambuak pablei.

Tui amuk Quách Thanh Thủy, Bi thu chi bo labik khu 12, phuong Soc Trang, bruk pala phun ngò gai hu daong brei bruk ngak tani tanat, daong raidiuk rahra dalam bhum palei dak harei dak hu paglaong cambaih laih.

“Jaik tal, palei mada brei peih praong bruk ngak ini, piah mikva hu kein lagaih jang dalam bruk ngak mbang patagok kinh te baoh sang, tani tanat raidiuk saong daong bhum palei mek hu jak jeng dalam bruk patagok kinh te.”

Gam saong bruk ba hatai salih, pambuak ngak tabiak, dom baoh sang pala ngo gai di labik khu 12, phuong Soc Trang, ban raya Can Tho daok dak harei dak padang jalan nao lagaih ngan gam saong kein lagaih hu dahlau di bhum palei. Bruk ini oh sa janih brei ba mai jien mek tame tani tanat ka rahra bhap bini, blaoh nyu daok peih tabiak bruk ngak karo kajap saong paglaong tagok raidiuk rahra./.