Lac sa urang ky su gah jamariak co khik, hu ngak rilo bruk karei di gauk, akaok thun 2026, sa-ai Mai Đức Lại gilac mai palei piah peih mbang ngui haong bruk ngak dang hoat tinh meng balaok li-u. Tui sa-ai, dom labang dang ngak tui jalan meng kal mai bhian hu rilo thak dhun, bau par barat dalam alam langik. Meng bruk nan, sa-ai brei bih rilo bilan roh duah, pasiam majam labang cuh tui jalan paying. Bruk naih gheih di bruk ini lac taong abih lac athak dalam luac jalan cuh hu ba gilac mai labang cuh piah nyu patui apui mbang, daong pandiak dalam labang hu labaih 700 ndo C, patrun bruk patukik kurang menyek kurak saong oh brei thak par tabiak langik.

Kaya tamo meng kandaoh balaok li-u. Hadei labaih 3 tuk brei ka nyu mbang pandiak nhiệt phân, labang ba tabiak 3 kaya ndap nda dalam nan hu dang hoat tinh, tapung dang sinh hoc saong ia masam giấm kayau. Dalam nan, dang hoat tinh asar siam hu pablei tabiak darak pasar Japon; tapung dang duh bruk pasiam taneh atau ngak dang thruh jalko; daok ia masam giấm kayau hu pandar dalam bruk ngak kaya sinh hoc saong langyah alam langik. Hadei di oh ka bak sa thun peih mbang ngui, yaok bilan labik di sa-ai ngak tabiak labaih 30 tan dang hoat tinh, 9.000 lit ia giấm kayau saong 6 tan dang tapung. Dom kaya ini oh hu ginup pablei bih ka darak pasar.

"Drei mboh bruk ngak ini hu lagaih ka rahra yau nan ye ba hatai tame ngak piah daong langyah janih tathuak arthak, oh ngak brei ka nyu njom nerak tabiak alam langik. Drei duah thau tal bilan ka 6 ka meng ngak hu, ba tabiak kaya mek hu asar siam.”

Langiu kandaoh balaoh li-u, majam labang am dang daok meda pandar rilo janih kaya karei dalam gah ngak nong yau ye asar pa-aok, kanduh baoh durian, phun tangei, phun amraik… daong paglaong yaom kaom brei kaya oh hu yaom dalam gah ngak nong saong patakik janih tathuak hadei paik baoh. Hadei tuk rivang iek bruk ngak, ong Phạm Quang Trường, Yam ndok gah Ngak mbang pablei salih Trường Minh Phát taong yaom brei thau ini lac sa jalan nao yam tal hu ralo baoh siam makre.

"Bruk ini biak gheih, dalam nan njauk ndom mayai lac oh hu thak tathuak nerak, bruk ngak paying nao mai mboh biak siam lagaih. Meyah peih praong ye hu daong mikva pablei kaya oh hu yaom dalam gah ngak nong, brei jien mek tame, gam haong di nan daong hu patakik tathuak nerak athak tabiak dalam alam langik.”

Piah khik kajap phul kaya tamo, sa-ai Mai Đức Lại pataom blei balaok li-u meng rilo palei dalam bhum Taneran kraong Cuu Long saong dom tinh palei di gah Kreh Negar. Tukvak mai meng anak tal, sa-ai kuhria padang HTX, peih praong labik ngak bruk saong khik piah, parilo labang cuh saong pambuak haong rilo baoh sang rahra piah patagok bruk ngak mbang. Sa-ai Mai Đức Lại brei thau:

"Drei khin peih praong bruk ngak piah brei jien mek tame ka mikva saong dom labik hu pambuak bruk ngak. Masa jaik tal mada brei padang HTX, peih praong labang, peih praong labik ngak bruk saong khik piah. Drei biak caong khin hu Karja daong phun jien piah buh tame patagok bruk ngak mbang.”

Bruk roh duah, ngak jak jeng labang ngak dang meng ilamu sinh hoc gah ngak ilamo kong paying nao mai di sa-ai Mai Đức Lại oh lac sa janih brei daong paglaong yaom kaom dom kaya di gah ngak nong blaoh daok peih tabiak jalan ngak mbang siam mekre haong pasiam alam langik, ngak tabiak dom kaya hu yaom kaom glaong dalam bruk ngak mbang blei salih. Ini ieu lac sa bruk njauk brei hu gah jabat karja sangka daong, patui veik salah blaoh saong peih praong, daong patagok kinh te hijao, kinh te paying tuan hoan nao mai di dalam gah ngak nong./.