Puk 6A, xa Vĩnh Hòa Hưng, tinh An Giang lac bhum dhaong biar, taong abih taneh ngak mbang njauk klak thaoh hadei mbang pala bilan he thu tuk ia sua pagam haong ia ndik ngak ia dauk. Oh med apala padai, rahra hu ta-eng sahaneng jalan “talaih kan kandah” meng bruk palao ikan tame hame, gam pandar halau kaya mbang hu dahlau, gam brei bruk ngak bahrau, njauk lagaih haong langik tasik taneh riya di bhum palei. Dom bilan ia ndik, dom mblang hamu padai jeng danao raong ikan hadang, jeng “bruk diukrai ka dua” di rilo baoh sang rahra meng bruk raong ikan dalam mblang hamu padai.

Amuk Trần Thị Bé Tư hu 5ha taneh pala drak, hadei tuk yuak blaoh padai he thu, amuk cang ia sua sraiy mblang hamu saong blei 70kg ikan pajaih, dalam nan hu 40kg ikan mè, 30kg ikan chep palao tame hamu. Hadei labaih 3 bilan raong, amuk Tư katung hanyol mek hu 2,5 tan ikan me saong 600kg ikan chep.

Daok gah ilamo ky thuat, hadei tuk yuak padai amuk Tư brei ia tame hamu piah pong nerang brai, tuk halei abih mbau bluk, ia jangaih gilac meng peih bruk palao ikan pajaih, patakik bruk ikan bahrau palao blaoh metai. Ngan haong ikan chep saong ikan mè bangu palao haong gauk, palao labaih 20kg ikan pajaih sa ha, pajaih ikan 80 – 120 drei sa kilo.

Hanyol brei hu atah meng 1,2 - 1,5m, ngak giềng angaok saong ala, pandar jamang klauk vil labik hamu raong. Takai hanyol brei hu klauk dalam mala mbaok taneh saong bhian pasang iek, plaih bruk ikan pasang takai ala blaoh paklah tabiak langiu. Nan raong rilo meda pabak veik kaya mbang yau ye haleik brah daong ikan khik tani tanat prein cakrok di nyu.

Urak ini dalam puk 6A hu 85ha taneh raong ikan đăng quầng saong padang kapul pambuak bruk hu 29 urang, hu pasram, tacei ba ilamo ky thuat saong pambuak bruk pablei tabiak.

Ong Nguyễn Văn Thiềm, Akaok UB Bhap bini xa Vĩnh Hòa Hưng brei thau, bruk raong ikan đăng quầng di angaok mblang hamu padai dalam bilan ia sua njauk lagaih haong langik tasik taneh riya di bhum palei. Kayua nan, xa hu jalan ngak daong dom baoh sang rahra peih praong taneh raong tagok labaih 400ha. Pambuak haong dom labik hu ilamo piah pato pasram ilamo ky thuat, ruah pajaih ikan randap lagaih, pachreih kakei ka bruk palao raong, tukvak palao, thraong ikan khik kajap tanut chuan ilamo ky thuat. Daong ngak jeng hop tac xa raong ikan hadang piah pasang iek bhap bini, pambuak pablei saong paglaong yaom kaom ndap nda kaya.

Ong Lê Văn Dũng, Phaok Yam ndok, Pasak Pachreih gah ngak nong An Giang taong yaom ini lac beuk ngak mbang bilan ia ndik ngan haong jalan raong mbuan mbiah, jien buh tabiak biar min ba mai siam lagaih rilo gah ka kinh te, alam langik saong rahra.

Bruk karei crih di bruk ini lac oh lahik jien buh tabiak ka kaya mbang. Ikan patih bangu mbang njec, phù du saong gluh kanjah huu co, ikan chep mbang anek rih di ala ia, laning, abao…saong padai daok labaih gilac. Meng nan urang ngak nong raong ikan mek hu laba biak glaong, tagok 2 – 3 mbang dut saong jien buh tame ngak. Oh lac bam ai jien mek tame biar, bruk ini daok daong paglaong janih siam ka taneh. Khak huu co aih ikan daong ka padai dong xuan meda patakik 20 – 30% khak drak hoa hoc. Ia sua ba mai phu sa, ngak jeng labik mebaoh ka ka rilo janih ikan hadang, daong pasamu he sinh thai mblang hamu./.