Hu sa mbang nao rivang iek labik raong meja, mboh kein lagaih di bruk ngak mbang yau ini blaoh dua diuk pasang sa-ai Huỳnh Thị Hồng Trang urang daok di palei 5, xa Phụng Hiệp mbaoh tangin duah thau saong buh jien tame brei ka bruk ngak mbang raong glang. Meng bruk ngak hamu padai hu 6 kong taneh tabau brei jien tame oh karo tani tanat, sa-ai Trang salih tapa bruk raong meja tui jalan camreip raong glang hu 18 drei pajaih. Urak ini, labik raong glang meja di sa-ai Trang hu pabak meja ralaow saong meja pajaih ka darak pasar, ba mai ka baoh sang sa-ai jien mek tame labaih 500 trieu ndong/thun/ Langiu di nan sa-ai Trang klah rabha ilamo ka mikva.

 "Di angaok jalan raong glang, meyah mikva gaok kadha ka tapol meja ye adei daong ka gah ilamo ky thuat. Meyah mikva khin adei hu harak khan ka kaya glai piah tut angan raong glang ye adei jeng daong. Daok dalam tuk raong khin hu hagait, taong phone mai lac adei ini mada buh abih hatai tian daong brei.”

Danak dak parilo bruk ngak mbang, patagok bruk patrun kathaot meng raong meja menek di xa Phụng Hiệp thun 2026 daok dalam Danak dak jalan ngak pakat negar saong patrun kathaot karo kajap. Meng blaoh bhum palei hu jao daong meja pajaih ka 59 baoh sang rahra kathaot saong jaik kathaot di dom puk palei. Yaok baoh sang hu taduan 2 yau meja pajaih hu yaom 20 trieu dong. Gam haong di nan karja palei daok peih bruk pato pasram ilamo ky thuat, tacei ba jalan iek glang sangka, pacang cakak jit ruak… khik kajap tapol pajaih cakrok khang kajap sampurna. Gam haong nan peih bruk padang majam pambuak di baoh sang raong saong dom HTX, labik raong piah khik kajap 100% akaok tabiak hu pablei tani tanat. Ong Lê An Quốc, Akaok UB Bhap bini xa Phụng Hiệp brei thau:

 "Ini lac Danak dak hu yaom kaom kinh te glaong, njauk haong kein lagaih brei ka bruk ngak mbang raong glang di bhum palei. Khol dahlak hulin caong khin hadei mbang peih ngak Danak dak ini, ye dom baoh sang brei sap gap parilo tapol, paarilo jien mek tame, paglaong raidiuk. Hu makna abih dalam nan ieu lac Danak dak oh lac daong dom drei pajaih blaoh daok pamaong tal bruk salih jalan sahaneng, daong baoh sang kathaot jeng yau jaik kathaot hu srap gap patruh kathaot meng prein ngak di rup drei.”

Sa-ai Nguyễn Văn Triều urang daok di palei Hòa Mỹ brei thau, baoh sang sa-ai hu angan daok dalam sarak baoh sang kathaot, oh hu taneh pala drak, hu sa baoh sang piah daok. Mboh baoh sang sa-ai kan kandah, sa-ai ye tari taring ngak mbang nan bhum palei hu mbaoh tangin, daong ine meja pajaih piah brei kein lagaih ka sa-ai patagok bruk ngak mbang.

“Karja daong sa yau ine maja gam yaom jien 10 trieu dongm daong hu 2 yau lac 4 drei. Drei raong, page drei tabiak pruh ia blaoh brei ka nyu mbang saong menyum ia min, oh hu hagait kan kandah rilo. Raong nyu ye brei mbang patei saong ikan mboh jeng mbuan si raong glang. Hu Karja daong drei pajaih ye adei biak bui sambai lo. Daong ye drei jeng kham merat ngak mbang, drei raong blaoh hadei drei hu jien pandar dalam baoh sang”.

Gam hu bruk daong ba di bhum palei ka drei ine maja pajaih, ilamo ky thuat saong akaok tabiak, bruk raong meja menek daok peih tabiak kein lagaih piah ka dom baoh sang kathaot, jaik kathaot di xa Phụng Hiệp dak harei dak padang mbang ngui karo kajap. Ini jeng lac bruk patrun kathaot lagaih, daong rahra patagok prein ngak, srap gap uak drei tagok meng prein ngak bruk di drei piah raidiuk dak harei dak hu mbang ngui tagok glaong jang./.