Bhum taneh meng dahlau lawik mai gaok rilo kan kandah tuk pala padai kayua taneh njom ia mbak bhian rah tabiak, xa kaoh pulao Tân Phú Đông, tinh Dong Thap bahrau (tinh Tien Giang klak) urak ini hu cuk tame rup drei sambo bar hijao di dom taneh pala plang.

Tui ong Nguyễn Trung Hòa, xa Tân Phú Đông, plang lac janih phun ba mai jien mek tame glaong abih dalam dom janih phun pala di xa pulao ini. Urak ini, plang jeng janih phun hu pala rilo, ba mai kein lagaih kinh te praong ka urang ngak nong saong brei bruk ngak ka rahra hu jien mek tame siam saong tani tanat.

Bruk naih gheih njauk caik hatai dalam jalan nao ini lac bruk pandar ilamo kong nghe piah pandar rilo abih yaok kaom meng phun plang. Meyah yau ye kal dahlau diah, hala plang bhian klak saoh ye ini jeng halau pandap tamo hu yaom glaong daong ka bruk ngak menyek. Dom kanjah di nyu hu pandar piah pala bamao saong ngak khak drak huu ke.

Njauk ndom mayai lac, danak dak pambuak haong dom urang ilamo Japon hu pandar hala plang gam haong gluh klak di danao raong piah ngak tabiak khí biogas saong halau nang luong ndien hacih. Dom jalan langyah lagaih ini gam daong rahra patrun jien buh tabiak, parilo jien mek tame, gam daong pacang khik alam langik, pamaong tal sa bruk ngak nong hijao njauk tanut di nyu.

Tui UB Bhap bini di xa Tân Phú Đông, meng bruk pandar dom ilamo ky thuat jamariak bahrau, kaya plang di bhum palei pabak hu dom tanut chuan catang piah pablei tabiak dom darak pasar praong yau ye Japon, My, Prang, Uc…

Tui taneh pala plang tagok tal labaih 4.000 ha, bruk ngak hu mek hu meng 15-17 tan/ha, ba mai kein laba glaong jaik 3-4 mbang dut saong phun padai, phun plang daok lac kein lagaih piah daong yaok ribau baoh sang rahra sahnang hatai pagam haong taneh saong uak drei tagok ngak meda.

Oh lac hu dom baoh sang rahra pala plang hu raidiuk lagaih siam, blaoh di xa kaoh pulao Tân Phú Đông, bruk kacaoh plang jeng daok daong rilo urang ngak bruk di bhum palei hu bruk duah jien tame yaok harei.

Di bhum kaoh pulao urak ini hu labaih 20 labik pataom blei plang. Dalam bilan buac plang tabung cek glaong, kuhria rah tapa yaok hare isa labik meda hu pataom blei meng yaok rituh kg tal dom tan plang. Piah khik kajap hu ginup plang pablei ka dom gah ikak kaiy yaok harei, dom po pala plang brei pah meng 20-30 urang buac cakak plang.

Bruk ini rah tabiak luac thun jeng ye thei jeng ngak hu, lac hu prein yava saong bruk ciuk hu kan kandah. Gaok mai, dom baoh sang pataom meng 3 tal 5 urang dalam sang daong bruk buac cakak plang pah.

Urak ini, jien pah urang buac cakak plang kuhria rah tapa hu meng 1.000 - 1.200 ndong/kg, patui tukvak yaom pablei glaong atau biar. Ngan haong phun plang buac hu kuhria rah tapa labaih 200 kg plang/harei ka yaok urang, sa urang ngak bruk meda mek tame meng 200.000 - 250.000 ndong/harei.

Tui ong Lê Quang Khôi, Yam ndok So Ilamo Khoa hoc – Kong nghe tinh Dong Thap, bruk Karja buh jien tame ngak tani tanat, pambuak haong bruk jao brei ilamo ky thuat meng dom urang ilamo hu daong urang ngak nong salih bruk ngak mbang jak jeng. Ini lac bruk hu makna piah Dong Thap patagok bruk ngak nong karo kajap, daong urang ngak nong bhum kaoh pulao sahnang hatai pagam haong taneh, uak drei tagok cakrok patagok bruk ngak mbang./.