Dom harei puac si bih bilan 7, mblang hamu padai praong di puk palei Kênh 10, xa Tân Hiệp, tinh An Giang, ong Võ Hoàng Lưỡng (umo 64 thun) sahnang hatai yam tabiak di mblang hamu padai OM18 daok di umur labaih 70 harei. Dom bangu di tangi padai laya dhan dalam angin, rup dhan phun padai khang kajap, hala hijao kapal ngak ka urang ngak nong pambuak pagam labaih 40 thun gam haong mblang hamu oh padauk hu hatai bui sambai.

Takik thei thau, bhum taneh ini lac sa labik pala drak kan kandah di bhum Pak mata Long Xuyên. Taneh lakhun, langik oh yau bhian, dalam tuk nan yaom khak drak, jru pacang khik phun padai, xang menyek saong jien pah urang ngak tagok gam gam ngak ka rilo baoh sang urang ngak hamu gaok kateik geik praong.

Tui ong Lưỡng, meyah jeng khik bruk ngak tabiak yau klak ye biak kan piah khik hu tani tanat kein lagaih, kayua dom tukvak ini mai mikva randap drak khak oh srau, ta-eng srau tui meng bhian halei mai.

Rilo thun dahlau, ong jeng yau rilo urang ngak nong karei dalam bhum, trun pajaih kapal, drak khak tui bhian randap saong tuk halei jeng duh hatai yaok dom mbang tuk langik tasik pasalih karei. Jien buh tabiak dak harei dak tagok min kein laba oh hu lagaih dom.

Bruk salih lagaih praong tuk ong hu mbaok tame bruk “jalan hijao – Taneh siam, phun pala siam” kayua Kongti Co phan Khak drak Bình Điền peih ngak. Bruk ini oh sa janih brei yaih khan kaya ndap nda blaoh daok tacei ba rahra salih jalan sahaneng brei ka pala drak, sangka brei ka taneh ngak, pasang iek janih siam njauk lagaih saong patakik jien buh tabiak ngak.

Di taneh 5ha padai OM18 dalam mbang pala he thu 2026, ong Lưỡng pandar luac jalan di danak dak “Jalan Hijao – taneh siam, phun pala siam” gam haong paok kaya ndap nda Đầu Trâu Bio-Canxi. Tui ong, bruk karei brei mboh biak tantu meng akaok mbang pala. Meyah dahlau diah pandar khak drak oh srau, bruk srau oh samu gauk ngak ka phun cakrok oh duo gauk ye urak ini phun padai hu agha khang kajap jang, rup dhar praong, hala kapal, sambo bar hijao karo kajap jang.

Ong Lưỡng buac phun tagok piah brei mboh, dut saong rilo mblang hamu pala tui adat klak, mblang hamu pandar luac jalan bahrau ka rup dhan phun padai praong jang, hala praong jang, bangu sraoh nerang atah jang, bruk asar kajap glaong jang.

Ong Lưỡng chreih sambai lac: “Maong meng mata jeng mboh phun padai karo kajap jang. Yaok bangu choh nerang janih siam ye bruk raong asar siam jang, bruk ngak hu jeng glaong jang. Langiu di nan dahlak daok sahnang hatai ka bruk ciuk di phun padai anak langik oh lagaih”.

Mbang pla bilan pandiak he thu di Bhum taneran kraong Cuu Long tuk halei jeng daok rilo kan kandah kayua hajan ribuk dui suai atah, urang ngak nong tuk halei jeng suhsah kayua mblang hamu padai mbuan si jaleih, ngak brei kan kandah tal bruk ngak hu. Meyah phun padai laman lamuac ye tok khin hu hajan angin dom harei lac jaleih. Tuk phun hu agha khang kajap, rup dhan khang kajap karo, prein phun padai haong langik brei siam ralo jang. Nan jeng lac bruk urang ngak nong khin hu abih dalam kein lagaih langik salih karei di urak ini.

Tui ong Lưỡng, bruk ngak nong urak ini oh meda hu sa janih lac pambak tame ilamo meng kal mai blaoh daok lac thau pandar ilamo khoa hoc ky thuat, khang hatai salih saong kuhria caga siam lagaih di yaok jien buh tabiak ngak.

Tui ong, bruk ngak mbang jak jeng praong abih hadei rilo thun pambuak pagam haong mblang hamu padai oh lac hu baoh sang praong laneing lanoi atau raidiuk baoh sang tani tanat jang, blaoh daok hu lac bruk salih dalam jalan ngak mbang sahaneng kuhria di drei./.