Di nyaom biai “Jalan di Japon – Baoh sang ngak nong njauk praong” peih ngak di Dong thap rah tabiak di puac bilan 5, dom urang ilamo gah ngak nong hu klah rabha rilo ilamo passang iek jit ruak tui jalan salamat, siam lagaih piah daong po bein patakik bruk khut khat dalam bilan hajan.

Tui ky su Nguyễn Hữu Định, Phaok Yam ndok Kongti TNHH Nichino Viet Nam, phun baoh gara ieu lac janih phun pala biak oh lagaih saong langik tathah ma-ia ma-ait dui atah. Dalam nan ruak juk bram balang (daok ieu lac juk bram anek kuai takke) lac sa makna ngak kan kandah trak abih dalam bilan hajan. Ruak juk bram balang urak ini biak kan padam abih ruak tuk nyu tamuh pambak rilo, kayua nan bruk siam lagaih abih jeng lac bruk caga ruak aval.

Tui dom urang ilamo, ruak bhian ngak kan kandah di angaok dhan meda, bangu saong baoh meda. Tuk bahrau tamuh tabiak, di angaok dhan ngak jeng dom inem sambo patih, hadei di nan ndik tagok jeng dom inem ruak bram balang, kablok. Di gah ieu, ruak ngak patrun yaom kaom di baoh, ngak kan si pablei nyu.

Rilo urang ngak nong di tinh Dong Thap, Tay Ninh brei thau lac mayah hu dua klau mbang hajan rilo harei, ruak di baoh gara meda pambak biak samar.

Dom urang jru ilamo kakei dom baoh sang po bein brei srap gap caga ruak meng tuk phun tamuh daok meda, tuk nyu bangu saong tabiak baoh meda. Meyah hajan dui suai atah, bruk rivang bein bhian daong duah mboh aval ka ruak jeng ye caik hatai brei tal bruk pacang caga.

Langiu di ruak juk bram balang, Bọ trĩ jeng di baoh gara jeng ieu lac bruk ngak kan kandah njauk caik hatai di baoh gara. Janih anek rih ini bhian rah tabiak rilo dalam tuk phun tabiak bangu saong choh bangu, ngak kan kandah tal balau saong tangi baoh, patrun yaom asar siam ka baoh gara di nyu.

Sa asal kadha karei hu rilo urang ngak nong sangka lac bruk hareik tamuh dak harei dak rilo. Tui dom urang ilamo, bruk pandar jru pametai hareik gam gam rilo harei meda ngak ka phun baoh gara bhian randap saong juru cavao pacang caga ruak dinyu jeng ye oh siam brei ka taneh hadei di nan.

Dalam nan njauk ndom mayai lac, rilo baoh sang rahra jeng khik tani tanat bruk randap muluk rilo janih jru atau hlai jru dahlau piah pandar dalam rilo harei. Ini lac bruk ngak oh hu pachreih kayua meda ngak patrun bruk di jru saong mbuan mbuan tamuh bala brei ka phun pala.

Dom urang juru ilamo jeng bhian caik hatai brei ka po bein njauk ngak tui kadha “5 njauk” dalam bruk pandar jru khik caga phun kayau njam patam, dalam nan hu pandar njauk jru, njauk ka janih jit ruak, njauk tanut jru pandar, njauk tukvak saong njauk bruk pandar. Gam haong brei khik kajap tukvak dahlau tuk paik baoh piah pabak hatai caong ka salamat karo siam brei ka kaya ndap nda.

Tui taong yaom di dom urang hu ilamo, jru pacang caga khik njam patam baoh karaoh tok lac sa banah di jalan pasang iek jit ruak taong abih. Piah paglaong siam lagaih caga dalam bilan hajan, po bein brei pagam rilo jalan langyah yau cakak dhan ka laneing lanoi, ngak siam majam taoh tathuak ia, takik pandar khak ndam saong bhian pasang iek bein piah duah mboh dom halak haling ba ruak./.